ၸဝ်ႈၼႃႈတီႈပလိၵ်ႈထႆး ႁူမ်ႈၵၼ်တီႉၺွပ်း ၵူၼ်းမိူင်းတႃႈၶီႈလဵၵ်း ဢၼ်လၵ်ႉလွမ်ၶၢမ်ႈလႅၼ်လိၼ် ၶဝ်ႈမိူင်းထႆး။

ဝၼ်းတီႈ 17/10/2018 ၸဝ်ႈၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်း ဝဵင်းၵဵင်းႁၢႆး တီႉၺွပ်းၵူၼ်းမိူင်း တႃႈၶီႈလဵၵ်းၵူၼ်း ၸၢႆး 2 ၵေႃႉ ၵူၼ်းယိင်း 2 ၵေႃႉဢၼ်လုၵ်ႉၾင်ႇဝဵင်းတႃႈၶီႈလဵၵ်း လၵ်ႉၶၢမ်ႈၼမ်ႉၶဝ်ႈဝဵင်းမႄႈသၢႆ ပိူဝ်ႈဢႅဝ်ႇလႄႇလႄႈ     ႁဵတ်းၵၢၼ်ႁပ်ႉၸၢင်ႈ ၸိူဝ်းၼႆႉ။

ၼၢင်းယိင်း ၵူၼ်းတႃႈၶီႈလဵၵ်းလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မၢင်ပွၵ်ႈမၢင်လႂ်လူဝ်ႇႁိပ်ႈၵႂႃႇႁိပ်ႈမႃးလႄႈ ဢမ်ႇတၼ်း ၵႂႃႇႁဵတ်းဝႂ်ၶၢမ်ႈမၼ်းဢေႃႈ ၾၢႆႇၼိုင်ႈၵေႃႈ မၼ်းသုၵ်ႉသၵ်ႉၼႃႇ ၵႃႈၶၢမ်ႈမၼ်းၼႆႉၾၢႆႇမၢၼ်ႈၼိုင်ႈၵေႃႉၼိုင်ႈႁဵင်ဝႃႇပေႃးဢမ်ႇ ၸႂ်ႈဝႂ်ႁဵင်ၵေႃႈတိုၼ်းဢမ်ႇဢဝ်ၼၼ်ႉယဝ်ႉ လႆႈၵႂႃႇႁႃလႅၵ်ႈမႃးပၼ်ၶဝ် ၵွပ်ႈၼၼ်ၸင်ႇဢွၼ်ၵၼ်ၶၢမ်ႈတၢင်းၼမ်ႉမၼ်းဝႆးလီ ” ဝႃႈၼႆ။

ၸဝ်ႈၼႃႈတီႈ ၾၢႆႇၵူတ်ႇထတ်းၵူၼ်းၶဝ်ႈမိူင်း ဝဵင်းမႄႈသၢႆ ၸင်ႇတွင်ႈထၢမ်ဢဝ်ပိုၼ်းၵႅပ်ႈၸိူဝ်းၶဝ်ဝႆႉသေ ၵပ်းသိုပ်ႇႁႃၸဝ်ႈ ၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်း ဝဵင်းတႃႈၶီႈလဵၵ်း ႁႂ်ႈၸွႆႈၵူတ်ႇထတ်းပၵ်းတႃ ပႂ်ႉတူၺ်းလွင်ႈလၵ်ႉၶဝ်ႈမိူင်း ဝႃႈၼႆ။

လႅၼ်လိၼ်ထႆး – မၢၼ်ႈပွတ်းမိူင်းတႆးၼႆႉ မီးၽၵ်းတူၶဝ်ႈဢွၵ်ႇသွင်ၸိုင်ႈမိူင်း ဢၼ်ပဵၼ်တၢင်းၵၢၼ်ၼႆႉ မီးတီႈၶူဝ်မႄႈသၢႆ – တႃႈၶီႈလဵၵ်းတီႈလဵဝ်။ ၵူၼ်းၶဝ်ႈဢွၵ်ႇၵႂႃႇမႃး တႃႇဢႅဝ်ႇယဵမ်ႈ တႃႇႁဵတ်းၵၢၼ် မီးၼပ်ႉႁဵင်ၵူႈဝၼ်း။ ၵႃႈၶၢမ်ႈလႅၼ်လိၼ်ဢၼ်လုၵ်ႉၾင်ႇတႃႈၶီႈလဵၵ်းၶၢမ်ႈၶူဝ်ၶဝ်ႈမႄႈသၢႆ 1ၵေႃႉလႆႈသဵင်ႈ ၾၢႆႇမၢၼ်ႈ 1,000 ၵျၢတ်ႉ၊ ၾၢႆႇထႆး 10 ၿၢတ်ႇသေ ဢၼ်လုၵ်ႉမႄႈသၢႆတေၵႂႃႇတႃႈၶီႈလဵၵ်းသမ်ႉ 1 ၵေႃႉလႆႈ သဵင်ႈတီႈလုမ်းၸႄႈဝဵင်း 30 ၿၢတ်ႇ ၾၢႆႇတၢင်းမၢၼ်ႈလႆႈသဵင်ႈ 10 ၿၢတ်ႇ ၊ ပေႃးပဵၼ်ၵူၼ်းတႃႈၶီႈလဵၵ်းသေ ႁဵတ်းပပ်ႉလၢႆးပီသမ်ႉ လႆႈသဵင်ႈၼိုင်ႈပွၵ်ႈၾၢႆႇမၢၼ်ႈ 300 ၵျၢတ်ႉ လႄႈၾၢႆႇထႆး 10 ၿၢတ်ႇ။