ပႃႇတီႇႁူဝ်သိူဝ် SNLD ၸတ်းႁဵတ်းဝၼ်းၵိူတ်ႇပႃႇတီႇ ၶွပ်ႈတဵမ် 30 ပီ ၸတ်းပႃးပၢင်တၢၼ်ၶႆႈ၊ ပၢင်ၵၢတ်ႇတႆးလႄႈ ယုၵ်ႉယွင်ႈၵူၼ်းၼုမ်ႇၽူႈမီးတၢင်းၶတ်းၸႂ်ဢႃယု 30 ပီလူင်းတႂ်ႈ ၵူၼ်းၶဝ်ႈႁူမ်ႈ ႁိမ်းၸမ် 3,000 ၵေႃႉ။
ဝၼ်းတီႈ 25-26/10/2018 ၼႆႉ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် SNLD ၸတ်းႁဵတ်းပၢင်ပွႆးၶွပ်ႈတဵမ် 30 ပီ တီႈႁူင်းႁေႃၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းလူင်တူၼ်ႈတီႈ ၸိုင်ႈတႆးပွတ်းၸၢၼ်းၵူၼ်းၶဝ်ႈႁူမ်ႈမီးႁိမ်းၸမ် 3,000 ၵေႃႉ။
ၸဝ်ႈၶုၼ်ထုၼ်းဢူး ႁူဝ်ပဝ်ႈပႃႇတီႇႁူဝ်သိူဝ်SNLD မွၵ်ႇလၢတ်ႈၶေႃႈၵႂၢမ်းတီႈၼႂ်းပၢင်ၵႅဝ်ႈဝႃႈ – “ ႁဝ်းၶႃႈ ႁဵတ်းလွင်ႈတၢင်းထုၵ်ႇမႅၼ်ႈ သိုဝ်ႈယူဝ်းသေ ႁဵတ်းသၢင်ႈမႃး ၊ ႁဝ်းၶႃႈပႆၸွမ်းၼိူဝ် သဵၼ်ႈတၢင်းလိၵ်ႈ ႁူမ်ႈမၢႆပၢင်လူင်၊ ၼင်ႇႁိုဝ်ပႃႇတီႇႁဝ်း တေၶိုၼ်ႈယႂ်ႇယိုၼ်း ယၢဝ်းၵႂႃႇမိူဝ်းၼႃႈၼၼ်ႉ ၶႂ်ႈႁႂ်ႈၵူၼ်းၼုမ်ႇ သႅၼ်းႁုၼ်ႈမႂ်ႇႁဝ်း ၶဝ်ႈမႃးၸွႆႈႁၢပ်ႇၵၢၼ်ၼမ်ၼမ်သေၵမ်း ” ဝႃႈၼႆ။
ၼႂ်းပၢင်ၵႅဝ်ႈဝၼ်းၵိူတ်ႇပႃႇတီႇႁူဝ်သိူဝ်ၼႆႉ ႁူမ်ႈၵၼ်တၵ်ႉယမ်တုင်းၸိူဝ်ႉၸၢတ်ႈ၊ ၸွမ်ပိဝ်ပႃႇတီႇႁူဝ်သိူဝ်၊ ႁူဝ်ပဝ်ႈပႃႇတီႇမွၵ်ႇလၢတ်ႈၶေႃႈၵႂၢမ်းပိုတ်ႇပၢင်၊ မွပ်ႈယိုၼ်ႈသူး ၽူႈႁတ်းငၢၼ် ၊ ၽူႈမီးသၸ်ႉၸႃႇ၊ ၽူႈႁဵတ်းသၢင်ႈၼႃႈၵၢၼ်ပႃႇတီႇမႃး၊ သပ်းလႅင်းတၢင်ႇၼႄ ၵၢၼ်ၵူၼ်းၼုမ်ႇ၊ ၵၢၼ်ပၢႆးပၺ်ၺႃ၊ ၵၢၼ်ပၢႆးၵပ်းသိုပ်ႇ၊ လၢတ်ႈၼႄလွင်ႈတူဝ်ထူပ်းၼႃႈၵၢၼ်ဢၼ်ပူၼ်ႉမႃးလႄႈ ၽႅၼ်ၵၢၼ်မိူဝ်းၼႃႈၸိူဝ်းၼႆႉ ဝႃႈၼႆ။
ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD Shan Nationalities League for Democracy ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ၼႆႉ ၶွတ်ႇၽွတ်ႈမႃးမိူဝ်ႈဝၼ်းတီႈ 26/10/1988 ႁူဝ်ပဝ်ႈပဵၼ်ၸဝ်ႈၶုၼ်ထုၼ်းဢူး ၊ ၵႅမ်ႁူဝ်ပဝ်ႈ 1 ၸၢႆးၸေႃးဢွင်ႇ(လူႉသဵင်ႈ)၊ ၵႅမ်ႁူဝ်ပဝ်ႈမၢႆ 2 ၸဝ်ႈၶမ်း ပိူင်ႇၾႃႉ၊ ၽူႈၼမ်းၼႂ်းၵူႈလွင်ႈလွင်ႈၸၢႆးၺုၼ်ႉလုၼ်ႇ( ၸၢႆးၼုတ်း) ၊ ၽူႈၼမ်းၼႂ်း 1 ၸၢႆးလဵၵ်ႉ၊ ၽူႈၼမ်းၼႂ်း2 ၸၢႆးၵျေႃႇၺုၼ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ