ပီႈၼွင်ႉၸိူဝ်ႉၶိူဝ်းလုၵ်ႈလၢင်း ၸဝ်ႈသူၺ်ႇတႅၵ်ႈ ၸဝ်ႈၾႃႉလူင်မိူင်းယွင်ႁူၺ်ႈ ဢိၵ်ႇၽူႈတႅၼ်ႈသၽႃးလႄႈပီႈၼွင်ႉ ၵူၼ်းမိူင်း ဢွၼ်ၵၼ်ဢဝ်ႁုၼ်ႇႁၢင်ႈ တွင်းၸဝ်ႈ သူၺ်ႇတႅၵ်ႈ ၵႂႃႇဝၢင်းတမ်း/ပၵ်းတီႈ ၶုမ်ၵုတ်းမၼ်းၸဝ်ႈ တႃႇႁႂ်ႈပဵၼ် တီႈမၢႆတွင်း ဝႃႈၼႆ။

မိူဝ်ႈၼႆႉ ဝၼ်းတီႈ 19/10/2018 ယၢမ်းၵၢင်ၼႂ် 9 မူင်း ပီႈၼွင်ႉၸိူဝ်ႉၶိူဝ်းလုၵ်ႈလၢင်း ၸဝ်ႈသူၺ်ႇတႅၵ်ႈ ၸဝ်ႈၾႃႉ ယွင်ႁူၺ်ႈ ႁူမ်ႈတင်း ၵူၼ်းမိူင်း၊ ၸုမ်းတူင်ႇၼိုင်တူင်ႇဝူင်းၵူၼ်း၊ ၽူႈတႅၼ်းသၽႃး၊ ပႃႇတီႇၵၢၼ်မိူင်းလႄႈ ႁွင်ႈၵၢၼ် လူင်ပွင်ၸိုင်ႈ ဢွၼ်ၵၼ်ၼမ်းဢဝ်ႁုၼ်ႇႁၢင်ႈ ၸဝ်ႈသူၺ်ႇတႅၵ်ႈ ဢၼ်လေႃႇ(သွၼ်း) တီႈႁေႃယွင်ႁူၺ်ႈသေ ပၼ်ႇ လဵပ်ႈဝဵင်းယွင်ႁူၺ်ႈ ၼမ်းဢဝ်ၵႂႃႇတီႈဝတ်ႉ/ ၵျွင်းၵၢၼ်ႇၵျီး။ လိူဝ်ၼၼ်ႉ ၵၢပ်ႈသွမ်းဝၼ်းသင်ၶၸဝ်ႈလႄႈ လဵင်ႉလူ ပီႈၼွင်ႉၶႅၵ်ႇတီႈၼၼ်ႈသေ ဝၢႆးၼၼ်ႉ ၶၢဝ်းယၢမ်းၵၢင်ဝၼ်း 11 မူင်း ၸင်ႇၼမ်းဢဝ်ႁုၼ်ႇႁၢင်ႈၵႂႃႇဝၢင်းတမ်းတီႈ ၶုမ်ၵုတ်းၸဝ်ႈသူၺ်ႇတႅၵ်ႈ ဢၼ် မီးႁိမ်းႁေႃၵဝ်ႇယွင်ႁူၺ်ႈၼၼ်ႉ ဝႃႈၼႆ။

ၸဝ်ႈႁေႇမႃႇတႅၵ်ႈလုၵ်ႈယိင်းၸဝ်ႈၾႃႉလူင် ၸဝ်ႈသူၺ်ႇတႅၵ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ဝၼ်းတီႈ 19 ႁဝ်းၶႃႈ ၸင်ႇဢဝ်ႁုၼ်ႇႁၢင်ႈၵႂႃႇတီႈၵျွင်းၵၢၼ်ႇၵျီး ၵျွင်းဢၼ်ၸဝ်ႈပေႃႈတႄႇတင်ႈဝႆႉၼၼ်ႉသေ ၵၢပ်ႈသွမ်းလဵင်ႉ လူၶႅၵ်ႇ။ ယဝ်ႉၼၼ်ႉ ၸင်ႇပႃးၵၼ်ၵႂႃႇဝၢင်းႁၢင်ႈ တွင်းၼႃႈၶုမ်ၵုတ်း ၽိတ်ႈမွၵ်ႈဝႆႉပီႈၼွင်ႉတႆးၵူႈမူႇၵူႈၸုမ်းမႃးၶဝ်ႈႁူမ်ႈ” ဝႃႈၼႆ။

လုၵ်ႉဢဝ်တီႈဝတ်ႉၵျွင်းၵၢၼ်ႇၵျီးသေ မီးပီႈၼွင်ႉၵူၼ်းမိူင်း ၸုမ်းတူၼ်ႈတီး၊ ထုင်ႉပူင်း၊ ပၢင်လူင်၊ ၼွင်ႁၢႆးယႃႈ ဢိၵ်ႇ လၢႆလၢႆတီႈဢမ်ႇယွမ်း 500 ၵေႃႉ တင်ႈထႅဝ်ၶဝ်ႈႁူမ်ႈပႆတၢင်းၵႂႃႇၸူးၶုမ်ၵုတ်းၸဝ်ႈၾႃႉလူင် ၸဝ်ႈသူၺ်ႇတႅၵ်ႈ။ တီႈ ၶုမ်ၵုတ်းၼၼ်ႉ မီးပၢင်လၢတ်ႈပိုၼ်းတူဝ်ၸဝ်ႈၾႃႉလူင်သေ ပၵ်းဝၢင်းႁုၼ်ႇႁၢင်ႈ။ ၶုမ်ၵုတ်းၸဝ်ႈၾႃႉ ဢၼ်မီး တေႃႇ ၼႃႈ ႁေႃၵဝ်ႇယွင်ႁူၺ်ႈၼၼ်ႉ တင်ႈတႄႇပီ 1962 ဢမ်ႇမီးၽႂ်လုမ်းလႃး၊ ပီဢွၼ် 2015 ၼၼ်ႉ လုၵ်ႈလၢင်း ၸိူဝ်ႉၶိူဝ်းလႆႈ တၢင်ႇလိၵ်ႈယွၼ်းဢၼုၺၢတ်ႈတီႈလူင်ပွင်ၸိုင်ႈသေ ၶိုၼ်းမႄးပတ်းၽဵဝ်ႈၽုၵ်ႇမွၵ်ႇၶုတ်းၼွင်ၼမ်ႉဝႆႉ။

ႁုၼ်ႇႁၢင်ႈၸဝ်ႈသူၺ်ႇတႅၵ်ႈၼႆႉ တင်းသုင်မီး 6 ထတ်း၊ ၼမ်ႉၼၵ်း 300 ၸွႆႉပၢႆ။ ဢဝ်တွင်းသေလေႃႇ(သွၼ်း)ဝႆႉ တေ တူၵ်းၶၼ်ငိုၼ်း မွၵ်ႈ 60 သႅၼ်ပျႃး။ တႄႇႁဵတ်းႁုၼ်ႇႁၢင်ႈၼႆႉမႃး မိူဝ်ႈဝၼ်းတီႈ 08/07/2018 ယဝ်ႉတူဝ်ႈၵႂႃႇ မိူဝ်ႈ ဝၼ်းတီႈ 12/10/2018။ ၼႂ်းဝၼ်းတီႈ 13/10/2018 လႆႈၼမ်းဢဝ်ႁုၼ်ႇႁၢင်ႈ ၸဝ်ႈသူၺ်ႇတႅၵ်ႈမႃးဝႆႉတီႈ ႁေႃယွင် ႁူၺ်ႈဝႆႉယဝ်ႉ။ ႁုၼ်ႇႁၢင်ႈၸဝ်ႈသူၺ်ႇတႅၵ်ႇ ဢၼ်လေႃႇသွၼ်းဝႆႉၼႆႉ လူင်ပွင်ၸိုင်ႈမိူင်းတႆးပၼ်ဢၼုၺၢတ်ႈႁႂ်ႈသႂ်ႇ ၶူဝ်းၸွမ်ၸိုင်ႈၵူၺ်း ဝႃႈၼႆ။

ၸဝ်ႈသူၺ်ႇတႅၵ်ႈၼႆႉ လႆႈထုၵ်ႇယုၵ်ႉတၢင်ႇပဵၼ် ၸွမ်ၸိုင်ႈမိူင်းႁူမ်တုမ်ၵေႃႉႁႅၵ်ႈ။ ပဵၼ်ၸဝ်ႈၾႃႉ ဢၼ်ၶဝ်ႈ ပႃးတူင်ႉ ၼိုင် ၸွမ်းၼႂ်းၵၢၼ်လိၵ်ႈႁူမ်ႈမၢႆပၢင်လူင်ၸဝ်ႈၼိုင်ႈ၊ မၼ်းၸဝ်ႈ ၼွၼ်းၽႄး ၵႂႃႇမိူဝ်ႈပီ 1962 ၼူဝ်ႊဝႅမ်ႊၿိူဝ်ႊ ဝၼ်း တီႈ 21။ မၼ်းၸဝ်ႈၼႆႉ ထုၵ်ႇသိုၵ်းလူင်ပွင်ၸိုင်ႈမၢၼ်ႈၵုမ်းၶင်ၵႂႃႇ ဝႃႈၼႆ။