ႁွင်ႈၵၢၼ်ၾၢႆႇၵူတ်ႇထတ်း ၶူဝ်းၵုၼ်ႇသိၼ်ၵႃႉ လူင်ပွင်ၸိုင်ႈမၢၼ်ႈ ၵူတ်ႇထတ်းတီႉၺွပ်း ၶဝ်ႈပိူၵ်ႇ/ သၢၼ် ဢၼ်လုၵ်ႉ တၢင်းမိူင်းတႆး လၵ်ႉတေႃႉသူင်ႇ ၶၢႆၸူးမိူင်းၶႄႇ ဝႃႈၼႆ။
ဝၼ်းတီႈ 18/10/2018 မႃး ပလိၵ်ႈ ၵူတ်ႇထတ်းၶူဝ်းၵုၼ်ႇသိၼ်ၵႃႉ တီႉၺွပ်း ရူတ်ႉၵႃး 17 လမ်း တၢင်ႇၶဝ်ႈပိူၵ်ႇ 3 ႁဵင်ထူင်ပၢႆ ဢၼ်လုၵ်ႉတၢင်းၸႄႈဝဵင်းၼမ်ႉၶမ်း ၵႂႃႇတၢင်းမိူင်းၶႄႇ။
ၸၢႆးဢၢႆႈ ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တီႈတၢင်းထုင်ႉမၢဝ်းတႄႉ ၵူၼ်းတၢင်းမိူင်းၶႄႇ ၶဝ်ႈမႃးသိုဝ်ႉ သေ တၢင်ႇဢွၵ်ႇၵႂႃႇႁဵတ်းၼၼ်။ ၵူၺ်းၵႃႈ တၢင်းၵဵတ်ႉ/လၢၼ်ႇ 105 ၼၼ်ႉတႄႉ ၶဝ်ႈပိူၵ်ႇဢၼ်ၶဝ်တေႃႉၵႂႃႇတၢင်း မိူင်းၶႄႇ ၼၼ်ႉ ၵမ်ႈၼမ် တေလုၵ်ႉတၢင်းမိူင်းတႆးပွတ်းၸၢၼ်းလႄႈ မိူင်းမၢၼ်ႈၶိုၼ်ႈမႃး” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ယူႇတီႈၽွင်းလူင် ၾၢႆႇပၢႆးမၢၵ်ႈမီးလႄႈ ၵပ်းသိုပ်ႇၵႃႉၶၢႆ တင်း ၽွင်းလူင်ၾၢႆႇႁူမ်ႇလူမ်ႈ ၼႂ်းမိူင်းတႆး သင်ႇလူင်း ႁႂ်ႈဢဝ်လိူင်ႈလၢဝ်း ၵူၼ်းၵႃႉၶဝ်ႈပိူၵ်ႇၶဝ်ႈသၢၼ် ၼွၵ်ႈၶွပ်ႇပိူင်။ ယွၼ်ႉၾၢႆႇလူင်ပွင်ၸိုင်ႈမိူင်းမၢၼ်ႈ ႁႄႉ ႁၢမ်ႈဢမ်ႇပၼ်ၶႂၢင်ႉ တေႃႉၶဝ်ႈဢွၵ်ႇၶၢႆမႃး မီးၶၢဝ်းတၢင်းႁိုင်ယဝ်ႉ ဝႃႈၼႆ။
ၸၢႆးဢၢႆႈ လၢတ်ႈဝႃႈ “ တေႃႈလဵဝ် ပဵၼ်ၶၢဝ်း ၶဝ်ႈမႂ်ႇဢွၵ်ႇ။ ၵူၼ်းမိူင်းႁဝ်းတင်းထုင်ႉမၢဝ်းတႄႉ ၸႂ်ယႂ်ႇ တေႃႉသူင်ႇ ၶၢႆ တၢင်းမိူင်းၶႄႇၶႃႈဢေႃႈ။ ပေႃးဢမ်ႇတေႃႉသူင်ႇၶၢႆတၢင်းမိူင်းၶႄႇၸိုင် ဢမ်ႇလႆႈၶၼ်ၶဝ်ႈသုင်။ တေၸႂ်ယႂ်ႇ ၶၢႆတေႃႇ ၼႂ်း မိူင်းၶိုၼ်းၵူၺ်းၼႆ ၸဝ်ႈၼႃးမၢင်ၵေႃႉ တေဢမ်ႇၸၢင်ႈလႆႈၶိုၼ်းတိုၼ်းလၢင်းမၼ်းၶိုၼ်းၵေႃႈပဵၼ်လႆႈ။ တေႃႈလဵဝ်ၼႆႉ ၵႃႈ ၸႂ်ႉၸၢႆႇမၼ်းသုင်။ ၶၼ်ၶဝ်ႈသမ်ႉပေႃးၼႆ လင်ၼႆႉမႃး တေဢမ်ႇမီးၽႂ်ၶႂ်ႈႁဵတ်းၼႃးၶႃႈယဝ်ႉ” ဝႃႈၼႆ။
ၸဝ်ႈႁႆႈၸဝ်ႈၼႃးမိူင်းတႆးၼႆႉ ၵူႈပွၵ်ႈၽုၵ်ႇၶဝ်ႈ ၽၼ်းၶဝ်ႈတႆး၊ ဝၢႆးမႃးလူင်ပွင်ၸိုင်ႈမၢၼ်ႈ ဢမ်ႇပၼ်ၽုၵ်ႇ ၸႂ်ႉၽုၵ်ႇ ၶဝ်ႈသႅၼ်းပွၵ်း၊ တႅမ်ႇ၊ ႁူင်းၶွၼ်ႈ၊ ၶဝ်ႈၶႅင် ၸိူဝ်းၽၼ်းၶဝ်ႈတႆးၵေႃႈ ႁၢႆမႃးလွႆးလွႆး၊ ၶဝ်ႈဢၼ်ၶၢႆတေႃႇမိူင်းၶႄႇ ၵမ်ႈၼမ် ၽၼ်းၵေႃႈသိုဝ်ႉမႃးတၢင်းမိူင်းၶႄႇ ဢဝ်ၸိူဝ်ႉၽၼ်းသေ ၽုၵ်ႇၶိုၼ်းဢမ်ႇပဵၼ်ၵၢၼ်၊ ၽုၵ်ႇယဝ်ႉ ၶၢႆ/ ၵိၼ်/ ၸိူဝ်ႉ ၽၼ်းလႆႈသိုဝ်ႉ တၢင်းမိူင်းၶႄႇ မႃးၽုၵ်ႇၶိုၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ