လႅၼ်လိၼ်တႆး – ၶႄႇ ၸႄႈဝဵင်းမူႇၸေႊၼၼ်ႉ ၸဝ်ႈၼႃႈတီႈၶႄႇ ပႃးၵွင်ႈၸေးမိုဝ်းၶၢမ်ႈလႅၼ်လိၼ်ၶဝ်ႈမႃး ႁၢမ်ႈႁႄႉ ၵူၼ်းမိူင်းမူႇၸေႊဢမ်ႇပၼ်သၢင်ႈလုမ်းၶွမ်ႊမတီႊၵၢတ်ႇၸၢင်ႉၽိူၵ်ႇတီႈၼိူဝ်လႅၼ်လိၼ် ႁဵတ်းႁႂ်ႈၵူၼ်းမိူင်း တူၵ်းၸႂ် တိုၼ်ႇသၢၼ်ႈ ဝႃႈၼႆ။

ဝၼ်းတီႈ 17/10/2018 ယၢမ်းၵၢင်ၼႂ် 8 မူင်း ၸဝ်ႈၼႃႈတီႈၾင်ႇမိူင်းၶႄႇ ပႃးၵွင်ႈၸေးမိုဝ်းမွၵ်ႈ 20 ၵေႃႉ ၶဝ်ႈမႃး ၾင်ႇၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇသေ ထဵင်မေႃးလွင်ႈပူၼ်ႉပႅၼ်ၶဝ်ႈတီႈလိၼ် ၾင်ႇမိူင်းၶႄႇၶဝ် ဝႃႈၼႆ။

ၸၢႆးဢေး ၵူၼ်းမိူင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ပၼ်ႁႃၵၼ်တီႈ တၢင်းၶဝ်ႈဢွၵ်ႇ ၸၢင်ႉၽိူၵ်ႇ။ တေႃႈ လဵဝ် ဢၼ်တိုၵ်ႉၵေႃႇသၢင်ႈလုမ်းၶွမ်ႊမတီႊၵၢတ်ႇၸၢင်ႉၽိူၵ်ႇၼၼ်ႉ ၶႄႇၶဝ်ဝႃႈ မၼ်းပူၼ်ႉ ၶဝ်ႈၼႂ်းလိၼ် ၶႄႇၼႆသေ ၶဝ်ၶဝ်ႈမႃးႁၢမ်ႈႁႄႉ” ဝႃႈၼႆ။

သိုပ်ႇလၢတ်ႈဝႃႈ ဢၼ်ၸဝ်ႈၼႃႈတီႈၶႄႇ ပႃးၵွင်ႈၵၢင်ႇၸေးမိုဝ်းၶဝ်ႈမႃးၼၼ်ႉ ႁဵတ်းႁႂ်ႈၵူၼ်းမိူင်းႁဝ်းၶႃႈပဵၼ်ဢၼ် တူၵ်းၸႂ်တႄႉ။ တွၼ်ႈတႃႇသၢင်ႈလွင်ႈမိုတ်ႈၵိုဝ်းလႄႈ လွင်ႈႁူမ်ႇလူမ်ႈသွင်မိူင်းၼႆႉ မၼ်းဢမ်ႇတၢပ်ႈလူဝ်ႇဢဝ်ၵွင်ႈၵၢင်ႇ ပႃးၶဝ်ႈမႃးၸိူင်ႉၼႆၵေႃႈလႆႈ။ သင်ဝႃႈ ယူႇတီႈပလိၵ်ႈၾၢႆႇၶႄႇၶဝ် ႁၢမ်ႈႁႄႉၼႆၵေႃႈ ႁႂ်ႈဢုပ်ႇၸွမ်းၾၢႆႇၽူႈမီးပုၼ်ႈၽွၼ်း တၢင်းမိူင်းမၢၼ်ႈသေၵွၼ်ႇ လွင်ႈၼႆႉ ႁႂ်ႈမၼ်းၵႂႃႇၸွမ်းပဵၼ်ၶၵ်ႉပဵၼ်တွၼ်ႈ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ပလိၵ်ႈမၢၼ်ႈၼႂ်းၸႄႈဝဵင်းမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပလိၵ်ႈၾင်ႇမိူင်းၶႄႇ ပႃးၵွင်ႈၵၢင်ႇၸေးမိုဝ်းၵၼ်သေ ၶဝ်ႈမႃးတၢင်းႁူဝ်ႉလဵၵ်း ဢၼ်ၶၢတ်ႈဝႆႉၼၼ်။ ၶဝ်ဝႃႈ လုမ်းၶွမ်ႊမတီႊၵၢတ်ႇၸၢင်ႉ ၽိူၵ်ႇၼႆႉ ပူၼ်ႉပႅၼ်ၶဝ်ႈလိၼ်ၶဝ်ၼႆဝႃႇ။ လွင်ႈၵေႃႇသၢင်ႈႁဵတ်းလုမ်းၶွမ်ႊမတီႊၵၢတ်ႇၼၼ်ႉ တေႃႈလဵဝ် လႆႈၵိုတ်း ယင်ႉဝႆႉၵမ်းၼိုင်ႈ။ လွင်ႈသိုၵ်းၶႄႇယိပ်းၵွင်ႈၶၢမ်ႈလႅၼ်လိၼ်ၶဝ်ႈမႃး မိူင်းမူႇၸေႊၼႆႉ ၾၢႆႇၽွင်းငမ်းၸႄႈတွၼ်ႈ မူႇၸေႊတႄႉဝႃႈ သူင်ႇလိၵ်ႈသၢၼ်ၶတ်းၸူးလူင်ပွင်ၸိုင်ႈၶႄႇဝႆႉယဝ်ႉ” ဝႃႈၼႆ။

ယၢမ်းလဵဝ်လႆႈႁူႉဝႃႈ ၵၢၼ်ၵေႃႇသၢင်ႈလုမ်းၶွမ်ႊမတီႊၵၢတ်ႇမူႇၸေႊၼၼ်ႉ လႆႈၵိုတ်းယင်ႉဝႆႉယဝ်ႉ ဝႃႈၼႆ။

လႅၼ်လိၼ်ၶႅၼ်ႈ တႆး – ၶႄႇ တၢင်းၼႂ်းၸႄႈတွၼ်ႈမူႇၸေႊၼၼ်ႉ ၵႆႉလႆႈထဵင်မေႃးၵၼ် ယူႇတႃႇသေႇ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 19 လိူၼ်သႅမ်ႊထႅမ်ႊၿိူဝ်ႊ 2018 ၼၼ်ႉၵေႃႈ တီႈလႅၼ်လိၼ် တႆး – ၶႄႇ တၢင်းဝၢၼ်ႈၾၢႆၵွင်း ၼႂ်းဝဵင်းပၢင်ႇသၢႆး လႄႈ မိူင်းၵူဝ်း ၸႄႈတွၼ်ႈမူႇၸေႊၼၼ်ႉၵေႃႈ ပလိၵ်ႈၶႄႇ မႃးလွမ်ႉႁူဝ်ႉၶၢတ်ႈပႅတ်ႈဝႆႉ ဝႃႈၼႆ။