လူင်ပွင်ၸိုင်ႈမိူင်းႁူမ်ႈတုမ်မၢၼ်ႈ ဢွၵ်ႇပိူင်မႂ်ႇ တႃႇရူတ်ႉၵႃး ဢၼ်တေၶဝ်ႈမိူင်းႁူမ်ႈတုမ်မၢၼ်ႈ တင်းသဵင်ႈၵူင်းႁေႃႈ Steer ing wheel ၾၢႆႇသၢႆႉၵူၺ်း ၸင်ႇၼမ်းၶဝ်ႈမိူင်းလႆႈ။ ပိူဝ်ႈႁႂ်ႈၵိုင်ႇလႅပ်ႈၵၼ်တင်း ငဝ်းလၢႆးသဵၼ်ႈတႃႈသၢႆတၢင်း ၼႂ်းမိူင်းႁူမ်ႈတုမ်မၢၼ်ႈ။
ဝၼ်းတီႈ 29/10/2018 ႁွင်ႈၵၢၼ်ၶၢဝ်ႇ Xin Hua ပိုၼ်ၽၢဝ်ႇလွင်ႈၵၢၼ်ဢဝ်ၵႃးၶဝ်ႈမိူင်းဝႃႈ တေလႆႈဢဝ်ၵႃးဢၼ်မီးၽူင်ႊမႃႊလႆႊ ၾၢႆႇသၢႆႉၵူၺ်း ယွၼ်ႉဝႃႈမၼ်းၵိုင်ႇလႅပ်ႈၵၼ်တင်းသဵၼ်ႈတႃႈသၢႆတၢင်းၼႂ်းမိူင်းႁူမ်ႈတုမ်။ ၵႃးဢၼ်ၸႂ်ႉသုၼ်ႇတူဝ် တေလႆႈပဵၼ်ရူတ်ႉဢၼ်ႁဵတ်းဢွၵ်ႇပီ 2016 မႃးၼႆႉ ၊ တွၼ်ႈတႃႇရူတ်ႉ Bus ရူတ်ႉတေႃႉတၢင်ႇၵူၼ်းၸိူဝ်းၼႆႉသမ်ႉတေလႆႈပဵၼ်ဢၼ်ႁဵတ်းဢွၵ်ႇပီ 2015 မႃးၼႆႉ ဢၼ်ၵဝ်ႇၵႄႇလိူဝ်ၼၼ်ႉ တေဢမ်ႇပၼ်ၼမ်းၶဝ်ႈမိူင်းထႅင်ႈယဝ်ႉ။ မိူၼ်ၼင်ႇၵႃးၶႄၾႆး၊ ၵႃးႁူင်းယႃ၊ ၵႃးႁဵတ်းၵၢၼ်ၵေႃႇသၢင်ႈၵူႈၸိူဝ်းၸိူဝ်း ဢၼ်ဢႃယုဢမ်ႇထိုင် 15 ပီ ၼၼ်ႉဢဝ်ၶဝ်ႈမိူင်းလႆႈ။
ၸၢႆးမိၼ်ႉ ၵူၼ်းတႃႈၵုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၶၢဝ်ႇငၢဝ်းပၵ်းပိူင်ၸိူင်ႉၼႆၼႆႉ လႆႈငိၼ်းမႃးႁိုင်ၼႃႇ ယဝ်ႉၶႃႈ ၵူၺ်းၵႃႈပႆႇႁၼ်လႅၵ်ႈလၢႆႈသင်မႃးသေပွၵ်ႈ ၸိူင်ႉႁိုဝ်ၵေႃႈယဝ်ႉ ႁဝ်းၶႃႈထုၵ်ႇလီ တိတ်းတၢမ်ၸွမ်းၶၢဝ်ႇငၢဝ်းယူႇတႃႇသေႇဢေႃႈ ” ဝႃႈၼႆ။
ၵူၼ်းပိုၼ်ႉတီႈလၢတ်ႈဝႃႈ ၵူၼ်းမိူင်းၵမ်ႈပႃႈၼမ် ဢမ်ႇပႆႇတူဝ်ႈတၼ်းတႃႇသိုဝ်ႉၵႃးမႂ်ႇလႆႈ ယွၼ်ႉၵႃႈၶၼ် ယႂ်ႇ ၊မၢင်ၸိူဝ်း ၽွၼ်ႇၸၢႆႇ၊ မၢင်ၸိူဝ်းသိုဝ်ႉရူတ်ႉၵႃးမိုဝ်းသွင် ၵမ်ႈၼမ်ပွတ်းဝဵင်းဢွၼ်ႇတႄႉ ၸႂ်ႉၵႃးဢမ်ႇ မီးၶွၼ်ႇၵူၺ်းၼႆယဝ်ႉ။
ပၵ်းပိူင်ၵၢၼ်ဢဝ်ၵႃးမႂ်ႇၶဝ်ႈမိူင်း တေတႄႇၼႂ်းလိူၼ် January 2019 ၼႆႉၵႂႃႇ တေၸၢင်ႈမီး ၽွၼ်းတုမ်ႉ ယွၼ်ႈတေႃႇ သုၼ်ၶၢႆၵႃးမိုဝ်း2သေ ႁၢၼ်ႉၶၢႆၵႃးမိုဝ်း 2 ၸၢင်ႈပိၵ်ႉပႅတ်ႈၼႂ်းပီ 2019 ။ ယွၼ်ႉပိူဝ်ႈဝႃႈၵႃး မိုဝ်းသွင်ဢၼ်မီးၶၢႆယူႇတီႈ မိူင်းႁူမ်ႈတုမ်ၵမ်ႈၼမ် မီးၵူင်းႁေႃႈၾၢႆႇၶႂႃၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ