ၸုမ်းၵူၼ်းၼုမ်ႇတႆးမိူင်းၶိူဝ်း ႁူမ်ႈၵၼ်ၸတ်းႁဵတ်း ပၢင်သွၼ်လၢႆးႁဵတ်းၶိူင်ႈၸႂ်ႉတိုဝ်း ၸွမ်းမုင်ႉႁေႃႁိူၼ်းလၢႆယၢင်ႇ ႁႂ်ႈပဵၼ်  ၶူဝ်ၶွင်ၸႂ်ႉလႆႈၼႂ်းႁိူၼ်း ႁိုဝ်ဢမ်ႇၼၼ်ႁဵတ်းပဵၼ်ပၢႆးမၢၵ်ႈမီးသေသူင်ႇၶၢႆဝႃႈၼႆ။

ဝၼ်းတီႈ 29/10/2018 ၸုမ်းၵူၼ်းၼုမ်ႇတႆးမိူင်းၶိူဝ်း ႁူမ်ႈၵၼ်ၸတ်းႁဵတ်းပၢင်သွၼ် လၢႆးမေႃတိၼ်မေႃမိုဝ်း တီႈမိူင်းၶိူဝ်း ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၵူၼ်းၼုမ်ႇၽူႈသူၼ်ၸႂ် 30 ပၢႆ ၾိုၵ်းသွၼ်လၢႆးႁဵတ်း ၼမ်ႉယႃလၢင်ႉဝၢၼ်ႇ၊ ၼမ်ႉယႃသၢႆႇႁူဝ်၊ ၼမ်ႉယႃသၵ်ႉၶူဝ်း၊ ၼမ်ႉယႃသုၵ်ႈမိုဝ်း ၼမ်ႉယႃ(သပ်ႉပျႃႇ)ၵွၼ်ႈသီ – ၸဵမ်ၸိူဝ်းၼႆႉလၢႆလၢႆယၢင်ႇ။

ၼႂ်းပၢင်ၼႆႉပူင်သွၼ်ပၼ် 2 လၢႆး လၢႆး Chemicalလႄႈ လၢႆးသၽႃႇဝ ဢၼ်ဢဝ်မၢၵ်ႇမႆႉ၊ ၼင်မႆႉ၊ မႂ်မႆႉ မိူၼ်ၼင်ႇ မၢၵ်ႇၵႅင်း၊ မၢၵ်ႇဢိုၼ်ႈ၊ မၢၵ်ႇၽႃႈ၊ မၢၵ်ႇၵဵင် ၸိူဝ်းၼႆႉ။

ၸၢႆးမၢဝ်းႁၢၼ် ႁူဝ်ၼႃႈၵူၼ်းၼုမ်ႇမိူင်းၶိူဝ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ် ႁဝ်းၶႃႈၸတ်းႁဵတ်း ၼႆႉ ႁႂ်ႈၵူၼ်းၼုမ်ႇႁဝ်းမေႃဢဝ်သၽႃဝ ၸႂ်ႉႁႂ်ႈပဵၼ်ၽွၼ်းလီ၊ ႁႂ်ႈၵူၼ်းၼုမ်ႇၼႂ်းပိုၼ်ႉ တီႈမီးၵၢၼ်၊ သၢၵ်ႇသႃႇငိုၼ်းတွင်း၊ ႁႂ်ႈမေႃႁဵတ်းဢွၵ်ႇၶူဝ်းၶွင် ၸႂ်ႉတိုဝ်းႁင်းၵူၺ်း ႁဵတ်းၶၢႆၵေႃႈလႆႈငိုၼ်းၶဝ်ႈ ၵွၼ်ႇဢေႃႈပေႃးၶတ်းၸႂ်” ဝႃႈၼႆ။

ၸုမ်းၵူၼ်းၼုမ်ႇမိူင်းၶိူဝ်းၼႆႉ ၼင်ႇႁိုဝ်ၵူၼ်းၼုမ်ႇၼႂ်းပိုၼ်ႉတီႈတေမီးၼမ်ႉၵတ်ႉတၢင်းၶႅၼ်ႇလႄႈ မေႃးယူႇသဝ်းၵိၼ်သၢင်ႈပူၵ်းပွင်ၼႂ်းပိုၼ်ႉတီႈၼႆသေ ၸတ်းႁဵတ်းပၢင်ယုၵ်ႉမုၼ်း ၼမ်ႉၵတ်ႉၵူၼ်း ၼုမ်ႇမႃးလၢႆမိုဝ်ႉလၢႆၵမ်း ။