Tuesday, November 29, 2022

သဵင်ၵွင်ႈတႅၵ်ႇၼႂ်းထုင်ႉမိူင်းယဵၼ် ၵူၼ်းမိူင်းဢွၼ်ၵၼ်တိုၼ်ႇသၢၼ်ႈၵူဝ်ႁႄ

Must read

ၼႂ်းထုင်ႉမိူင်းယဵၼ် ၸႄႈဝဵင်းၼမ်ႉတူႈၼၼ်ႉ သိုၵ်း RCSS လႄႈၸုမ်းသိုၵ်းဢူၺ်းလီပွတ်းႁွင်ႇ ၶဵင်ႈၶႅင်ၵၢၼ်သိုၵ်း ၵၼ်ၶိုၼ်း၊ သဵင်ၵွင်ႈၵေႃႈတႅၵ်ႇလၢႆၵမ်းလႄႈႁဵတ်းႁႂ်ႈ ၵူၼ်းမိူင်း မႆႈၸႂ် တိုၼ်ႇသၢၼ်ႈ ၵူဝ်ပဵၼ်ပၢင်တိုၵ်းသိုၵ်းသိူဝ် ၵၼ်ၶိုၼ်း ဝႃႈၼႆ။

Photo by – Gradit to Owner / ပၢႆ့ၶဝ်ႈတၢင်းၶဝ်ႈဢွၵ်ႇ ထုင့်မိူင်းယဵၼ်

မိူဝ်ႈၼႆႉ ဝၼ်းတီႈ 23/10/2018 ယၢမ်းၵၢင်ၼႂ် သိုၵ်း RCSS တင်း သိုၵ်းဢူၺ်းလီပွတ်းႁွင်ႇ ၶဵင်ႈၶႅင်ၵၢၼ် သိုၵ်း တေႃႇၵၼ်သေ သဵင်ၵွင်ႈတႅၵ်ႇၵမ်းၼိုင်ႈ ၼႂ်းထုင်ႉမိူင်းယဵၼ် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။ မိူဝ်ႈၶမ်ႈဝႃး ဝၼ်းတီႈ 22 ယၢမ်းႁူဝ်ၶမ်ႈၼၼ်ႉၵေႃႈ သဵင်ၵွင်ႈတႅၵ်ႇၵမ်းၼိုင်ႈ ဝႃႈၼႆ။

ၵူၼ်းဝၢၼ်ႈ ထုင်ႉမိူင်းယဵၼ် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး သိုၵ်း RCSS ထူဝ်းႁႅင်းသိုၵ်းၶိုၼ်ႈမႃးတၢင်းမိူင်း ယဵၼ်ႁဝ်းၶႃႈၼႆႉ တင်းၼမ်ၶႃႈ။ တၢင်းပွတ်းမိူင်းယဵၼ်ၼႆႉ သိုၵ်းလွႆ တင်းသိုၵ်းၶူဝ်းၶဵဝ်သမ်ႉ တူင်ႉၼိုင်ဝႆႉ။ ယွၼ်ႉ ၼၼ် မိူဝ်ႈဝႃး ဝၼ်းတီႈ 22 ယၢမ်းႁူဝ်ၶမ်ႈၵေႃႈ သဵင်ၵွင်ႈတႅၵ်ႇၵမ်းၼိုင်ႈ။ မိူဝ်ႈၼႆႉ ဝၼ်းတီႈ 23 ယၢမ်းၵၢင်ၼႂ် ၵေႃႈ သဵင်ၵွင်ႈ တႅၵ်ႇၵမ်းၼိုင်ႈ” ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ၶွမ်ႊမတီႊၸုမ်းၸွႆႈထႅမ်ၵူၼ်းထူပ်းၽေးသိုၵ်း ၼႂ်းၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇ ႁွၵ်ႈ ဝႃႈ “ လွင်ႈၵူၼ်းပၢႆႈၽေးသိုၵ်းတႄႉ ပႆႇလႆႈငိၼ်း/ ပႆႇမီး။ သဵၼ်ႈမၢႆၵူၼ်း ပၢႆႈၽေးသိုၵ်းၵေႃႈ ပႆႇႁွတ်ႈၽႅဝ်မႃး တီႈၶွမ်ႊမတီႊၵူၼ်းပၢႆႈၽေးႁဝ်းတိူဝ်ႈၶႃႈ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းၼႂ်းထုင်ႉမိူင်းယဵၼ် ဢွၼ်ၵၼ်မႆႈၸႂ်ၵူဝ်သဵင်ၵွင်ႈတႅၵ်ႇ ပဵၼ် ပၢင်တိုၵ်းၵၼ်ၶိုၼ်ႈ၊ ပေႃးပဵၼ်ပၢင်တိုၵ်းဢၼ်ႁူပ်ႉတၢင်းယၢပ်ႇပဵၼ်ၵူၼ်းမိူင်းႁူႉတိုၼ်းတေလႆႈႁႃတၢင်းပၢႆႈၽေးသိုၵ်းယဝ်ႉ ဝႃႈၼႆ။

ၵူၼ်းဝၢၼ်ႈ ထုင်ႉမိူင်းယဵၼ် လၢတ်ႈဝႃႈ “ တၢင်းပွတ်းတွၼ်ႈၼႆႉ မီးၸုမ်းသိုၵ်းလွႆတင်းသိုၵ်းၶူဝ်းၶဵဝ်ယူႇဝႆႉ သင်သိုၵ်း RCSS ၶဝ်ႈမႃးၵေႃႈ ႁူႉၶဵင်ႈၶႅင်ၵၢၼ်သိုၵ်းၵၼ်သေဢမ်ႇၵႃး ႁူႉတေပဵၼ်ပၢင်တိုၵ်းၵၼ်ယူႇၶႃႈယဝ်ႉ။ တေႃႈလဵဝ် သိုၵ်း RCSS ႁွတ်ႈၼမ်ဝႆႉဢေႃႈ” ဝႃႈၼႆ။

မိူဝ်ႈလိူၼ် July , Aug (လိူၼ်ထူၼ်ႈ 7 , လိူၼ်ထူၼ်ႈ 8) ပူၼ်ႉမႃးၼႆႉ သိုၵ်းဢူၺ်းလီပွတ်းႁွင်ႇတင်း သိုၵ်း RCSS ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼမ်ႉတူႈ ႁၢဝ်ႈႁႅင်း။ ၵူၼ်းမိူင်း 2000 ပၢႆလႆႈပၢႆႈယၢၼ်ႁိူၼ်းယေးတီႈယူႇ ယၢပ်ႇ ၽိုတ်ႇတႃႇတူၺ်းလူတူင်ႈႁႆႈတူင်ႈၼႃး၊ ၵူဝ်ပဵၼ်ပၢင်တိုၵ်းယႂ်ႇၶိုၼ်ႈလႄႈ သင်ၶၵူၼ်းမိူင်း တုၵ်းယွၼ်းႁႂ်ႈၵိုတ်း ၵၢၼ်တိုၵ်းတေႃးၵၼ်သေ ဢုပ်ႇဢူဝ်းၵႄႈလိတ်ႈပၼ်ႁႃႁႂ်ႈၵူၼ်းမိူင်းလႆႈယူႇသႃႇၵတ်းယဵၼ်။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- SHAN's Apps -spot_img

ၶၢဝ်ႇလိုၼ်းသုတ်း