မၢၵ်ႇလူင်တူၵ်းတႅၵ်ႇ ၼႂ်းဝၢင်းႁိူၼ်း ၵူၼ်းဝၢၼ်ႈလင်ၼိုင်ႈ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။
ဝၼ်းတီႈ 20/10/2018 ယၢမ်းႁူဝ်ၶမ်ႈ မွၵ်ႈ 7 မူင်းပၢႆၼၼ်ႉ မၢၵ်ႇလူင်တူၵ်းတႅၵ်ႇၼႂ်းဝၢင်းႁိူၼ်း ၵူၼ်းဝၢၼ်ႈပွၵ်ႉ 1 သႃႇယႃႇၵုင်း ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။ ၵဵဝ်ႇလူၺ်ႈလွင်ႈမၢၵ်ႇၼႆႉ ပဵၼ်မၢၵ်ႇၽႂ် ၼမ်ႉ မိုဝ်းၽႂ် ယိုဝ်းမႃးဢၼ်ဝႃႈၼၼ်ႉ ဢမ်ႇလႆႈႁူႉ။ ၼႂ်းၸႄႈဝဵင်းၵူတ်ႉၶၢႆၼႆႉ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းလွႆ TNLA ၵႆႉၵႆႉပဵၼ်ပၢင်တိုၵ်းၵၼ်။ ၽွင်းမၢၵ်ႇတူၵ်းတႅၵ်ႇၼႂ်းႁိူၼ်းၵူၼ်းဝၢၼ်ႈၼၼ်ႉတႄႉ ဢမ်ႇမီးပၢင်တိုၵ်းသင်။
ၵူၼ်းမိူင်းၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်မၢၵ်ႇလူင် လုၵ်ႉတၢင်းလႂ်မႃးဢမ်ႇႁူႉ တူၵ်း သႂ်ႇႁိူၼ်းၵူၼ်းလုၵ်ႈၼိုင်ႈ။ ၵူၺ်းၵႃႈ ပဵၼ်မၢၵ်ႇၽႂ် ၸုမ်းလႂ် ယိုဝ်းမႃးဢၼ်ဝႃႈၼၼ်ႉ ဢမ်ႇပႆႇႁူႉ။ လွင်ႈတုမ်ႉတိူဝ်ႉ ၵူၼ်းႁိူၼ်း မၢတ်ႇၸဵပ်းလူႉတၢႆတႄႉ ဢမ်ႇ မီး။ လႆႈငိၼ်းဝႃႈ ၸၢၵ်ႇမၢၵ်ႇၼၼ်ႉ တႅၵ်ႇတိူဝ်ႉသႂ်ႇ ၸွမ်းၽႃႁိူၼ်းလႄႈ ရူတ်ႉၵႃး ၵမ်ႈၽွင်ႈ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ပဵၼ်ၸုမ်းလႂ် မူႇလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ပႆႇႁူႉ ဝႃႈၼႆ။
တၢင်းပွတ်းတွၼ်ႈၵူတ်ႉၶၢႆၼၼ်ႉ သိုၵ်းဢၼ်တူင်ႉၼိုင်ၵႂႃႇမႃးတႃႇသေႇသမ်ႉ မိူၼ်ၼင်ႇ သိုၵ်းလူင်ပွင်ၸိုင်ႈမၢၼ်ႈ၊ သိုၵ်းတဢၢင်း(လွႆ) လႄႈ သိုၵ်းၶၢင် တင်း သိုၵ်းတႆး SSPP ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ