ပီၼႆႉ ပၢင်ပွႆးလိူၼ် 12 မူၼ်း(ပွႆးပွႆႇႁူင်းၾႆးမိၼ်) တီႈဝဵင်းလူင်တူၼ်ႈတီးၼႆႉ တေတိတ်းၵွင်ႈထၢႆႇ CCTV တႃႇ 50 လုၵ်ႈလႄႈ ၽိူမ်ႉဢဵၼ်ႁႅင်းၾၢႆႇႁူမ်ႇလူမ်ႈ တႃႇ 700 ၵေႃႉ ဝႃႈၼႆ။

ပၢင်ပွႆးလိူၼ် 12 မူၼ်း တီႈၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ တေၸတ်းႁဵတ်း ၼႂ်းဝၼ်းတီႈ 14-23/ 11/2018 တႃႇၶၢဝ်းတၢင်း 10 ဝၼ်း ဢွင်ႈတီႈၸတ်းႁဵတ်းသမ်ႉ တီႈၵၢင်ႇပၢင်ႇဢႃႇဝူၺ်ႇယႃႇ ဝႃႈၼႆ။

သူဝ်းထုၼ်းဝိၼ်း ၵႅမ်ပလိၵ်ႈ ၽူႈၶၢၼ်ပၢၵ်ႇၾၢႆႇႁူမ်ႇလူမ်ႈ ၸႄႈမိူင်းတႆး လၢတ်ႈဝႃႈ “ ပီၼႆႉ ဢဵၼ်ႁႅင်းၾၢႆႇႁူမ်ႇလူမ်ႈ တေၸႂ်ႉတႃႇ 700 ၵေႃႉ။ မိူဝ်ႈပီပူၼ်ႉ ဢဵၼ်ႁႅင်းၾၢႆႇႁူမ်ႇလူမ်ႈ မီး 100 ၵေႃႉၵူၺ်း။ လိူဝ်ၼၼ်ႉ တေသႂ်ႇတိတ်းထႅင်ႈ ၵွင်ႈထၢႆႇ CCTV တႃႇ 50 လုၵ်ႈ။ ၵွင်ႈထၢႆႇၼႆႉ တေသႂ်ႇတင်းၽၵ်းတူၶဝ်ႈ/ ဢွၵ်ႇ ၼႂ်းပၢင်ပွႆးသေ ယူႇတီႈၾၢႆႇ ၸဝ်ႈ ၼႃႈတီႈႁဝ်း တေပႂ်ႉတူၺ်းပႃး ၼႂ်းၵွင်ႈထၢႆႇထႅင်ႈ လွင်ႈၵူၼ်းထၢင်ႇထိူမ် ၵူၼ်းႁၢႆႉ” ဝႃႈၼႆ။

ၵဵဝ်ႇလူၺ်ႈလွင်ႈၵၢၼ်ႁူမ်ႇလူမ်ႈၼႂ်းပၢင်ပွႆးလိူၼ် 12 မူၼ်း (ပွႆးပွႆႇႁူင်းၾႆးမိၼ်) ပီၼႆႉ တေႁၢင်ႈႁႅၼ်း ၸႅၵ်ႇဝႆႉပဵၼ် 7 တွၼ်ႈ။ မိူၼ်ၼင်ႇ ႁူမ်ႇလူမ်ႈၾၢႆႇဢွင်ႈတီႈ၊ ႁူမ်ႇလူမ်ႈသဵၼ်ႈတႃႈသၢႆတၢင်း၊ ႁူမ်ႈလူမ်ႈၵူၼ်း၊ ႁူမ်ႇလူမ်ႈရူတ်ႉၵႃး/ ၶိူင်ႈ၊ ႁူမ်ႇလူမ်ႈၼႃႈလိၼ်၊ ႁူမ်ႇလူမ်ႈၽေးၵိုင်ႉၵၢင်ႉလႄႈ ႁူမ်ႇလူမ်ႈၾၢႆႇၽေးၾႆး ၸိူဝ်းၼႆႉ ဝႃႈၼႆ။

မိူဝ်ႈပီ 2017 ၼၼ်ႉ ပၢင်ပွႆးႁူင်းၾႆးမိၼ် လိူၼ် 12 မူၼ်းၼႆႉ တင်းမူတ်း ႁူင်းၾႆးဢၼ်ၶဝ်ႈၶႅင်ႇၵၼ် မီး 393 လုၵ်ႈ။ ဢၼ်ပွႆႇၵၢင်ၶိုၼ်း မီး 127 လုၵ်ႈ။ ဢၼ်ပွႆႇၵၢင်ဝၼ်းသမ်ႉ 266 လုၵ်ႈ ဝႃႈၼႆ။