ၸုမ်းဢူၺ်းလီပွတ်းႁွင်ႇ တင်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းၸႄႈဝဵင်းၼမ်ႉတူႈတၢင်းပွတ်းမိူင်းယဵၼ် ပၢႆႈ ထိုင်ဝဵင်းလႃႈသဵဝ်ႈ ၼပ်ႉပၢၵ်ႇ။
ဝၼ်းတီႈ 26/10/2018 ယၢမ်းႁူဝ်ၶမ်ႈ ၵူၼ်းဝၢၼ်ႈၼႃးႁႃႈ၊ ဝၢၼ်ႈပၢင်ႁုင်းလႄႈ ဝၢၼ်ႈပဵင်း ၼႂ်းထုင်ႉမိူင်းယဵၼ် ႁူဝ် ၵူၼ်း 510 ၵေႃႉ ပၢႆႈၽေးသိုၵ်းမႃးသွၼ်ႈဝႆႉတီႈ ဢီႇၼၢႆး၊ ဢၼ်ပၢႆႈထိုင်ဝိႁၢရ်မၢၼ်ႈသူႈ ဝဵင်းလႃႈသဵဝ်ႈၵေႃႈ ၼပ်ႉႁူဝ် ပၢၵ်ႇၵေႃႉ ဝႃႈၼႆ။
ၼၢင်းတၢၼ်းလူႇ ၵူၼ်းပၢႆႈၽေးသိုၵ်း ဝၢၼ်ႈၼႃးႁႃႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈငိၼ်းသဵင်ၵွင်ႈတႅၵ်ႇႁိမ်း ဝၢၼ်ႈႁဝ်းသေ ဢွၼ်ၵၼ်ၵူဝ်ႁႄတိုၼ်ႇ ၵၼ်ၶႃႈဢေႃႈ။ တီႈႁိူၼ်းၶႃႈၶဝ် ဢွၼ်ၵၼ်ပၢႆႈမႃးမူတ်း ဢၼ် ၵိုတ်းဝႆႉတႄႉ ပဵၼ်ပေႃႈၵူၺ်းၶႃႈ။ ႁဝ်းၶႃႈပၢႆႈမႃး တၼ်းလႆႈၶူဝ်းၼုင်ႈမႃးဢိတ်းဢွတ်းၵူၺ်းၶႃႈ။ ဢမ်ႇတၼ်းလႆႈသင်ၶႃႈ” ဝႃႈၼႆ။
ၵူၼ်းပၢႆႈၽေးသိုၵ်းဢၼ်ပၢႆႈထိုင်လႃႈသဵဝ်ႈ ပဵၼ်ၵူၼ်းဝၢၼ်ႈၼႂ်းဢိူင်ႇဢီႇၼၢႆး ၵူၼ်းဝၢၼ်ႈ ဝၢၼ်ႈပဵင်း၊ ဝၢၼ်ႈ 13 လၵ်း၊ ဝၢၼ်ႈ 15 လၵ်း၊ ဝၢၼ်ႈၼႃးႁႃႈ၊ ဝၢၼ်ႈပၢင်ႁုင်း ၶဝ်ၸိူဝ်းၼႆႉ ပၢႆႈယူႇဝႆႉတီႈဝိႁၢရ်မၢၼ်ႈသူႈ ဝဵင်းလႃႈသဵဝ်ႈ။
ၼႂ်းဝၼ်းဢွၵ်ႇဝႃႇ ဝၼ်းတီႈ 24 ပူၼ်ႉမႃးၼႆႉ သိုၵ်းဢူၺ်းလီပွတ်းႁွင်ႇ တင်းတပ်ႉသိုၵ်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းထုင်ႉမိူင်းယဵၼ် ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ၊ ဝၼ်းၼၼ်ႉၵေႃႈ ၵူၼ်းဝၢၼ်ႈဢမ်ႇလႆႈၶိုၼ်ႈ ၵျွင်းလွင်းမွၵ်ႇ။
ဢၼ်သွင်ၾၢႆႇယိုဝ်းၵၼ် ၼႂ်းထုင်ႉမိူင်းယဵၼ်ၼၼ်ႉတႄႉ ႁိမ်းႁွမ်းဝၢၼ်ႈ ၼမ်ႉၵႅင်း၊ ၵွင်းၵေးလႄႈ ႁိမ်းတိၼ် လွႆၵုင်း ၽြႃး။ ယွၼ်ႉပၢင်တိုၵ်းလႄႈ ၵူၼ်းဝၢၼ်ႈၼႂ်းထုင်ႉမိူင်းယဵၼ် ၸိူဝ်းပဵၼ်ၵူၼ်းဝၢၼ်ႈၼွင်ၵႂၢင်၊ ၼမ်ႉတဝ်း၊ ၼွင်သၢၼ်း၊ ဝၢၼ်ႈတီး၊ ၵွင်းၵေး ၸိူဝ်းၼႆႉ ဢွၼ်ၵၼ်ပၢႆႈၽေးသိုၵ်း မႃးသွၼ်ႈသဝ်းဝႆႉတီႈဝတ်ႉမုင်ႈသႃႇ ဝဵင်းၼမ်ႉတူႈ ႁိမ်းၸမ် ႁဵင်။ မိူဝ်ႈဝၼ်းတီႈ 26 ၼၼ်ႉ ၵူၼ်းပၢႆႈၽေးၵမ်ႈၽွင်ႈ ပွၵ်ႈမိူဝ်းၶိုၼ်း ယွၼ်ႉလူဝ်ႇပၢတ်ႇၶဝ်ႈ ဝႃႈၼႆ။
