ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 2 ၸုမ်း ဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၸွမ်းၵၼ်ၼၼ်ႉ သိုၵ်း PNLO တင်း RCSS ပဵၼ်ပၼ်ႁႃၵၼ် လွင်ႈၼႃႈလိၼ် ၼႂ်းၸႄႈဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်း ဝႃႈၼႆ။

တင်ႈတႄႇႁူဝ်လိူၼ်ဢွၵ်ႊထူဝ်ႊၿိူဝ်ႊ 2018 မႃးၼႆႉ တပ်ႉသိုၵ်းၸိုင်ႈတႆး RCSS တင်း သိုၵ်းပူတ်းပွႆႇၸိူဝ်ႉၸၢတ်ႈ ပဢူဝ်း PNLO ၶဵင်ႈၶႅင်ၵၢၼ်သိုၵ်းၵၼ် ၼႂ်းၸိုင်ႈတႆးပွတ်းၸၢၼ်း လၢႆဝဵင်း၊ ပဵၼ်ၼႂ်းၸႄႈဝဵင်းမိူင်းပၼ်ႇ၊ တင်းၼႂ်း ၸႄႈဝဵင်းမွၵ်ႇမႆႇ ၸိူဝ်းၼႆႉ ႁဵတ်းႁႂ်ႈသွင်ၾၢႆႇၽိူမ်ႉထႅမ်ႁႅင်းသိုၵ်းတေႃႇၵၼ်။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ လုမ်းၵပ်းသၢၼ် RCSS/SSA တီႈတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းဢမ်ႇ ၸႂ်ႈပူၼ်ႉၼႃႈတီႈ တၢင်းပွတ်းတွၼ်ႈၼၼ်ႉ မၼ်းပဵၼ်ၼႃႈတီႈသိုၵ်းႁဝ်း တူင်ႉၼိုင်ၵႂႃႇမႃးယူႇတႃႇသေႇယဝ်ႉ။ ဝၢႆးသေ ပဵၼ်ပၢင်တိုၵ်းၵၼ် တၢင်းမိူင်းပၼ်ႇၼၼ်ႉ ၶဝ်ဝႃႈ ႁဝ်းၽိူမ်ႉဢဵၼ်ႁႅင်းသိုၵ်း တၢင်းမွၵ်ႇမႆႇထႅင်ႈတိၵ်းတိၵ်း၊ လွင်ႈၼႆႉ မၼ်းဢမ်ႇၸႂ်ႈ မၼ်းပဵၼ်ၼႃႈတီႈႁဝ်းတူင်ႉၼိုင် မိူၼ်ၵဝ်ႇၵူၺ်း” ဝႃႈၼႆ။

ယူႇတီႈၶုၼ်ႇမိၼ်ႉထုၼ်း သႅၼ်းၽူႈၼမ်း သိုၵ်းပဢူဝ်း PNLO လၢတ်ႈဝႃႈ “ ပွတ်းတွၼ်ႈၼႆႉ မိူဝ်ႈ 2017 ၼၼ်ႉ သိုၵ်း ပဢူဝ်း PNLO တင်း RCSS ၼႂ်းၵႄႈသွင်ၸုမ်းၼႆႉ လႆႈပဵၼ်ပၼ်ႁႃလွင်ႈၼႃႈလိၼ်ၵၼ်သေ လႆႈၶဵင်ႈၶႅင်ၵၢၼ်သိုၵ်း ၵၼ်မႃးၵမ်းၼိုင်ႈ။ RCSS ၶဝ်ႈမႃးထႅင်ႈလႄႈ ယူႇတီႈၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်မႆႈၸႂ်ၵူဝ်ပဵၼ်ပၢင်တိုၵ်း။ ႁဝ်းၶႃႈ 2 ၸုမ်းၼႆႉ ပဵၼ်ၸုမ်းလူင်းလၢႆး မိုဝ်း NCA မိူၼ်ၵၼ် တွၼ်ႈတႃႇလွင်ႈၼႆႉ ၽူႈၼမ်းတင်းသွင်ၾၢႆႇတေၸႂ်ႉ လွင်ႈၵတ်းယဵၼ်သေ ႁူပ်ႉဢုပ်ႇဢူဝ်း ငူပ်ႉငီႉၵၼ်ၵႂႃႇ” ဝႃႈၼႆ။

ၸဝ်းသိုၵ်းၸၢႆးဢူး လၢတ်ႈဝႃႈ “ တၢင်းႁဝ်းတႄႉ ပႆႇငိၼ်းတၢင်းၶဝ်ဝႃႈႁိုဝ်မႃး၊ ဢမ်ႇၼၼ် ၶဝ်လၢတ်ႈၵႄႈတူဝ်ၶဝ်။ ပေႃး ဢမ်ႇၼၼ်ၵေႃႈ ၶဝ်ဝႃႈမႃးယူႇလႄႈ တီႈႁဝ်းပႆႇႁူႉႁႃႉၼႆၵေႃႈ မၼ်းၸၢင်ႈပဵၼ်လႆႈ၊ တၢင်းႁဝ်းတႄႉ ပႆႇလႆႈငိၼ်း” ဝႃႈၼႆ။

မိူဝ်ႈဝၼ်းတီႈ 16/10/2018 ၼၼ်ႉ သိုၵ်း PNLO တင်း RCSS/SSA ပဵၼ်ပၢင်တိုၵ်းၵၼ် တၢင်းၾၢႆႇတူၵ်း ဝၢၼ်ႈမႆႉပူၵ်ႇ ပၢင်ပီႉ ဢိူင်ႇၼႃးမွၼ် ၸႄႈဝဵင်းမိူင်းပၼ်ႇ မႃးၵမ်းၼိုင်ႈ ဝႃႈၼႆ။

ၸဝ်ႈသိုၵ်းၸၢႆးဢူး သိုပ်ႇလၢတ်ႈဝႃႈ “ လွင်ႈပၼ်ႁႃၵၼ်ၼႆႉ ၸဵမ်မိူဝ်ႈပႆႇပဵၼ်ၼၼ်ႉ ႁဝ်းတိုၼ်းလူဝ်ႇဝႄႈ ယႃႇႁႂ်ႈ မၼ်း ပဵၼ် ပေႃးပဵၼ်မႃးယဝ်ႉ ၸင်ႇၵႄႈၵမ်းလိုၼ်းၼႆႉ မၼ်းယၢပ်ႇ။ ၾႆးၼႆႉ မၼ်းလူဝ်ႇၶႄမိူဝ်ႈမၼ်းပႆႇမႆႈ ပေႃး မႆႈမႃး ယႂ်ႇၵႂႃႇယဝ်ႉ မၼ်းတေၶႄယၢပ်ႇ” ဝႃႈၼႆ။

PNLO တင်း RCSS ၼႆႉ ပဵၼ်ၸုမ်းဢၼ်လူင်းလၢႆးမိုဝ်း NCA ၼင်ႇၵၼ်။ မိူဝ်ႈပီ 2014 ၼၼ်ႉ သွင်ၸုမ်းၼႆႉ လႆႈပဵၼ်ပၢင်တိုၵ်းၵၼ်မႃး လွင်ႈၼႃႈလိၼ်ၵၼ်မႃးယဝ်ႉၵမ်းၼိုင်ႈ။ ၵဵဝ်ႇလူၺ်ႈလွင်ႈၼႆႉ ၶုၼ်ႇမိၼ်ႉထုၼ်း သႅၼ်းၽူႈ ၼမ်း PNLO တင်း ၸွမ်သိုၵ်းလူင် ယွတ်ႈသိုၵ်း RCSS သွင်ၾၢႆႇလႆႈဢုပ်ႇဢူဝ်းငူပ်ႉငီႉၵၼ်သေ တူၵ်းလူင်းလႆႈ ၸႂ်ၵၼ်ၵႂႃႇယဝ်ႉ ၵမ်းၼိုင်ႈ ဝႃႈၼႆ။