ၼၢင်းယိင်းၵေႃႉၼိုင်ႈ ယူႇလၢင်းၶိူဝ်း ၶဝ်ႈႁဵတ်းၵၢၼ်ၼႂ်းမိူင်းထႆး ၺႃးၵႃးၽႃႇမိူဝ်ႈဝၼ်းတီႈ 16/10/2018 တေဢဝ်ၶၢပ်ႈ  တူဝ်ၵႂႃႇဝႆႉတီႈဝတ်ႉပႃႇပဝ်ႈသေ တေပူၼ်ႉၶၢပ်ႈတူဝ်ၼႂ်းဝၼ်းသဝ်တေမႃးၼႆႉ။

ဝၼ်းတီႈ 25/10/2018 ယူႇတီႈၸုမ်းၶႅၵ်ႇလီပၢင်ၸႃႉတႆး ဝတ်ႉပႃႇပဝ်ႈ ၵဵင်းမႆႇလႄႈ ပီႈၼွင်ႉမၼ်းၼၢင်း ဢဝ်ၶၢပ်ႈတူဝ်  ၼၢင်းသႅင်လႃႉ တီႈႁူင်းယႃလူင်သူၼ်ၻွၵ်ႇသေ ဢဝ်ၵႂႃႇလုမ်းလႃးတီႈ ဝတ်ႉပႃႇပဝ်ႈ ဝဵင်းၵဵင်းမႆႇ ၸိုင်ႈထႆး တေပူၼ်ႉၶၢပ်ႈ တူဝ်ၼႂ်းဝၼ်းတီႈ 27/10/2018 ၼႆႉ ၽိတ်ႈမွၵ်ႇပီႈၼွင်ႉတီႈၸမ်ၵႆ ၶဝ်ႈႁူမ်ႈၸွႆႈထႅမ်။

ၸၢႆးတႆးထိူၼ်ႇ ၽူႈၸွႆႈထႅမ်ၶႅၵ်ႇလီပၢင်ၸႃႉတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ မိူဝ်ႈလဵဝ်ႁဝ်းၶႃႈ လႆႈမႃးၵပ်းသိုပ်ႇတီႈႁူင်းယႃ တႃႇတေဢဝ်ၶၢပ်ႈတူဝ်မၼ်းၼၢင်း ႁႅၼ်းတၢၼ်းပၼ် တီႈဝတ်ႉပႃႇပဝ်ႈ ၵွပ်ႈၼၼ်လႄႈ သင်ဝႃႈၽႂ်တူဝ်ႈတၼ်းၼႆ ၶႅၼ်းတေႃႈဢွၼ်ၵၼ်မႃးၸွႆႈၼမ်ၼမ်သေၵမ်း ၊ ယႃႇဝူၼ်ႉဝႃႈ ပဵၼ်ၵူၼ်းမိူင်း ၼၼ်ႉ မိူင်းၼႆႉ ၊ ႁဝ်းၶႃႈပဵၼ်ပီႈၼွင်ႉတႆးမိူၼ်ၵၼ် ၊ မီးသင်ၵေႃႈႁႂ်ႈႁဝ်းၶႃႈမေႃႁၵ်ႉၵၼ်၊ မေႃၸွႆႈၵၼ် ၊မေႃၸုင်ၸၼ်ၵၼ် သေၵမ်း ” ဝႃႈၼႆ။

ပူၼ်ႉမႃးမိူဝ်ႈ ဝၼ်းတီႈ 16/10/2018 ၶၢဝ်းယၢမ်းၵၢင်ၼႂ် 1 မူင်းပၢႆၼၼ်ႉ ၼၢင်းသႅင်လႃႉ ဢႃယု 47 ပီ ၵူၼ်းလၢင်းၶိူဝ်း  ၶဝ်ႈႁဵတ်းၵၢၼ် (ႁဵတ်းလွင်ႈမူတ်းသႂ်) တီႈၼႂ်းၵၢင်ဝဵင်းၵဵင်းမႆႇ ၸိုင်ႈထႆး ၺႃးၵႃးၽႃႇ တၢႆထင်တီႈ ၽွင်းတိုၵ်ႉလိုဝ်ႈၵၢၼ်တေပွၵ်ႈၶိုၼ်းတီႈယူႇ ၼႂ်းၵၢင်ဝဵင်းၵဵင်းမႆႇ ၸိုင်ႈထႆး။