ၼႂ်းၸႄႈဝဵင်းၼမ်ႉၶမ်း ၸဝ်ႈၼႃးၵေႃႉၼိုင်ႈ ၺႃးမၢၵ်ႇဢၼ်ႁၢင်ႈၵၢင်ဝႆႉၼႂ်းၼႃးၼၼ်ႉ တႅၵ်ႇသႂ်ႇသေ တိူဝ်ႉၺႃး ၶႃတင်းသွင်ၶွၼ်သေဢမ်ႇၵႃး တိူဝ်ႉပႃးၸွမ်းတူဝ်ၸွမ်းၶိင်း ႁၢဝ်ႈႁႅင်း ဝႃႈၼႆ။
ဝၼ်းတီႈ 21/10/2018 ယၢမ်းၵၢင်ၼႂ် 10 မူင်း တႃႉဢၢႆႈယႂ်ႇ(ႁွင်ႉ) ၵွၼ်းဢၢႆႈဢွင်ႇ ဢႃယု 50 ပီပၢႆ ၵူၼ်းမၢၼ်ႈပၢင်ႇ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။ ၽွင်းၵႂႃႇတူၺ်းၼမ်ႉၼႃးၼၼ်ႉ ၽႃႇၺႃးမၢၵ်ႇ ၾင်ဝႆႉ ၼႂ်းၼႃးသေ တႅၵ်ႇတိူဝ်ႉသႂ်ႇၶႃမၼ်းၸၢႆးတင်းသွင်ၾၢႆႇလႄႈ မိုဝ်း တိူဝ်ႉပႃးၸွမ်းတူဝ်ၸိူဝ်းၼႆႉ ႁၢဝ်ႈႁႅင်း ဝႃႈၼႆ။
ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးပဵၼ်ၵူၼ်းမၢၼ်ႈပၢင်ႇ မိူဝ်ႈၽွင်းၼၼ်ႉ မၼ်းၸၢႆး ၵႂႃႇပွႆႇၼမ်ႉၼႃးသေ ဝဵၵ်ႉၺႃးမၢၵ်ႇ ဢၼ်ၾင်ဝႆႉၼႂ်းၼႃးဢေႃႈ။ တႅၵ်ႇၽူင်ႉတိူဝ်ႉသႂ်ႇတီႈတိၼ်မၼ်းၸၢႆးသွင်ၶွၼ် လႄႈ မိုဝ်း၊ ဢူၵ်းမၼ်းၸၢႆး၊ တေႃႈလဵဝ်ပႆႇလၢတ်ႈၵႂၢမ်းလႆႈ တိုၵ်ႉလႆႈဢဝ်ဢွၵ်ႊသီႊၵျိၼ်ႊၸွႆႈထူၺ်ႈၸႂ်ဝႆႉယူႇ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ယူႇတီႈၸုမ်းၵူၼ်းၼုမ်ႇလႄႈ ၸုမ်းၸွႆႈထႅမ်ၵူၼ်းထူပ်းၽေး ၸႄႈဝဵင်းၼမ်ႉၶမ်း လႆႈၼမ်းဢဝ် တူဝ် တႃႉဢၢႆႈယႂ်ႇ သူင်ႇယူတ်းယႃတူဝ်ဝႆႉတီႈႁူင်းယႃလူင်ၵူၼ်းမိူင်း ၸႄႈဝဵင်းၼမ်ႉၶမ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ