ႁူင်းယႃၶႄႇ ဢၼ်ၶဝ်ႈပိုတ်ႇၼႂ်းဝဵင်းမူႇၸေႊလင်ၼိုင်ႈ ၺႃးလူင်ပွင်ၸိုင်ႈမၢၼ်ႈဢိုတ်း

ႁူင်းယႃသုၼ်ႇတူဝ် လွင်ႈမိုတ်ႈၵိုဝ်း မိူင်းတႆး – မိူင်းၶႄႇ ဢၼ်ပိုတ်ႇဝႆႉဢမ်ႇပဵၼ်တၢင်းၵၢၼ် ၼႂ်းပွၵ်ႉၸွၼ်ၸူဝ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ တီႉလႆႈမေႃယႃတၢင်းမိူင်းၶႄႇ လႄႈ ၽူႈၸွႆႈမေႃယႃ ႁူမ်ႈၵၼ် 10 ၵေႃႉ လႆႈပိုတ်ႇဢမူႉ/ၶၻီႊဢဝ်လိူင်ႈလၢဝ်းလႄႈ သင်ႇဢိုတ်းပႅတ်ႈႁူင်းယႃၼၼ်ႉပႃး ဝႃႈၼႆ။

တေႃႇမျႃႉမျႃႉသၢၼ်ႇ ၾၢႆႇႁွင်ႈၵၢၼ်ပၢႆးယူႇလီ ၸႄႈတွၼ်ႈမူႇၸေႊ လၢတ်ႈတီႈသိုဝ်ႇၶၢဝ်ႇ RFA ဝႃႈ “ ႁူင်းယႃၼႆႉ ၵေႃႇ သၢင်ႈမႃး ဢမ်ႇၶဝ်ႈပဵၼ်တၢင်းၵၢၼ် ဢမ်ႇလႆႈၶႂၢင်ႉ။ ယႃႈယႃဢၼ်ၶဝ်ၸႂ်ႉၼၼ်ႉၵေႃႈ ဢမ်ႇၶဝ်ႈပဵၼ်တၢင်းၵၢၼ်။ ၶဝ် ႁဵတ်းပႃးၵၢၼ်ၽိတ်းမၢႆမီႈႁပ်ႉယႃႉလုၵ်ႈဢွၼ်ႇၸိူဝ်းၼႆႉ။ ၵဵဝ်ႇလူၺ်ႈလွင်ႈၼႆႉ ယူႇတီႈၾၢႆႇႁူင်းယႃ လႆႈၶဝ်ႈၵူတ်ႇထတ်း ၵုမ်းၶင်တူဝ် မေႃယႃလႄႈ ၽူႈၸွႆႈ ၸိူဝ်းၼၼ်ႉ” ဝႃႈၼႆ။

ၵူၼ်းဢၼ်ၵဵဝ်ႇၶွင်ႈမီး 10 ၵေႃႉ ပၢႆႈလွတ်ႈဝႆႉ ၵေႃႉၼိုင်ႈ။ တေႃႈလဵဝ် ၵိုတ်း 9 ၵေႃႉ ပႃးၵူၼ်းမိူင်းတႆး 3 ၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ တီႈသိုဝ်ႇၶၢဝ်ႇ BBC ဢွၵ်ႇဝႆႉဝႃႈ ယူႇတီႈႁွင်ႈၵၢၼ်ၾၢႆႇပၢႆးယူႇလီဝႃႈ ၶဝ်တႄႇပိုတ်ႇမႃးမိူဝ်ႈ ဝၼ်းတီႈ 5 လိူၼ်ၼႆႉ။ ဢူးတွင်းထုၼ်း ၵူၼ်းမိူင်းမူႇၸေႊ လၢတ်ႈဝႃႈ တေပိုတ်ႇမႃး မီးၶၢဝ်းတၢင်းမွၵ်ႈ 2 လိူၼ်။ ၵူၼ်းၵႂႃႇယူတ်းယႃ ၵမ်ႈၼမ် ပဵၼ်ပီႈၼွင်ႉဝႃႉ၊ ၵူဝ်းၵၢင်ႉ ဢၼ်ယူႇသဝ်းၼႂ်းမူႇၸေႊ ၵူၼ်းၸႃႇတိတႄႉ ဢမ်ႇပေႃးၵႂႃႇ ဝႃႈၼႆ။