ပလိၵ်ႈထႆး ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ တီႉလႆႈယႃႈမႃႉ ၶၼ်ငိုၼ်း 20 လၢၼ်ႉဝၢတ်ႇပၢႆ ဢၼ်လုၵ်ႉတၢင်း ၼႃႈလိၼ်သိုၵ်းဝႃႉ ၵုမ်းၵမ်တၢင်းၸိုင်ႈတႆးပွတ်းၸၢၼ်းလႅၼ်လိၼ်တႆး – ထႆးသေၶဝ်ႈ ဝႃႈၼႆ။
ဝၼ်းတီႈ 14/10/2018 ၼၼ်ႉ ပလိၵ်ႈထႆး လႆႈႁပ်ႉသၢႆၶၢဝ်ႇၸႅင်ႈၸူးသေ လႆႈၸတ်းပလိၵ်ႈၾၢႆႇႁူမ်ႇလူမ်ႈ ဢိၵ်ႇထႅင်ႈ ပလိၵ်ႈလၢႆလၢႆၾၢႆႇသေ ပႂ်ႉၵူတ်ႇထတ်း ယႃႈမဝ်းၵမ် ဢၼ်လုၵ်ႉတၢင်း သၢမ်ၸဵင်ႇၶမ်း ၶဝ်ႈၵႂႃႇတၢင်း ၸႄႈတွၼ်ႈၵဵင်း ႁၢႆး ၼႂ်းၸိုင်ႈထႆးပွတ်းတွၼ်ႈၼိူဝ်ၼၼ်ႉ တီႉလႆႈယႃႈမႃႉ တင်းၼမ်လၢႆ ဢၼ်လၵ်ႉတေႃႉသူင်ႇၶဝ်ႈၼႂ်းမိူင်းထႆး ဝႃႈၼႆ။
သိုဝ်ႇၶၢဝ်ႇ VOA ဢွၵ်ႇဝႆႉဝႃႈ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၼႂ်းၸႄႈတွၼ်ႈၵဵင်းႁၢႆး ၵေႃႉၼိုင်ႈလၢတ်ႈဝႃႈ “ မိူဝ်ႈ ဝၼ်းတီႈ 13 ၼၼ်ႉ ပဵၼ်ဝၼ်း ၸဝ်ႈမုၼ်ယႂ်ႇၶုၼ်ႁေႃၶမ်း ၶဝ်ႈသူၼ်မၢၵ်ႇႁၢၵ်ႈၶမ်း ၶွပ်ႈတဵမ် 2 ပီၵေႃႈၸႂ်ႈ ယဝ်ႉၵေႃႈ ပဵၼ်ဝၼ်းလိုဝ်ႈ ၵၢၼ်ၵေႃႈၸႂ်ႈသေ ၶဝ်ဢဝ်တိုဝ်းတၢင်းဢၼ်ၼႆႉသေ လၵ်ႉလွမ်တေႃႉသူင်ႇၶဝ်ႈမႃး။ ယူႇတီႈၾၢႆႇၸဝ်ႈ ၼႃႈတီႈႁဝ်းလႆႈ ႁပ်ႉႁူႉဝႆႉဝႃႈ ယႃႈမဝ်းၵမ်ၼႆႉ တေလုၵ်ႉတၢင်းၵဵင်းၶွင်သေ ၶဝ်ႈမႃးၼႆလႄႈ ႁဝ်းၶႃႈလႆႈတင်ႈလၢၼ်ႇ/ ၵဵတ်ႉတင်းဝၼ်း တင်းၶိုၼ်း ပႂ်ႉၵူတ်ႇထတ်း ရူတ်ႉၵႃးၵႂႃႇမႃး။ ၵူတ်ႇထတ်းၺႃးၵႃး 3 လမ်း။ ၼႂ်းၵႃးၼၼ်ႉ တီႉလႆႈယႃႈ မႃႉ တင်းယႃႈဢႆႊသ်။ ၵူၼ်းဢၼ် လၵ်ႉတေႃႉၶဝ်ႈမႃးၼၼ်ႉၵေႃႈ ပဵၼ်ၵူၼ်းထႆး 3 ၵေႃႉ။ ၼႂ်းၼၼ်ႉ ၵေႃႉၼိုင်ႈတၼ်း ပၢႆႈလွတ်ႈဝႆႉ။ ယႃႈ မဝ်းၵမ်ၼႆႉ တွၵ်ႇမိၵ်ႈ မၢႆဝႆႉ 999 တူဝ်၊ ယႃႈၸိူဝ်းၼႆႉ လုၵ်ႉတၢင်းဝႃႉပွတ်းၸၢၼ်းၶဝ်ႈမႃး” ဝႃႈၼႆ။
ၼႂ်းဝၼ်းလဵဝ်ၼၼ်ႉၵူၺ်း တီႉလႆႈထႅင်ႈ ယႃႈမႃႉ သႂ်ႇထူင်ၸၢၼ်ႈဝႆႉတီႈၼႂ်းထိူၼ်ႇ ၼႂ်းၸႄႈတွၼ်ႈၵဵင်းႁၢႆးလႄႈ ၸႄႈ ဝဵင်းမႄႈလၢဝ်းထႅင်ႈ 50 ထူင် တေမႅၼ်ႈၶၼ်ငိုၼ်း 10 လၢၼ်ႉဝၢတ်ႇပၢႆ ဝႃႈၼႆ။
ၼႂ်းပီ 2018 ၼႆႉမႃး ပလိၵ်ႈထႆး တီႉလႆႈယႃႈမဝ်းၵမ် ဢၼ်လုၵ်ႉတၢင်းၵဵင်းႁၢႆးၶဝ်ႈ တေမီးၶၼ်ငိုၼ်း 220 လၢၼ်ႉဝၢတ်ႇပၢႆယဝ်ႉ ဝႃႈၼႆ။
ၶေႃႈမုလ်း – Burmese.voanews
