မေႃၵႂၢမ်းတႆးပၢၼ်မႂ်ႇၵေႃႉၼိုင်ႈ ယူႇမိူင်းၵွၵ်ႇ ႁွင်ႉၵႂၢမ်း Dr.ၸၢႆးၶမ်းလဵၵ်း လူၺ်ႈဢမ်ႇယွၼ်းၶႂၢင်ႉလႄႈ သင်ဢမ်ႇယွၼ်းၼွမ်းတၢင်းၽိတ်း တေၺႃးၸုမ်းၸဝ်ႈၶွင်ၽဵင်းၵႂၢမ်း ၸႅင်ႈၵႂၢမ်း တီႈလုမ်းမိူင်းႁူမ်ႈတုမ်မၢၼ်ႈ။
မေႃၵႂၢမ်းတႆးပၢၼ်မႂ်ႇ ၸိုဝ်ႈႁွင်ႉၸၢႆးတိုၼ်းလီ ၼမ်ႉတွင်းသႂ် ယူႇမိူင်းၵွၵ်ႇၼၼ်ႉဢဝ်ၵႂၢမ်း Dr.ၸၢႆးၶမ်းလဵၵ်း ၸိုဝ်ႈၵႂၢမ်း “ ၶိုၼ်းလႆႈၵိူတ်ႇမႃးပုၼ်ႈတၢင်းႁၵ်ႉ” ဢၼ်ဝႃႈၼၼ်ႉ ႁွင်ႉၶိုၼ်းလူၺ်ႈဢမ်ႇယွၼ်းၶႂၢင်ႉၼႆလႄႈ Dr.ၼွႆႉၼွႆႉတိၼ်ႇ ၵေႃႉပဵၼ်မေးၼၢင်း Dr.ၸၢႆးၶမ်းလဵၵ်း ပိုတ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ သင်ၸၢႆးတိုၼ်းလီ ဢမ်ႇၼွမ်းတၢင်းၽိတ်းတေၺႃး ၸုမ်းၸဝ်ႈၶွင်ၽဵင်းၵႂၢမ်းမိူင်းမၢၼ်ႈၸႅင်ႈၵႂၢမ်းၸွႆးတြႃး ဝႃႈၼႆ။
“မၼ်းလူဝ်ႇလႆႈတွင်ႈပၢၼ်ႇတီႈၽိုၼ်ၶၢဝ်ႇၶွင်လူင်ပွင်ၸိုင်ႈမၢၼ်ႈပဵၼ်တၢင်းၵၢၼ်ဢိူဝ်ႈ၊ ပႃႈၶဝ်တႄႉ ဢမ်ႇၸွႆႈတြႃးမၼ်းလေႃႇ – ၸုမ်းၸဝ်ႈၶွင်ၽဵင်းၵႂၢမ်းမိူင်းမၢၼ်ႈ မြန်မာနိုင်ငံတေး သီချင်းမူပိုင်ရှင် များအသင်း (Myanmar Performance rights organization (Myanmar PRO) ၼၼ်ႉ တေၸွႆးတြႃးမၼ်းဢိူဝ်ႈ” Dr.ၼွႆႉၼွႆႉတိၼ်ႇ လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈၼင်ႇၼႆ။
ၸၢႆးတိုၼ်းလီ ၽူႈႁွင်ႉၵႂၢမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၶႃႈဢမ်ႇလႆႈတႅမ်ႈသေႁွင်ႉ ၶႃႈႁွင်ႉၵႂႃႇၸွမ်းၼႂ်း Smule ၵူၺ်းၶႃႈ ဢမ်ႇလႆႈတင်ႈၸႂ်သေႁွင်ႉ ၊ ဢမ်ႇဝူၼ်ႉတေယႃႉၼိူဝ်ႉၵႂၢမ်းၽႂ်ၶႃႈ၊ ဢၼ်ပဵၼ် ၵႂႃႇၼၼ်ႉၵေႃႈ ၶႃႈႁဝ်းယွမ်းၼွမ်းယူႇဢေႃႈ၊ သိုပ်ႇၼႆႉၵႂႃႇတေတိူဝ်းဝႆႉသတိ လွင်ႈဢၼ်ပဵၼ်ၵႂႃႇၼႆႉၵေႃႈ ဝူၼ်ႉဝႃႈတေပဵၼ်တွၼ်ႈသွၼ် တွၼ်ႈတႃႇၽူႈႁွင် ႉ ၵႂၢမ်းပၢၼ်မႂ်ႇသိုပ်ႇၵႂႃႇယူႇ ယွၼ်းၼွမ်းထိုင် ၶူးၸၢႆးၶမ်းလဵၵ်းယႂ်ႇယႂ်ႇၼမ်ၼမ်ၶႃႈ ” ဝႃႈၼႆ။
ၽဵင်းၵႂၢမ်း Dr.ၸၢႆးၶမ်းလဵၵ်း ဢၼ်မီးၸိုဝ်ႈ “ ၶိုၼ်းလႆႈၵိူတ်ႇမႃးပုၼ်ႈတၢင်းႁၵ်ႉ” ဢၼ်ဝႃႈၼၼ်ႉ မီးၵႂၢမ်းတႆးၵႂၢမ်းမၢၼ်ႈ တင်း သွင်ၽႃသႃ ၸၢႆးတိုၼ်းလီသမ်ႉ ႁွင်ႉၾၢႆႇတႆး လူၺ်ႈၶေႃႈၵႂၢမ်းတႆး လၢႆးမႂ်ႇ၊ ၾၢႆႇDr.ၼွႆႉၼွႆႉတိၼ်ႇယင်းဝႃႈမၼ်းၸၢႆးတွႆႇႁွင်ႉမႂ်ႇမႂ်ႇၶိုၼ်းတီႈဝဵင်းသီႇပေႃႉသေ ဢဝ်တၢင်ႇႁႃငိုၼ်းၼိူဝ် Youtube ဝႃႈၼႆ။
“ ၶႃႈႁဝ်းဢမ်ႇတႅမ်ႈသေႁွင်ႉ လႃလီႁွင်ႉၵႂႃႇၾၢႆႇတႆးၸွမ်းသဵင်တွႆႇၵႂႃႇႁဵတ်းၼၼ်ၵူၺ်း ၊ မိူဝ်ႈၶႃႈႁွင်ႉၼၼ်ႉ ၶႃႈသမ်ႉ ဢူၵ်းႁၵ်းၸွမ်းသၢဝ်ၵေႃႉၼိုင်ႈ ။ ၵႂၢမ်းဢၼ်ၶႃႈႁွင်ႉပိူၼ်ႈသမ်ႉဢဝ်ၵႂႃႇႁဵတ်း MP 4 သေတၢင်ႇ လွင်ႈၼၼ်ႉၶႃႈၵေႃႈဢမ်ႇလႆႈႁူႉၸွမ်း ယွမ်းၼွမ်းယႂ်ႇၼမ်ၶႃႈ ” ဝႃႈၼႆ။
17/08/2018 ၼၼ်ႉ မေႃႁွင်ႉၵႂၢမ်းၸၢႆးတိုၼ်းလီ ႁွင်ႉလဵၼ်ႈၽဵင်းၵႂၢမ်းၶိုၼ်းလႆႈၵိူတ်ႇမႃးပုၼ်ႈတၢင်းႁၵ်ႉ ၼႂ်း App Smule သေ မီးၵူၼ်းဢဝ်ၶရိပ်ႊမၼ်းၸၢႆးသိုပ်ႇပိုၼ်ၽႄႈလႄႈ ႁဵတ်းႁႂ်ႈၸဝ်ႈၽဵင်းၵႂၢမ်း ဢမ်ႇႁၢၼ်ႉၸႂ် လႄႈမၼ်းၸၢႆးလႆႈ တႅမ်ႈလိၵ်ႈပိုၼ်ၽၢဝ်ႇဢွၵ်ႇသုၼ်ႇတူဝ်ယွမ်းၼွမ်းလွင်ႈလႆႈႁဵတ်းၽိတ်း။
မိူင်းႁူမ်ႈတုမ်ပတ်းပိုၼ်ႉ ပႃးၸဵမ်မိူင်းတႆး တႆးႁွတ်ႈမိူင်းထႆးၸိူဝ်းၼႆႉ ဢမ်ႇပေႃးႁူႉၵႃႈၶၼ် ၽူႈပဵၼ်ၸဝ်ႈ ၶွင်ၽဵင်းၵႂၢမ်း ပေႃးၽဵင်းၵႂၢမ်းမႂ်ႇမႂ်ႇဢွၵ်ႇမႃး ဢတ်းဢွၵ်ႇၽိုၼ်မိူၼ်သေၶၢႆၵိၼ် ႁဵတ်းပၢႆးမၢၵ်ႈမီးသုၼ်ႇတူဝ်၊ လွင်ႈဢမ်ႇဢုပ်ႇဢမ်ႇလၢတ်ႈ ဢမ်ႇယွၼ်းၶႂၢင်ႉသေ ၵဵပ်းႁွင်ႉၵႂၢမ်းၵေႃႈၵႆႉမီး။ မေႃၵႂၢမ်းပၢၼ်မႂ်ႇၸၢႆး တိုၼ်းလီတႄႉ လၢတ်ႈဝႃႈ လွင်ႈၼႆႉလီဢဝ်ပဵၼ်တွၼ်ႈသွၼ်သေပဵၼ်ပႆႇၼပ်ႉယမ်ၵၼ်ၵႂႃႇ ဝႃႈၼႆ။
