ၾူၼ်တူၵ်းႁၢဝ်ႈႁႅင်းထပ်းၵၼ် လၢႆဝၼ်းလႄႈ ၼမ်ႉတူၼ်လႆၼွင်းလူၼ်ႉၾင်ႇ လုပ်ႇတူင်ႈႁႆႈၼႃး ၵူၼ်းမိူင်းတူၼ် လူႉသုမ်းၶဝ်ႈၼႃးတင်းၼမ်။
ဝၼ်းတီႈ 25/10/2018 ယၢမ်းၵၢင်ၶမ်ႈ 8 မူင်းပၢႆ ၼမ်ႉႁူၺ်ႈၼမ်ႉလွႆ လႆၼွင်းလူၼ်ႉၾင်ႇ ထူမ်ႈတူင်ႈ ႁႆႈၼႃးၵူၼ်းမိူင်းတူၼ် 100 ဢေႊၶိူဝ်ႊပၢႆ သူၼ်ႁႆႈၵူၼ်းမိူင်းထႅင်ႈ တင်းၼမ်လၢႆ။
ၸၢႆးသၢမ် ၸဝ်ႈၼႃး မိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ႈၼႆႉပၢတ်ႇဝႆႉယဝ်ႉ ၺႃးၼမ်ႉလုပ်ႇ လႆလွင်ႈၸွမ်း ၼမ်ႉပဵၼ်ၵေႃႇပဵၼ်ၵွင် ဢၼ်ပႆႇတၼ်းပၢတ်ႇသေ သၢႆးထူမ်ႈတဵင်တူၼ်ႈၶဝ်ႈလူမ်ႉ ၵေႃႈမီးတင်းၼမ်။ လိူဝ်ၼၼ်ႉ ၵွင်ၶဝ်ႈ/ ပုမ်ႇၶဝ်ႈ ဢၼ်ၵွင်ဝႆႉၸိူဝ်းၼၼ်ႉၵေႃႈလွင်ႈ။ သူၼ်ၽၵ်းၵၢတ်ႇ၊ ၽၵ်းၵီး၊ ၽၵ်းမီႇ၊ မၢၵ်ႇၶိူဝ် ဢၼ်ၽုၵ်ႇ သွမ်ႈဝႆႉၸွမ်းၾင်ႇၼမ်ႉတူၼ် ၼၼ်ႉၵေႃႈ ၺႃးလုပ်ႇထူမ်ႈ လူႉသုမ်းတင်းၼမ်။ မၢင်တီႈ လိၼ်သူၼ်ၵူၼ်ႇပင်းလႆ ၸွမ်းၼမ်ႉပဵၼ်ၵေႃႇပဵၼ်ၵွင် ၵေႃႈ ၼမ်” ဝႃႈၼႆ။
ၵဵဝ်ႇလူၺ်ႈလွင်ႈၼမ်ႉထူမ်ႈၼႆႉ ၸဝ်ႈႁႆႈ ၸဝ်ႈၼႃး ၼႂ်းၸႄႈဝဵင်းမိူင်းတူၼ် ပဵၼ်ၼမ်ႉႁူၼမ်ႉတႃ ၸႂ်ဢမ်ႇလီ တင်း ၼမ် ဝႃႈၼႆ။
ၸၢႆးသၢမ် လၢတ်ႈဝႃႈ “ ၼႃးၵေႃႈထူမ်ႈ၊ သူၼ်ၵေႃႈထူမ်ႈ လိူဝ်ၼၼ်ႉ ႁိူၼ်းၵေႃႈထူမ်ႈ။ ၸဝ်ႈၼႃး မၢင်ၵေႃႉ ပေႃးဢမ်ႇ ၶႂ်ႈလၢတ်ႈၵႂၢမ်းသင်ယဝ်ႉ။ ၽိူဝ်ႇလႆႈႁၼ် တူင်ႈၼႃးၸဝ်ႈၵဝ်ႇ ပဵၼ်ၼႆ၊ မၢင်ၵေႃႉ ၸႂ်ပေႃးတူၵ်း။ ၸဝ်ႈသူၼ်ၽၵ်း ၵမ်ႈ ၽွင်ႈ ပေႃးတေဢဝ်ၽၵ်းဢွၵ်ႇၶၢႆယဝ်ႉ ထႅင်ႈမွၵ်ႈ 5-6 ဝၼ်းၵူၺ်း” ဝႃႈၼႆ။
ၼွၵ်ႈလိူဝ်ၼၼ်ႉ တီႈၶူဝ်ၵၢႆႇၸူးတၢင်းဝတ်ႉၵမ်မထၢၼ်း မိူင်းတူၼ်ၵေႃႈ ၺႃးၼမ်ႉတူၼ် လုပ်ႇၼွင်းထူမ်ႈသေ လႆႈ ၵူၼ်ႇပင်းပႅတ်ႈၵႂႃႇ လင်ၼိုင်ႈ ဝႃႈၼႆ။
