ပလိၵ်ႈထႆး လူင်းပိုၼ်ႉတီႈၼႂ်းၵဵင်းမႆႇၵူတ်ႇထတ်းတီႉၺွပ်း ၵူၼ်းႁဵတ်းၵၢၼ်ၸိူဝ်းဢမ်ႇၶဝ်ႈပၵ်းပိူင်

ၾၢႆႇၵူတ်ႇထတ်းၵူၼ်းၶဝ်ႈမိူင်း၊ ၾၢႆႇႁႅင်းၵၢၼ်လူင်ပွင်ၸိုင်ႈထႆး ႁူမ်ႈၵၼ်လူင်းပိုၼ်ႉတီႈ ၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်း ၸိူဝ်းႁဵတ်းၵၢၼ်ဢမ်ႇမႅၼ်ႈၸွမ်းပၵ်းပိူင်ဢၼ်ထႆးတမ်းဝၢင်းဝႆႉ။

ၵၢင်လိူၼ်ဢွၵ်ႊထူဝ်ႊၿိူဝ်ႊ 2018 မႃးၼႆႉ လူင်ပွင်ၸိုင်ႈမိူင်းထႆး ႁွင်ႈၵၢၼ်ၾၢႆႇႁႅင်းၵၢၼ်၊ ၾၢႆႇၵူတ်ႇထတ်း ၵူၼ်းၶဝ်ႈမိူင်း ဢိၵ်ႇၾၢႆႇၵဵဝ်ႇၶွင်ႈ ႁူမ်ႈၵၼ်လူင်းပိုၼ်ႉတီႈ ၵူတ်ႇထတ်းႁႅင်းၵၢၼ်ယၢၼ်မိူင်း လၢႆပိုၼ်ႉတီႈ ၼႂ်းဝဵင်းၵဵင်းမႆႇ မိူၼ်ၼင်ႇၵၢတ်ႇၶမ်းတဵင်ႈ၊ ၵၢတ်ႇလူင် ၸိူဝ်းၼႆႉ။ ၵူတ်ႇထတ်းတီႉၺွပ်းႁႅင်းၵၢၼ်ၸိူဝ်းဢမ်ႇမီးဝတ်းဝႂ်၊ ႁဵတ်းၵၢၼ်ၽိတ်းတီႈ၊ ဢမ်ႇၸႅင်ႈတီႈယူႇ ၸိူဝ်းၼႆႉ။ တီႉၺွပ်းလႆႈႁႅင်းၵၢၼ်လၢႆလၢႆၵေႃႉသေ သူင်ႇႁူင်းပလိၵ်ႈၸၢင်ႉၽိူၵ်ႇ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်ၸဝ်ႈၼႃႈတီႈၶဝ် လူင်းပိုၼ်ႉတီႈ   ၵူတ်ႇထတ်းၼႆႉ မၼ်းပဵၼ်ၼႃႈတီႈပုၼ်ႈၽွၼ်ၶဝ်ယူႇယဝ်ႉ၊ ၼင်ႇႁိုဝ်ပိူၼ်ႈတေဢမ်ႇၸၢင်ႈတီႉၺွပ်းဢဝ်တၢင်းၽိတ်း ၼၼ်ႉၵေႃႈ ႁဝ်းၶႃႈလူဝ်ႇတိတ်းတၢမ်ၶၢဝ်ႇငၢဝ်းလႄႈ ႁဵတ်းၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းပိူၼ်ႈ၊ မိူဝ်ႈလဵဝ်ၼႆႉပိူၼ်ႈႁႂ်ႈၵႂႃႇၸႅင်ႈတီႈယူႇ တီႈၾၢႆႇၵူတ်ႇထတ်းၵူၼ်းၶဝ်ႈမိူင်း ၵွပ်ႈၼၼ်လႄႈ ႁႂ်ႈဢွၼ်ၵၼ်ႁဵတ်းၸွမ်းၼင်ႇမၢႆမီႈသေၵမ်း” ဝႃႈၼႆ။

တီႈၼႂ်းမိူင်းထႆးၼႆႉ မီးႁႅင်းၵၢၼ်ယၢၼ်မိူင်း ၶဝ်ႈႁဵတ်းၵၢၼ်ၼပ်ႉႁူဝ်သႅၼ်ၸိူဝ်းထုၵ်ႇမႅၼ်ႈၸွမ်း ၼင်ႇပၵ်းပိူင်ၵေႃႈမီး၊ ဢမ်ႇမႅၼ်ႈၸွမ်းၼင်ႇပၵ်းပိူင်ၵေႃႈမီး။ ၵွပ်ႈၼၼ်လႄႈ ၼင်ႇႁိုဝ်ႁႅင်းၵၢၼ် ပေႃးတေထုၵ်ႇမႅၼ်ႈၸွမ်းပၵ်းပိူင်ဝၢၼ်ႈမိူင်းၼၼ်ႉၸဝ်ႈ ၼႃႈတီႈၽူႈမီးပုၼ်ႈၽွၼ်းၵူတ်ႇ ထတ်းႁၢဝ်ႈႁႅင်း လိူဝ်သေတီႈၸႄႈတွၼ်ႈသမုတ်ႊပရႃႊၵၢၼ်ႊယဝ်ႉ တၢင်ႇၸႄႈတွၼ်ႈၵေႃႈ ၸဝ်ႈၼႃႈတီႈလူင်းပိုၼ်ႉတီႈ ၵူတ်ႇထတ်းထပ်းၵၼ်မႃးၶိူဝ်းယႂ်း ပႃးၸဵမ်ၵဵင်းမႆႇ။