ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း NCA လႄႈ ၸိူဝ်းပႆႇလူင်းလၢႆးမိုဝ်း (PPST လႄႈ FPNCC) တေ ႁူပ်ႉဢုပ်ႇၵၼ် တင်းမူတ်း ၼႂ်းဝူင်ႈတီႈသွင် လိူၼ်ၼူဝ်ႊဝႅမ်ႊၿိူဝ်ႊ 2018 တေမႃးၼႆႉ။

ဢိင်ၼိူဝ် ပၢင်ၵုမ်သႅၼ်းၽူႈၼမ်းသုင်သုတ်း မၢႆတွင်းဝၼ်းလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၶွပ်ႈ တဵမ် 3 ပီ မိူဝ်ႈဝၼ်းတီႈ 15 လိူၼ်ၼႆႉသေ ယူႇတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်း NCA တင်း ၾၢႆႇလူင်ပွင်ၸိုင်ႈလႄႈ တပ်ႉမတေႃႇ ႁူပ်ႉဢုပ်ႇၵၼ်တီႈႁူင်းႁႅမ်းသူၺ်ႇၸၢမ်ႇဢဵင်ႇ (ရွှေစံအိမ် ဟိုတယ်) ၼေႇ ပျီႇတေႃႇၼၼ်ႉ ဢုပ်ႇဢူဝ်းတူၵ်းလူင်းလႆႈၸႂ်ၵၼ်ၵႂႃႇ တင်း 7 ႁူဝ်ၶေႃႈ။ ၵူၺ်းၵႃႈ တွၼ်ႈတႃႇမူႇပိူင်ၵၢၼ် ဢမ်ႇၽၢတ်ႇ ဢွၵ်ႇမိူင်းႁူမ်ႈတုမ်ၼၼ်ႉ ပႆႇတူၵ်းလူင်းလႆႈၸႂ်ၵၼ် ယူႇတီႈတၢင်းၾၢႆႇၸၢဝ်းၶိူဝ်း 10 ၸုမ်း တေႁူပ်ႉဢုပ်ႇၵၼ် တင်း ၸုမ်းၸိူဝ်းပႆႇလူင်းလၢႆးမိုဝ်း NCA ၵွၼ်ႇ ၸင်ႇတေႁူပ်ႉဢုပ်ႇၵၼ်ထႅင်ႈၵမ်းၼိုင်ႈ ဝႃႈၼႆ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 3 RCSS/SSA လႄႈၽူႈၶၢၼ်ပၢၵ်ႇ EAOs လၢတ်ႈတီႈၽူႈတွႆႇႁွၵ်ႈဝႃႈ “ ယိူင်း ဢၢၼ်းတႄႉ ဝႃႈၼၼ်ယဝ်ႉ ၵူၺ်းၵႃႈ မၼ်းဢိင်ၼိူဝ်ဢၼ်ႁဝ်းႁၢင်ႈႁႅၼ်း ၸွင်ႇမၼ်းတေ ၸေးၵၼ်/ ၸုင်ႇၵၼ်ႁိုဝ် ဢၼ်မၼ်းတေပဵၼ်ၸိူင်ႉၼၼ်။ ယိူင်းဢၢၼ်းဝႆႉတႄႉၵေႃႈဝႃႈ တေၸတ်း ၼႂ်းဝူင်ႈတီႈ 2 ၼႂ်းလိူၼ်ၼႃႈ။ တီႈမၼ်း တႄႉ တေႁဵတ်းတီႈလႂ်ဢၼ်ဝႃႈၼၼ်ႉ ပႆႇဢုပ်ႇၵၼ်၊ ၶၵ်ႉတွၼ်ႈႁၢင်ႈႁႅၼ်းၼႆႉ မၼ်း တေၼမ်။ တၢင်းႁၼ်ထိုင်တီႈ သုၼ်ႇတူဝ်ႁဝ်းတႄႉ မၼ်းတေယၢပ်ႇဝႆႉ ပေႃးလိူၼ်ၼႃႈ ဝူင်ႈတီႈသွင်ၼၼ်ႉ ႁဝ်းပႂ်ႉတူၺ်းငဝ်းလၢႆးႁၢင်ႈႁႅၼ်း ႁဝ်း ႁၢင်ႈႁႅၼ်းထိုင်ၸၼ်ႉလႂ် ပေႃးၸဵဝ်းႁၢင်ႈႁႅၼ်းလႆႈလီၵေႃႈ ႁဝ်း တေၸဵဝ်းၸၢင်ႈၸတ်း ငဝ်းလၢႆးမၼ်းတႄႉပဵၼ်ဝႆႉ ၸိူင်ႉၼင်ႇၼႆ” ဝႃႈၼႆ။

ၼႂ်းပၢင်ၵုမ်သႅၼ်းၽူႈၼမ်းသုင်သုတ်း တႃႇၶၢဝ်းတၢင်း 2 ဝၼ်း ဢၼ်ၸတ်းႁဵတ်းတီႈၼေႇပျီႇတေႃႇၼၼ်ႉ လွင်ႈ ၽၢတ်ႇဢွၵ်ႇ၊ ဢမ်ႇၽၢတ်ႇဢွၵ်ႇ မိူင်းႁူမ်ႈတုမ်မိူင်းမၢၼ်ႈ ဢၼ်ဝႃႈၼၼ်ႉ ပႆႇမီးလွင်ႈတူၵ်းလူင်း တႅပ်းတတ်းလႆႈၸႂ် သင်ၵၼ် ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵမ်းလိုၼ်းသုတ်း ၸင်ႇဝႃႈ ပေႃးထိုင်မႃး လိူၼ်ၼႃႈ ၼႂ်းလိူၼ်ၼူဝ်ႊဝႅမ်ႊၿိူဝ်ႊမႃး ၶိုၼ်းမႃးႁူပ်ႉ ၵၼ်ထႅင်ႈၵမ်းၼိုင်ႈသေ ၸင်ႇၶိုၼ်းဢုပ်ႇၵၼ် ၾၢႆႇၸၢဝ်းၶိူဝ်းၵေႃႈ မီးတၢင်းလိူၵ်ႈၸိူင်ႉႁိုဝ် ႁႂ်ႈႁႃမႃးလွၵ်းလၢႆး 3 လၢႆး၊ ၾၢႆႇလူင်ပွင်ၸိုင်ႈၵေႃႈမီးတၢင်းလိူၵ်ႈၸိူင်ႉႁိုဝ် ႁႂ်ႈႁႃမႃးလွၵ်းလၢႆး 3 လၢႆးလႄႈ ႁႂ်ႈၶိုၼ်းမႃးငူပ်ႉငီႉၶိုၼ်းထႅင်ႈၵမ်းၼိုင်ႈ ဝႃႈၼႆ။

ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA (PPST) သမ်ႉမီး ၶွင်ႇ သီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး (RCSS/SSA) ၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်းႁူမ်ႈ ၸိူဝ်ႉၸၢတ်ႈၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈတုမ် ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ(ALP)၊ ၸုမ်းလႃးႁူႇတီႇမူဝ်ႊ ၶရႅတ်ႉတိၵ်ႉ LDU လႄႈ ၸုမ်းပႃႇတီႇမိူင်းမွၼ်းမႂ်ႇ NMSP ၸိူဝ်းၼႆႉ။

ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်ပႆႇလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA (FPNCC) သမ်ႉ မီး ၸုမ်းဝႃႉ (UWSA)၊ ၸုမ်းၶၢင် (KIO)၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၊ ၸုမ်းၵူဝ်းၵၢင်ႉ MNDAA ၊ ၸုမ်းမိူင်းလႃး NDAA၊ ၸုမ်းတဢၢင်း TNLA လႄႈ ၸုမ်းရၶႅင်ႇ AA ၸိူဝ်းၼႆႉ။