ၵူၼ်းမိူင်းၵဵင်းတုင် ၵေႃႉၼိုင်ႈ မဝ်းယႃႈသေ ဢဝ်မိတ်ႈတႅင်းသႂ်ႇၵေႃႉပဵၼ်မႄႈၸဝ်ႈၵဝ်ႇ မၢတ်ႇၸဵပ်းလိူဝ်ႁႅင်းယဝ်ႉ ၾၼ်းတႅင်းပႃးၵေႃႉပဵၼ်ၼွင်ႉယိင်းၸဝ်ႈၵဝ်ႇတၢႆထင်တီႈသေ ဢဝ်ၵွင်ႈယၢမ်းယိုဝ်း တူဝ်ၸဝ်ႈၵဝ်ႇတၢႆၸွမ်း ဝႃႈၼႆ။
ဝၼ်းတီႈ 21/10/2018 ယၢမ်းႁူဝ်ၶမ်ႈ မွၵ်ႈ 5 မူင်း ၽူႈၸၢႆး ၸိုဝ်ႈႁွင်ႉၵျႃႇၽေႇ ဢၼ်ဝႃႈၼၼ်ႉ ဢဝ်မိတ်ႈၾၼ်း တႅင်းသႂ်ႇၵေႃႉပဵၼ်ၼွင်ႉယိင်းၸိုဝ်ႈႁွင်ႉ မၼႃႇၸူႉလီႇ ဢႃယု 24 ပီ တၢႆထင်တီႈသေဢမ်ႇၵႃး ၶိုၼ်းတႅင်းသႂ်ႇၵေႃႉပဵၼ် မႄႈ ၸဝ်ႈၵဝ်ႇမၢတ်ႇၸဵပ်းႁၢဝ်ႈႁႅင်း။ လိူဝ်ၼၼ်ႉ မၼ်းၸၢႆးၶိုၼ်းဢဝ်ၵွင်ႈသတ်ႉယၢမ်း ယိုဝ်းတူဝ်မၼ်း ၸၢႆးတၢႆၸွမ်း တီႈဝၢၼ်ႈပႃႇၵူၺ်ႈ (2) ဢိူင်ႇၼွင်တဝ်း ၸႄႈဝဵင်းၵဵင်းတုင် ၸိုင်ႈတႆးပွတ်း ဢွၵ်ႇၶူင်း ဝႃႈၼႆ။
ဢူးၵျႃႇဝႃႉ ၵေႃႉပဵၼ်ပေႃႈ ၵျႃႇၽေႇ လၢတ်ႈၼႄလွင်ႈတၢင်း တီႈၾၢႆႇပလိၵ်ႈၵဵင်းတုင်ဝႃႈ “ မိူဝ်ႈၽွင်းၼၼ်ႉ ၶႃႈတိုၵ်ႉ ပွၵ်ႈၼႃးမႃး လႆႈႁၼ်ၵေႃႉပဵၼ်မေးၶႃႈႁဝ်း မၼႃႇမူၺ်း မၢတ်ႇၸဵပ်းတီႈတွင်ႉသေ ၼင်ႈႁႆႈယူႇ ၶႃႈ ႁဝ်းလႆႈထၢမ် ၵေႃႉ ပဵၼ်မေးၼၢင်းၶႃႈႁဝ်းသေ မေးၶႃႈႁဝ်းဝႃႈ လုၵ်ႈၸၢႆးႁဝ်း ၶႃႈႁႅမ်ၵေႃႉ ပဵၼ်ၼွင်ႉယိင်းမၼ်းတၢႆ ဢဝ်မိတ်ႈတႅင်း ပႃးႁဝ်းသေ မၼ်းၵေႃႈဢဝ်ၵွင်ႈသတ်ႉယၢမ်းယိုဝ်း တူဝ်မၼ်းတၢႆယဝ်ႉဝႃႈ” ဝႃႈၼႆ။
ပလိၵ်ႈၵဵင်းတုင် ၵေႃႉၼိုင်ႈ လၢတ်ႈဝႃႈ “ ၵျႃႇၽေႇၼႆႉ ပဵၼ်ၵူၼ်းၵိၼ်သူႇသမ်းယႃႈမဝ်းၵမ်ၵေႃႉၼိုင်ႈ။ မိူဝ်ႈဝၼ်း ၼၼ်ႉ မၼ်းၸၢႆးမဝ်းလဝ်ႈမဝ်းယႃႈသေ ၶႃႈႁႅမ်မႄႈမၼ်းတင်းၼွင်ႉယိင်းမၼ်း” ဝႃႈၼႆ။
တေႃႈလဵဝ် ၵေႃႉပဵၼ် မေးဢူးၵျႃႇဝႃႇ မၼႃႇမူၺ်းတႄႉ လႆႈမၢတ်ႇၸဵပ်းႁၢဝ်ႈႁႅင်းသေ သူင်ႇယူတ်းယႃတူဝ်ဝႆႉ တီႈႁူင်း ယႃၵူၼ်းမိူင်းဝဵင်းၵဵင်းတုင်ဝႆႉယူႇ ဝႃႈၼႆ။
ၶေႃႈမုလ်း FB – မောင်မောင်နိုင် ကျိုင်းတုံ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ