သိုၵ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်းၵၼ် ၼႂ်းထုင်ႉမိူင်းယဵၼ် ႁၢဝ်ႈႁႅင်း ၵူၼ်းမိူင်း 456 ၵေႃႉ ဢွၼ်ၵၼ်ပၢႆႈၶဝ်ႈၼႂ်းဝဵင်းၼမ်ႉတူႈ ဝႃႈၼႆ။

ဝၼ်းတီႈ 24/10/2018 ၵူၼ်းဝၢၼ်ႈမိူင်းယဵၼ်၊ ၼွင်ၵႂၢင်၊ ၼမ်ႉတဝ်း၊ ၼွင်သၢၼ်း၊ ဝၢၼ်ႈတီး၊ ၵွင်းၵေး ၸိူဝ်းၼႆႉ ဢွၼ်ၵၼ် ပၢႆႈၽေးသိုၵ်းမႃးသွၼ်ႈသဝ်းဝႆႉတီႈ ဝတ်ႉ/ၵျွင်းမုင်ႈသႃႇ(ရွှေမြင်သာကျောင်း) ၸႄႈဝဵင်းၼမ်ႉတူႈ ၸႄႈ တွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ယွၼ်ႉသိုၵ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ၶွမ်ႊမတီႊ ၸုမ်းၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈ ဝႃႈ “ မိူဝ်ႈဝႃး ဝၼ်းတီႈ 24 ၵူၼ်းပၢႆႈၽေးသိုၵ်း တၢင်းထုင်ႉမိူင်းယဵၼ် ပၢႆႈႁွတ်ႈၽႅဝ်မႃး ၼႂ်းၼမ်ႉတူႈ 456 ၵေႃႉ။ ၵူၼ်းမိူင်းဢၼ်ပၢႆႈဢွၵ်ႇမႃးသမ်ႉ ဝၢၼ်ႈမိူင်းယဵၼ်၊ ၼွင်ၵႂၢင်၊ ၼမ်ႉတဝ်း၊ ၼွင်သၢၼ်း၊ ဝၢၼ်ႈတီး၊ ၵွင်းၵေး ၸိူဝ်းၼႆႉ” ဝႃႈၼႆ။

မိူဝ်ႈဝၼ်းတီႈ 24 ၼႂ်းဝၼ်းဢွၵ်ႇဝႃႇသႃၼၼ်ႉ သိုၵ်းဢူၺ်းလီ ပွတ်းႁွင်ႇတင်း သိုၵ်း RCSS ပဵၼ်ပၢင်တိုၵ်းၵၼ် ၼႂ်း ထုင်ႉမိူင်းယဵၼ် 3 တီႈ။ မိူၼ်ၼင်ႇ ၼမ်ႉၵႅင်း၊ ၵွင်းၵေး လႄႈ ႁိမ်းတိၼ်လွႆၵုင်းၽြႃး ၸဵမ်ၸိူဝ်းၼႆႉ။

ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်ဝႆႉတီႈ ဝတ်ႉမုင်ႈသႃႇ ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်း တင်း 3 တီႈ ယိုဝ်းၵၼ်ႁၢဝ်ႈႁႅင်းဝႆႉဢေႃႈ။ ပၢင်တိုၵ်းထွင်ႉထွင်ႉထႅင်ႉထႅင်ႉၵေႃႈပဵၼ် လၢႆလၢႆတီႈ။ ၾၢႆႇၶူဝ်းလၢႆး လူင်း ၶိုၼ်းတၢင်းဝၢၼ်ႈပၢင်ႇလႄႈ သဵင်ၵွင်ႈယဵၼ်ၵႂႃႇ။ တေႃႈလဵဝ် ၵူၼ်းဝၢၼ်ႈပၢင်ႇၶဝ်ၵေႃႈ တိုၵ်ႉဢွၼ်ၵၼ်ႁၢင်ႈႁႅၼ်း တႃႇတေပၢႆႈ” ဝႃႈၼႆ။

ၵူၼ်းမိူင်းဢၼ်ပၢႆႈၽေးမႃးသွၼ်ႈဝႆႉတီႈ ဝတ်ႉ/ ၵျွင်းမုင်ႈသႃႇသမ်ႉ ၵူၼ်းဝၢၼ်ႈမိူင်းယဵၼ် လင်ႁိူၼ်း 38 လင်၊ ၸၢႆး 53 ၵေႃႉ၊ ယိင်း 90 ၵေႃႉ ႁူမ်ႈ 143 ၵေႃႉ။ ၵူၼ်းဝၢၼ်ႈၼွင်ၵႂၢင် လင်ႁိူၼ်း 15 လင်၊ ၸၢႆး 26 ၵေႃႉ၊ ယိင်း 32 ၵေႃႉ ႁူမ်ႈ 58 ၵေႃႉ။ ဝၢၼ်ႈၼမ်ႉတဝ်း လင်ႁိူၼ်း 8 လင်၊ ၸၢႆး 15 ၵေႃႉ။ ယိင်း 29 ၵေႃႉ ႁူမ်ႈ 44 ၵေႃႉ။ ဝၢၼ်ႈၼွင်သၢၼ်း လင်ႁိူၼ်း 34 လင်၊ ၸၢႆး 50 ၵေႃႉ၊ ယိင်း 92 ၵေႃႉ ႁူမ်ႈ 143 ၵေႃႉ၊ ဝၢၼ်ႈတီး လင်ႁိူၼ်း 13 လင်၊ ၸၢႆး 13 ၵေႃႉ ယိင်း 30 ၵေႃႉ ႁူမ်ႈ 43 ၵေႃႉ။ ဝၢၼ်ႈၵွင်းၵေး လင်ႁိူၼ်း 8 လင်၊ ၸၢႆး 12 ၵေႃႉ၊ ယိင်း 14 ၵေႃႉ ႁူမ်ႈ 26 ၵေႃႉ။ တင်းမူတ်းႁူမ်ႈၵၼ် ၽူႈၸၢႆး 169 ၵေႃႉ၊ ၽူႈယိင်း 287 ၵေႃႉ ႁူမ်ႈ 456 ၵေႃႉ ဝႃႈၼႆ။