ႁူဝ်သိူဝ်လႄႈ သိူဝ်ၽိူၵ်ႇ ၶႅင်ႇၵၼ်ႁႃသဵင်လၢႆးၽႂ်လၢႆးမၼ်းလဵပ်ႈ ဝဵင်းလၢႆးၶႃႈ

ပၢင်သူၼ်းတုမ်ႁႃသဵင် တႃႇဢွင်ႇပေႉပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်းၼႂ်းႁူဝ်လိူၼ်ၼူဝ်ႊဝႅမ်ႊၿိူဝ်ႊ 2018 တေမႃးၼႆႉ ႁူဝ်သိူဝ်လႄႈ သိူဝ်ၽိူၵ်ႇ ၶႅင်ႇၵၼ်ႁႃသဵင် လဵပ်ႈဝဵင်းလၢႆးၶႃႈ ဝႃႈၼႆ။

ဝၼ်းတီႈ 01/11/2018 ယၢမ်းၵၢင်ၶိုၼ်း 12 မူင်းၼၼ်ႉ ပဵၼ်ဝၼ်းလိုၼ်းသုတ်းႁႃသဵင် တႃႇပၢင်လိူၵ်ႈတင်ႈသွမ်ႈ၊ ၼေႃႇၽူႈတႅၼ်းသၽႃးပႃႇတီႇႁူဝ်သိူဝ် SNLD တင်း ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ SNDP ၶႅင်ႇၵၼ်လူင်းႁႃသဵင် လၢႆးၽႂ်လၢႆးမၼ်း တႃႇဢွင်ႇပေႉပၢင်လိူၵ်ႈတင်ႈသွမ်ႈ ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၵူၼ်းၼုမ်ႇ ၸႄႈဝဵင်းလၢႆးၶႃႈ ၵေႃႉၼိုင်ႈ ထတ်းသၢင် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈၵူၼ်းၼုမ်ႇ လမ်းတူၺ်း တႄႉၵေႃႈ ပဵၼ်ၵေႃႉလၢႆးလၢႆး။ ပေႃးမႃးထတ်းတူၺ်းတႄႉ သဵင်ႁူဝ်သိူဝ်ၶႂ်ႈၼမ်ဝႆႉ။ လွင်ႈၼႆႉတႄႉ ပႃႇတီႇလႂ်တေပေႉ ဢၼ်ဝႃႈၼၼ်ႉ ပႂ်ႉတူၺ်းမိူဝ်ႈဝၼ်းတွတ်ႈၶႅပ်းၵၢင်ၸႂ်ၼၼ်ႉ ဝႃႈၽႂ်တေလႆႈသဵင်ၼမ်” ဝႃႈၼႆ။

သိုပ်ႇလၢတ်ႈထႅင်ႈဝႃႈ ပႃႇတီႇႁူဝ်သိူဝ်တႄႉ လူင်းႁူပ်ႉၵူၼ်းမိူင်းဢိူင်ႇယဝ်ႉဢိူင်ႇ ထွမ်ႇသဵင်ၵၢင်ၸႂ်ၵူၼ်းမိူင်း၊ မိူဝ်ႈၼႆႉ ဝၼ်းတီႈ 30 သမ်ႉ လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ ဢွၼ်ႁူဝ်ဢဝ်ဢူတ်ႇဢူဝ်သေ ပၼ်ႇဝဵင်း ႁူၺ်းသူၼ်း တႃႇလႆႈၶႅပ်းၵၢင်ၸႂ် ၸိူင်ႉၼၼ်ဢေႃႈ။ ပႃႇတီႇၼူၵ်ႉယုင်းၵေႃႈ လူင်းႁႃသဵင် ဢမ်ႇပေႃးႁႅင်းၵႃႈႁိုဝ် လႆႈႁၼ်ၶဝ်ၸႅၵ်ႇပႃး ဝႂ်ပိဝ်ၵႂႃႇၸိူင်ႉၼၼ် ဝႃႈၼႆ။

ၼေႃႇၽူႈတႅၼ်းသၽႃးဢၼ်တေၶဝ်ႈၶႅင်ႇၼႂ်းၸႄႈဝဵင်းလၢႆးၶႃႈ မိူၼ်ၼင်ႇ ၸၢႆးဢူၵ်ႉၵႃႇ(ႁွင်ႉ) ၸၢႆးၵွင်ၶမ်း ပႃႇတီႇ ႁူဝ်သိူဝ်၊ ၸၢႆးသူၺ်ႇသႅင်း ပႃႇတီႇသိူဝ်ၽိူၵ်ႇလႄႈ ၸၢႆးဢွင်ႇထုၼ်းလေး ပႃႇတီႇၼူၵ်ႉယုင်း ၸိူဝ်းၼႆႉ။

ပေႃးထိုင်မႃး ၼႂ်းဝၼ်းတီႈ 03/11/2018 ၼႆႉ ယူႇတီႈၶွမ်ႊမတီႊပၢင်လိူၵ်ႈတင်ႈမိူင်းႁူမ်ႈတုမ် တေ ၸတ်းႁဵတ်းပၢင် လိူၵ်ႈတင်ႈသွမ်ႈ ဢၼ်လုတ်ႈႁၢမ်းပဝ်ႇ တီႈၼင်ႈၽူႈတႅၼ်းသၽႃး 13 တီႈၼင်ႈ။ ၼႂ်းၼၼ်ႉ ပႃးတီႈၼင်ႈၽူႈတႅၼ်း သၽႃး ၵူၼ်းမိူင်း ၸႄႈဝဵင်းလၢႆးၶႃႈၼိုင်ႈတီႈၼင်ႈလႄႈ ၽွင်းလူင်ၾၢႆႇၸၢဝ်းၶိူဝ်းတႆး ၼႂ်းၸႄႈဝဵင်းတိူင်းလူင်တႃႈလိူဝ်ႇ (မၼ်းတလေး) ၼိုင်ႈတီႈၼင်ႇ ဝႃႈၼႆ။

ၼႂ်းပၢင်လိူၵ်ႈတင်ႈသွမ်ႈၼႆႉ တင်းမူတ်းၼေႃႇၽူႈတႅၼ်းသၽႃးဢၼ်တေၶဝ်ႈၶႅင်ႇၵၼ် မီး 69 ၵေႃႉ ဝႃႈၼႆ။

ၼႂ်းၸႄႈဝဵင်းလၢႆးၶႃႈပႃႇတီႇ ဢၼ်ဢွၵ်ႇၸိုဝ်ႈဝႃႈတၢင်တူဝ်ၶွင်ၵူၼ်းၶိူဝ်းမၢၼ်ႈ မီးသွင်ပႃႇတီႇသေတႃႉ မီးပႃႇတီႇၼူၵ်ႉ ယုင်း ၶွင်လူင်ပွင်ၸိုင်ႈ။ ယၢမ်းလဵဝ်ၶဝ်ႈၶႅင်ႇ 1 ပႃႇတီႇသၢင်ႇသီႈၶွင်သိုၵ်းမၢၼ်ႈတႄႉ ဢမ်ႇၶဝ်ႈၶႅင်ႇ။