ၽူႈတႅၼ်းသၽႃး သၢၼ်မိုဝ်းၾၢႆႇႁဵတ်းပၼ်ဝႂ်ၵပ်းတူဝ်၊ ၵဵပ်းမၢႆသဵၼ်ႈၸိုဝ်ႈၵူၼ်းၶဝ်ႈ/ ဢွၵ်ႇ လူင်းပိုၼ်ႉတီႈဢဝ် ၵူၼ်းမိူင်းႁိမ်း 200 ၵေႃႉ ၶဝ်ႈသၢႆမၢႆမုင်ႉႁေႃႁိူၼ်း။
တႄႇဢဝ် ဝၼ်းတီႈ 20-21-22/10/2018 ၸၢႆးထုၼ်းဢွင်ႇ ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 2 ၸႄႈတွၼ်ႈလွႆလႅမ်၊ ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 တင်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းလၢႆးၶႃႈ ႁူမ်ႈတင်း ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈမိူင်း (လဝၵ) လူင်း ပိုၼ်ႉတီႈႁဵတ်းပၼ်ဝႂ်မုင်ႉႁေႃႁိူၼ်းလႄႈ ဝႂ်ၵပ်းတူဝ်ပၼ် ၵူၼ်းမိူင်း ၼႂ်းဢိူင်ႇပုင်ႇၼိူဝ်၊ ဢိူင်ႇဝၢၼ်ႈၾၢႆႇလႄႈ ဝၢၼ်ႈ မၢၵ်ႇလၢင်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈ တႆးပွတ်းၸၢၼ်း ၶၢဝ်းတၢင်း 3 ဝၼ်း လႆႈဢဝ်ၵူၼ်းမိူင်းႁိမ်း 200 ၵေႃႉ ၶဝ်ႈသၢႆမၢႆမုင်ႉႁေႃႁိူၼ်းသေ ႁဵတ်းပၼ်ပႃးဝႂ်ၵပ်းတူဝ်။
ၸၢႆးထုၼ်းဢွင်ႇ ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈႁဝ်းၶႃႈ ၽူႈ တႅၼ်းသၽႃးၸိူဝ်ႉၸၢတ်ႈလႄႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 လႄႈ 2 ႁူမ်ႈတင်း ႁွင်ႈ ၵၢၼ်လူင် ပွင်ၸိုင်ႈ ၾၢႆႇၵူတ်ႇထတ်းၵူၼ်းၶဝ်ႈမိူင်း လူင်းႁဵတ်းပၼ်ဝႂ်မုင်ႉႁေႃႁိူၼ်းလႄႈ ဝႂ်ၵပ်းတူဝ် ၸိူဝ်းပဵၼ် ပီႈၼွင်ႉၵူၼ်းမိူင်း ႁဝ်းၶႃႈ ပႆႇမီးၼၼ်ႉ။ ၼႂ်းၶၢဝ်းတၢင်း 3 ဝၼ်းၼႆႉမႃး ႁဝ်းၶႃႈလႆႈႁဵတ်းယဝ်ႉၵႂႃႇ ႁိမ်း 200 ၵေႃႉယဝ်ႉ။ ပေႃးလင်ဢွၵ်ႇ ဝႃႇသႃမႃး ႁဝ်းၶႃႈ တေသိုပ်ႇလူင်းပိုၼ်ႉတီႈထႅင်ႈ” ဝႃႈၼႆ။
ၵမ်ႈၼမ် ဢၼ်လူင်းႁဵတ်းပၼ်ၵူၼ်းမိူင်း ဝႂ်မုင်ႉႁေႃႁိူၼ်းလႄႈ ဝႂ်ၵပ်းတူဝ်ၼႆႉ ပဵၼ်ပီႈၼွင်ႉၵူၼ်းမိူင်း ၸိူဝ်းယူႇ သဝ်း ၸွမ်းၶွပ်ႇလႅၼ်ဝဵင်းလၢႆးၶႃႈ ဝၢႆးဢွၵ်ႇဝႃႇတႄႉ တေလူင်းတၢင်းဢိူင်ႇဝၢၼ်ႈၶၢင်းသေ ထတ်းတူၺ်းႁဵတ်းပၼ်ထႅင်ႈ ဝႃႈ ၼႆ။
ၼႂ်းတူဝ်ဝဵင်းလၢႆးၶႃႈ မီး 4 ပွၵ်ႉ။ ၼႂ်းၸႄႈဝဵင်းလၢႆးၶႃႈ မီး ဢိူင်ႇ 19 ဢိူင်ႇ မူႇဝၢၼ်ႈ မီး 217 ဝၢၼ်ႈ ဝႃႈၼႆ။
