ၼႂ်းၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ ၵူၼ်းမိူင်း 2 ၵေႃႉၽူဝ်မေး ၵႂႃႇပိတ်းၼဵင်ႈၼႂ်းသူၼ်သေ ယဵပ်ႇၺႃးမၢၵ်ႇ တႅၵ်ႇ သႂ်ႇၵေႃႉပဵၼ်ၽူႈၸၢႆး ၶႃၾၢႆႇၶႂႃလႆႈပုတ်းၵႂႃႇ ဝႃႈၼႆ။
မိူဝ်ႈၼႆႉ ဝၼ်းတီႈ 19/10/2018 ယၢမ်းၵၢင်ၼႂ် ၸၢႆးဢၢႆႈမူၼ်း ဢႃယု 53 ပီ တင်း မေးၼၢင်း ၵႂႃႇပိတ်းၼဵင်ႈ ဢၼ် ယၢၼ်ၵႆဝၢၼ်ႈမွၵ်ႈ 13 လၵ်း ၼႂ်းၸႄႈဝဵင်းၼမ်ႉသၼ်ႇၼၼ်ႉ ၵေႃႉပဵၼ်ၽူဝ်ယဵပ်ႇၺႃးမၢၵ်ႇတႅၵ်ႇတိူဝ်ႉသႂ်ႇၶႃၾၢႆႇ ၶႂႃပုတ်းၵႂႃႇ ဝႃႈၼႆ။
ဢူးတဵင်းသေႃႇ ၵူၼ်းမိူင်းၼမ်ႉသၼ်ႇ လၢတ်ႈတီႈသိုဝ်ႇၶၢဝ်ႇ DVB ဝႃႈ “ ဢၼ်တိူဝ်ႉၺႃးတႄႉ ပဵၼ်ဢၢႆႈမူၼ်း ဢႃယု 53 ပီ။ တိူဝ်ႉၺႃးၶႃၾၢႆႇၶႂႃ တႄႇဢဝ်ႁူဝ်ၶဝ်ႇလူင်းတႂ်ႈ။ ၵေႃႉပဵၼ်မေးမၼ်းၸၢႆးလၢတ်ႈဝႃႈ ၶႃသွင်ၵေႃႉၽူဝ်မေးၵႂႃႇ ပိတ်းၼဵင်ႈ ၵေႃႉပဵၼ်ၽူဝ်မၼ်းၼၢင်းသမ်ႉ ၵႂႃႇဢွၼ်တၢင်း ယၢၼ်ၵႆမၼ်းၼၢင်း မွၵ်ႈ 20 ပေႇ။ မိူဝ်ႈၽွင်းမၢၵ်ႇတႅၵ်ႇ ၼၼ်ႉ မၼ်းၼၢင်းထၢင်ႇဝႃႈ ပဵၼ်မၢၵ်ႇလူင် ယူႇတီႈၵႆသေ ယိုဝ်းမႃး။ ပေႃးၵႂႃႇၸူးၽူဝ် ၵူဝ်ၺႃးယိုဝ်းလႄႈ ၼႅတ်ႈလႅၼ်ႈ ၵႂႃႇပွၵ်ႈႁွင်ႉၵူၼ်းလူင် ၽူႈၵွၼ်းဢိူင်ႇမႃးၸွႆႈ။ ႁဵတ်းၼၼ်သေ ၸွႆႈထႅမ်ဢဝ်တူဝ်ဢၢႆႈမူၼ်းၵႂႃႇႁူင်းယႃ” ဝႃႈၼႆ။
မိူဝ်ႈဝၼ်းတီႈ 18 ယၢမ်းၵၢင်ၶမ်ႈၼၼ်ႉၵေႃႈ ၵူၼ်းၼုမ်ႇဢႃယု 23 ပီ ၶီႇရူတ်ႉၶိူင်ႈ လုၵ်ႉတီႈသူၼ်ပွၵ်ႈႁိူၼ်း ၽႃႇၺႃး မၢၵ်ႇတႅၵ်ႇ တႅၵ်ႇတိူဝ်ႉသႂ်ႇ ၼႂ်းၵႄႈၼမ်ႉသၼ်ႇ တင်းမိူင်းငေႃႉ မၢတ်ႇၸဵပ်းတိူဝ်ႉႁႅင်းလၢႆတီႈသေ လႆႈသူင်ႇယူတ်းယႃ တူဝ်ဝႆႉတီႈႁူင်းယႃ ၼင်ႇၵဝ်ႇ ဝႃႈၼႆ။
