သင်ၶတႆး ဢိၵ်ႇပီႈၼွင်ႉတႆး ဝဵင်းလိူဝ်ႇ ႁူမ်ႈၵၼ် ၸတ်းႁဵတ်းပၢင်ပွႆးယွင်ႈယေႃးသင်ၶတႆး ၸိူဝ်းဢွင်ႇလိၵ်ႈပူၼ်ႉၸၼ်ႉ ၵူႈၸၼ်ႉၸၼ်ႉ တီႈဝဵင်း တႃႈလိူဝ်ႇ ပဵၼ်ပွၵ်ႈၵမ်း 11 ဝႃႈၼႆ။
ဝၼ်းတီႈ 20/10/2018 ယၢမ်းၵၢင်ၼႂ် 8 မူင်း ထိုင် 11 မူင်း မူႇၸုမ်းလူလွမ်ပႂ်ႉပႃးလုၵ်ႈႁဵၼ်းသင်ၶၸဝ်ႈ ၸိူဝ်ႉၶိူဝ်းတႆး တင်း မူႇၸုမ်းယုၵ်ႉယွင်ႈပုတ်ႉထသႃသၼႃၼုၵ်ႉၵႁ ၸၢဝ်းၶိူဝ်းတႆး ႁူမ်ႈၵၼ် ၸတ်းႁဵတ်းပၢင်ပွႆးယွင်ႈၵုင်ႇသင်ၶတႆး ဢွင်ႇလိၵ်ႈ ၵူႈၸၼ်ႉၸၼ်ႉ တီႈၵျွင်းတႆး သႃႇသၼဝေပုလ်လ၊ တိူၵ်ႈမႁႃႇဝိၸိတႃႇ ရႃႇမ ၸႄႈဝဵင်း ပျီႇၵျီးတၶုၼ်ႇ တိူင်းဝဵင်းလိူဝ်ႇ ဝႃႈၼႆ။
ၸဝ်ႈၶူးၺေႇယထမ်ႇမ သင်ၶၸဝ်ႈဢၼ်ယွင်ႈၵုင်ႇ ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပွႆး ယွင်ႈၵုင်ႇသင်ၶတႆး ပီၼႆႉ ပဵၼ်ပွၵ်ႈၵမ်း 11 ။ ယိူင်းဢၢၼ်းတႄႉၵေႃႈ ၼင်ႇႁိုဝ် သင်ၶၸိူဝ်ႉၶိူဝ်း တႆးတင်းသဵင်ႈ ပေႃး တေမီးတၢင်းၸမ်ၸႂ် မိုတ်ႈၵိုဝ်းၵၼ်သေ ၶဝ်ႈၸူးဢွၵ်ႇႁႃၵၼ်လႆႈ။ မိူဝ်ႈသင်ၶ ၸိူဝ်ႉၶိူဝ်းတႆးႁဝ်း မီးတၢင်းယၢပ်ႇၽိုတ်ႇ ၵိတ်ႇၶွင်ႈမႃးသေပိူင်ပိူင်ၼၼ်ႉ ႁႂ်ႈပေႃးလူလွမ်ပႂ်ႉပႃးၸွႆႈထႅမ်ၵၼ်လႆႈ။ ၼင်ႇႁိုဝ် ၸဝ်ႈသင်ၶ ၸိူဝ်ႉၶိူဝ်းတႆးႁဝ်း ပေႃး တေပိုၼ်ၽႄႈ ၵၢၼ်သႃသၼႃၵူႈတီႈတီႈ။ ၼင်ႇႁိုဝ် သင်ၶၸဝ်ႈ ၸိူဝ်ႉၶိူဝ်းတႆး ႁဝ်း ပေႃးတေလူင်ႉ လႅၼ်ႇၾၢႆႇလိၵ်ႈ လၢႆးလႄႈ ၵၢၼ်သႃသၼႃ။ ၼင်ႇႁိုဝ် ပေႃးတေလႆႈႁူႉသဵၼ်ႈမၢႆ ၸဝ်ႈသင်ၶၸိူဝ်ႉ ၶိူဝ်းတႆးႁဝ်း ၽူႈ ႁဵၼ်းလိၵ်ႈ တီႈၼႂ်း ဝဵင်းလိူဝ်ႇ ၸိူဝ်းၼႆႉ” ဝႃႈၼႆ။
ပၢင်ယုၵ်ႉယွင်ႈယိုၼ်ႈမွပ်ႈပၼ်ဝႂ်ႁူမ်ၸူမ်းလႄႈ သူးတွၼ်ႈတီႈသင်ၶတႆး ၸိူဝ်းဢွင်ႇပူၼ်ႉၸၼ်ႉလိၵ်ႈ တင်းမူတ်း မီး 73 တူၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ