သင်ၶတႆးတင်းလၢႆ ႁူမ်ႈၵၼ်တုၵ်းယွၼ်းႁႂ်ႈ တပ်ႉသိုၵ်း၊ပႃႇတီႇတႆးၽွမ်ႉႁူမ်ႈၵၼ်ဝႆးဝႆး

သင်ၶၸဝ်ႈပတ်းပိုၼ်ႉမိူင်းတႆး ႁူမ်ႈၵၼ်တႅမ်ႈလိၵ်ႈတုၵ်းယွၼ်းထိုင် တပ်ႉသိုၵ်းၸိုင်ႈတႆး သွင်တပ်ႉသိုၵ်း ၊သွင်ပႃႇတီႇ ႁႂ်ႈတူၺ်းၼႃႈသင် ၶၸဝ်ႈလႄႈ ၵူၼ်းမိူင်းသေ ၽွမ်ႉႁူမ်ႈၵၼ် ၼင်ႇႁိုဝ်ၵူၼ်းဝၢၼ်ႈၵူၼ်းမိူင်း ပေႃးတေလႆႈယူႇသႃႇၵတ်းယဵၼ်။

ဝၼ်းတီႈ 18/10/2018 သင်ၶၸဝ်ႈၼႂ်း 13 ၸႄႈတွၼ်ႈ ပတ်းပိုၼ်ႉမိူင်းတႆး ႁူမ်ႈၵၼ်တႅမ်ႈလိၵ်ႈတုၵ်းယွၼ်းထိုင်တပ်ႉ  သိုၵ်းၸိုင်ႈတႆး ၶွင်ႇသီႇဢဝ်ၶိုၼ်းၸိုင်ႈတႆး /တပ်ႉသိုၵ်းၸိုင်ႈတႆး RCSS/SSA ။ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA၊ ငဝ်ႈငုၼ်းတီႇမူဝ်ႇၶေရႇၸီႇၸိူဝ်ႉၶိူဝ်းတႆး SNLD၊ တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး SNDP ႁႂ်ႈတူၺ်းၼႃႈသင်ၶၸဝ်ႈလႄႈ ၵူၼ်းမိူင်းသေ ၸဵဝ်းၽွမ်ႉႁူမ်ႈၵၼ်ဝႆးဝႆးသေၵမ်းဝႃႈၼႆ။

ၸဝ်ႈၶူးသုထမ်ႇမ ဝဵင်းပၢင်လူင် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ်ႁဝ်းၶႃႈ ဢွၵ်ႇလိၵ်ႈၼႆႉ ၶႂ်ႈႁႂ်ႈ  တပ်ႉသိုၵ်းႁဝ်းသွင်ၸုမ်း တူၺ်းႁၼ်ၼႃႈသင်ၶၸဝ်ႈ၊ ၵူၼ်းမိူင်းသေ ၽွမ်ႉႁူမ်ႈၵၼ်ဝႆးဝႆး ၊ ပေႃးႁဝ်းပီႈၼွင်ႉဢမ်ႇႁၵ်ႉၵၼ်၊ ဢမ်ႇဢေးလူၵၼ်၊ ဢမ်ႇၸွႆႈထႅမ်ၵၼ်ၸိုင် ၽႂ်တေမႃးၸွႆႈ မႃးႁၵ်ႉႁဝ်း၊ ယွၼ်ႉၼၼ်ယွၼ်းႁႂ်ႈတပ်ႉသိုၵ်းႁဝ်းတူၺ်းၼႃႈသင်ၶၸဝ်ႈ ၊ တူၺ်းၼႃႈၵူၼ်းမိူင်းသေ ၽွမ်ႉၵၼ်သေၵမ်း ၼင်ႇႁိုဝ်ဝၢၼ်ႈမိူင်းတေၶိုၼ်ႈယႂ်ႇ ၵူၼ်းမိူင်းတေလႆႈယူႇသိူဝ်းၵတ်းယဵၼ်ၼၼ်ႉ ” ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 14/09/2018 ၼၼ်ႉၵေႃႈ သင်ၶၸဝ်ႈတင်းၵူၼ်းမိူင်း 200 ပၢႆ ၼႂ်းတူင်ႇဝဵင်း ၵျွၵ်ႉမႄးႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ တုၵ်းယွၼ်းတပ်ႉသိုၵ်းတႆး သွင်ဢၼ်ၽွမ်ႉႁူမ်ႈၵၼ် သၢင်ႈလွင်ႈၽွမ်ႉႁူမ်ႈၸိုင်ႈတႆး ႁူမ်ႈမိုဝ်းၵႄႈ   လိတ်ႈပၼ်ႁႃဢၼ်ပဵၼ်ယူႇၼႂ်း ၸိုင်ႈတႆး။ ဢိင်ၼိူဝ်ပၼ်ႁႃပၢင်တိုၵ်းသိုၵ်းသိူဝ်ၼႂ်းၸိုင်ႈတႆးသေ ၸဝ်ႈတူၼ်ၶူးၵလျႃႇၼဝမ်ႇသ ဝိႁၢရ်ၵျွင်းယွတ်ႈ ဝဵင်းၵျွၵ်ႉမႄး ၺႃးၵူၼ်းႁၢႆႉပႃးၵွင်ႈၵၢင်ႇၶဝ်ႈယိုဝ်းၼႂ်းဝၢင်းဝတ်ႉ တိူဝ်ႉမၢတ်ႇ 7 ၵမ်းသေ ထိုင်တီႈပေႃးလႆႈလူႉလွၼ်ႇၵႂႃႇၽွင်းဢႃယုလႆႈ 47 ပီ၊ ဝႃသႃၸဝ်ႈ 27 ဝႃႇ။ လွင်ႈၼႆႉၾၢႆႇသင်ၶၸဝ်ႈ ဢမ်ႇၶႂ်ႈႁႂ်ႈပဵၼ် ၊ ဢမ်ႇၶႂ်ႈႁႂ်ႈမီးထႅင်ႈယဝ်ႉ၊ ဢၼ်ပဵၼ်ၵႂႃႇၸိူင်ႉၼႆၼႆႉ ပဵၼ်လွင်ႈၽွမ်ႉႁူမ်ႈၼႂ်းၸိူဝ်ႉ ၸၢတ်ႈတႅၵ်ႇငၢၵ်ႈယဝ်ႉဝႃႈၼႆ။