ဝူင်ႈၼႆႉ ပႃႇတီႇၵၢၼ်မိူင်း ဢၼ်တေၶဝ်ႈၶႅင်ႇပၢင်လိူၵ်ႈတင်ႈသွမ်ႈ တီႈဝဵင်းလၢႆးၶႃႈ ႁိပ်ႈႁႃသဵင် ၼႂ်းၼၼ်ႉ ၼႃႈႁိူၼ်း ၼေႃႇၽူႈတႅၼ်ႈပႃႇတီႇသိူဝ်ၽိူၵ်ႇၵေႃႈ ၶပ်းၶိုင်ၸွႆႈထႅမ်လၢႆၾၢႆႇ ၼႄလွင်ႈပိူင်ၾၢင်တီႊမူဝ်ႊၶရေႊသီႊ ဝႃႈၼႆ။
ပေႃးထိုင်မႃး ဝၼ်းတီႈ 03/11/2018 ၼၼ်ႉ ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တေၸတ်းႁဵတ်းပၢင် လိူၵ်ႈတင်ႈသွမ်ႈ ပႃႇတီႇၸိူဝ်းဢၼ်တေၶဝ်ႈၶႅင်ႇႁိပ်ႈႁႃသဵင် ၼႂ်းၼၼ်ႉပႃႇတီႇသိူဝ်ၽိူၵ်ႇသမ်ႉ ၵေႃႉပဵၼ်ၽူဝ်ႁပ်ႉၶႅင်ႇ လိူၵ်ႈတင်ႈပႃႇတီႇသိူဝ်ၽိူၵ်ႇ ၵေႃႉပဵၼ်မေးသမ်ႉ ဢိင်ၼိူဝ်ပႃႇတီႇၼူၵ်ႉယုင်းလူဝ်ႇတၢင်းၸွႆႈသေ ၶဝ်ႈႁၢပ်ႇပၼ်ၼႃႈ ၵၢၼ်ၽူႈၵႅဝ်ပၢင်။
ၼၢင်းၶမ်းလူႇ ၵေႃႉပဵၼ်မေးၼၢင်း ၸၢႆးသူၺ်ႇသႅင်း ၼေႃႇၽူႈတႅၼ်းသၽႃးပႃႇတီႇသိူဝ်ၽိူၵ်ႇ လၢတ်ႈတီႈၽူႈတွႆႇႁွၵ်ႈ ဝႃႈ “ ၶႃႈတႄႉဢမ်ႇပဵၼ်ၸုမ်းလႂ် ၼွင်ႉၶူၺ်ၶႅၼ်ႈတွင်ႉၶႃႈ ၸၢႆးဢွင်ႇထုၼ်းလေးသမ်ႉ ပဵၼ်ၼေႃႇၽူႈတႅၼ်းသၽႃး ပႃႇ တီႇၼူၵ်ႉယုင်း ၶႃႈၵႂႃႇၸွႆႈပဵၼ်ၽူႈၵႅဝ်ပၢင်ၼိုင်ႈၸူဝ်ႈၼိုင်ႈၵမ်းၵူၺ်း။ ၽူဝ်ၶႃႈတႄႉပဵၼ်ၼေႃႇ ၽူႈတႅၼ်းပႃႇတီႇ သိူဝ်ၽိူၵ်ႇၶႃႈဢေႃႈ။ ယွၼ်ႉပိူဝ်ႈပဵၼ်ၵၢၼ်တႃႇပီႈၼွင်ႉလၢႆးၶႃႈလႄႈ တီႈလႂ်လူဝ်ႇၸွႆႈသင်ၵေႃႈ ၶႃႈၵေႃႈၶဝ်ႈၸွႆႈၵူႈတီႈ” ဝႃႈၼႆ။
ၸၢႆးဢၢႆႈသႅင်ၵျေႃႇ လၢႆးၶႃႈ လၢတ်ႈဝႃႈ “ ႁဝ်းၶႃႈ ဝူၼ်ႉၵႂင်ၸွမ်း ဝႃႈၼေႃႇၽူႈတႅၼ်းဢၼ်တေယူႇၼႂ်းပႃႇတီႇသိူဝ်ၽိူၵ်ႇ ႁိပ်ႈႁႃသဵင်တႃႇဢွင်ႇပေႉ၊ ၵူၺ်းၵႃႈ ၵေႃႉပဵၼ်ၼၢင်းမေးမၼ်းၸၢႆးသမ်ႉ ႁၼ်ၸွႆႈၼႂ်းပႃႇတီႇၼူၵ်ႉယုင်း။ ႁဝ်းၶႃႈ ဝူၼ်ႉ ၵႂင်ၸွမ်း။ ၵူၺ်းၵႃႈ ပိူင်ဝၢၼ်ႈမိူင်းတီႊမူဝ်ႊၶရေႊသီႊလႄႈ ႁဝ်းမီးသုၼ်ႇလႆႈပၼ်ႁႅင်း ပႃႇတီႇဢၼ်ႁဝ်းၵျိူၵ်ႈ ၼၼ်ႉ လွတ်ႈလွတ်ႈလႅဝ်းလႅဝ်းယူႇ” ဝႃႈၼႆ။
တီႈၼင်ႈၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈၼႆႉ တေမီးၼေႃႇၽူႈတႅၼ်းသၽႃး 3 ပႃႇတီႇ ၶဝ်ႈၶႅင်ႇၵၼ် ၸၢႆးၵွင်ၶမ်း(ႁွင်ႉ) ဢူၵ်ႉၵႃႇ ၼေႃႇၽူႈတႅၼ်းသၽႃးပႃႇတီႇႁူဝ်သိူဝ်၊ ၸၢႆးသူၺ်ႇသႅင်း ၼေႃႇၽူႈတႅၼ်းသၽႃး ပႃႇတီႇ သိူဝ်ၽိူၵ်ႇလႄႈ ၸၢႆးဢွင်ႇထုၼ်းလေး ၼေႃႇၽူႈတႅၼ်းသၽႃးပႃႇတီႇၼူၵ်ႉယုင်း။ ၼႂ်းပႃႇတီႇသၢင်ႇသီႈတႄႉ ဢမ်ႇၶဝ်ႈၶႅင်ႇ။
ဝၼ်းတီႈ 01/11/2018 ယၢမ်းၵၢင်ၶိုၼ်း 12 မူင်းၼၼ်ႉ ပဵၼ်ဝၼ်းလိုၼ်းသုတ်းၵၢၼ်လူင်းႁႃသဵင်။ ၼေႃႇၽူႈတႅၼ်း ၼႂ်းဝၼ်းတီႈ 3/11/2018 ၼၼ်ႉ တေၸတ်းပၢင်လိူၵ်ႈတင်ႈသွမ်ႈပတ်းပိုၼ်ႉၸႄႈဝဵင်းလၢႆးၶႃႈ တႃႇႁႃၽူႈတႅၼ်း သ ၽႃးၵူၼ်းမိူင်းပုတ်ႈတီႈၼင်ႈ လုင်းၸၢႆးမူၼ်း ၽူႈတႅၼ်းပႃႇတီႇႁူဝ်သိူဝ် ၵေႃႉဢၼ်သုတ်းသဵင်ႈၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ