သိုၵ်းၵူၼ်းမိူင်းတႆးၼင်ႇၵၼ် ၶဵင်ႈၶႅင်ၵၢၼ်သိုၵ်းတေႃႇၵၼ်လႄႈ ၵူၼ်းမိူင်းထုင်ႉလႃႈသဵဝ်ႈ – ၼမ်ႉတူႈ ႁိမ်းႁဵင်လႆႈပၢႆႈ

ၵူၼ်းဝၢၼ်ႈ ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ဢွၼ်ၵၼ်ငိူင်ႉဝႄႈ ပၢင်တိုၵ်း ယွၼ်ႉၸုမ်းၸၢဝ်းၶိူဝ်းၼင်ႇၵၼ်ၶဵင်ၶႅင်ႈ ၵၢၼ်သိုၵ်းတေႃႇၵၼ် တၢင်းပွတ်းဢိူင်ႇဢီႇၼၢႆး – လႃႈသဵဝ်ႈ ဝႃႈၼႆ။

ဝၼ်းတီႈ 29/10/2018 ယၢမ်းၵၢင်ၼႂ် မွၵ်ႈ 8 မူင်းပၢႆ ထိုင် ၵၢင်ၶိုၼ်းမွၵ်ႈ 10 မူင်းၼၼ်ႉ ၵူၼ်းဝၢၼ်ႈပၢင်ႁုင်း၊ ဝၢၼ်ႈ ပဵင်း၊ ဝၢၼ်ႈၼႃးႁႃႈ၊ ဝၢၼ်ႈ 13 လၵ်းလႄႈ ဝၢၼ်ႈ 15 လၵ်း ၼႂ်းဢိူင်ႇဢီႇၼၢႆး ႁူဝ်ၵူၼ်းႁဵင်ပၢႆ ဢွၼ်ၵၼ်ငိူင်ႉဝႄႈပၢင် တိုၵ်း မႃးသွၼ်ႈဝႆႉတီႈဝတ်ႉဝိႁၢရ်မၢၼ်ႈသူႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ယွၼ်ႉသိုၵ်း ဢူၺ်းလီပွတ်းႁွင်ႇ တင်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် တၢင်းပွတ်းဢိူင်ႇဢီႇၼၢႆး ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈ မၢႆ 3 လၢတ်ႈတီႈၽူႈတွႆႇႁွၵ်ႈဝႃႈ “ သဵၼ်ႈမၢႆ ၵူၼ်း ပၢႆႈၽေးဢၼ်တီႈၶႃႈႁဝ်းလႆႈၵဵပ်းဝႆႉတႄႉ မီး 600 ပၢႆမိူဝ်ႈၼႆႉ ၵၢင်ၼႂ်ဝၼ်းတီႈ 30 ၼႆႉ ၶႃႈႁဝ်းပႆႇလႆႈၵဵပ်းသဵၼ်ႈမၢႆ ထႅင်ႈ။ လွင်ႈၵၢၼ်ၵိၼ်ယႅမ်ႉတွၼ်ႈတႃႇၵူၼ်းပၢႆႈၽေး ဢၼ်မႃးသွၼ်ႈဝႆႉ တီႈဝတ်ႉမၢၼ်ႈသူႈႁဝ်း ၶႃႈတႄႉ ဢမ်ႇပေႃး လႆႈမႆႈၸႂ်” ဝႃႈၼႆ။

ၵူၼ်းပၢႆႈၽေး ဢၼ်ပၢႆႈႁွတ်ႈၽႅဝ်တီႈဝတ်ႉမၢၼ်ႈသူႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈႁၼ် ၸုမ်းဢူၺ်း လီပွတ်းႁွင်ႇ မႃးတူင်ႉၼိုင်တၢင်းပွတ်းဢိူင်ႇဢီႇၼၢႆးႁဝ်းၶႃႈ တင်းၼမ်။ ထႅင်ႈလွင်ႈၼိုင်ႈ လႆႈငိၼ်းဝႃႈ သိုၵ်းၶူဝ်းလၢႆး ၽိူမ်ႉႁႅင်းသိုၵ်းလုၵ်ႉတၢင်းဝၢၼ်ႈၼႃးႁႃႈသေ ၶိုၼ်ႈမႃးတၢင်းဢီႇၼၢႆး။ တင်းသွင်ၾၢႆႇဢိူမ်ႈၸူးၵၼ်မႃးတိၵ်းတိၵ်းလႄႈ ႁဝ်းၶႃႈၵူဝ်ပဵၼ်ပၢင်တိုၵ်း ၵူဝ်ဢမ်ႇတၼ်းပၢႆႈသေ ၸင်ႇငိူင်ႉဝႄႈ ပၢႆႈဢွၵ်ႇမႃးဢွၼ်တၢင်း” ဝႃႈၼႆ။

လိူဝ်ၼၼ်ႉ ၵူၼ်းပၢႆႈၽေးသိုၵ်း ဢၼ်မီးတီႈၵျွင်းၶၢင် တီႈဢိူင်ႇဢီႇၼၢႆး ႁူဝ်ၵူၼ်း 200 ပၢႆၼၼ်ႉၵေႃႈ ပႆႇၸၢင်ႈဢွၵ်ႇ မႃး တိုၵ်ႉယူႇတီႈၼၼ်ႈယူႇ ဝႃႈၼႆ။

တႄႇဢဝ်ႁူဝ်လိူၼ်ဢွၵ်ႊထူဝ်ႊၿိူဝ်ႊၼႆႉမႃး ၼႂ်းထုင်ႉမိူင်းယဵၼ် သိုၵ်းဢူၺ်းလီ ပွတ်းႁွင်ႇ တင်း RCSS လႆႈပဵၼ်ပၢင် တိုၵ်းၵၼ်ႁၢဝ်ႈႁႅင်းသေ ၵူၼ်းမိူင်းၼႂ်းထုင်ႉမိူင်းယဵၼ် လႆႈဢွၼ်ၵၼ်ပၢႆႈ။ တေႃႈလဵဝ် ၵူၼ်းမိူင်း တၢင်းပွတ်းဢိူင်ႇဢီႇ ၼၢႆး လႆႈဢွၼ်ၵၼ်ပၢႆႈဢွၵ်ႇမႃး ဝၢၼ်ႈသူၼ်ႁႆႈၼႃး ပေႃးသွၼ်ႇပႃးၵူၼ်းထုင်ႉမိူင်းယဵၼ် လႆႈပၢႆႈ တင်းမူတ်း ႁဵင်ပၢႆ ဝႃႈၼႆ။