ၽွင်းၽူႈၼမ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း 10 ၸုမ်း ႁူပ်ႉထူပ်းဢုပ်ႇဢူဝ်းၵၼ် တီႈၼေႇပျီႇတေႃႇၼၼ်ႉ သိုၵ်းပ ဢူဝ်း PNLA လႄႈတပ်ႉသိုၵ်းၸိုင်ႈတႆး RCSS/SSA ပဵၼ်ပၢင်တိုၵ်းၵၼ် ပွတ်းမိူင်းပၼ်ႇ ၼႂ်းဝၼ်းလဵဝ် ပဵၼ် 2 ပွၵ်ႈ။
ဝၼ်းတီႈ 16/10/2018 ယၢမ်းၵၢင်ၼႂ် မွၵ်ႈ 5:45 မူင်းၼၼ်ႉ သိုၵ်းပဢူဝ်း PNLA တင်း သိုၵ်းတႆး RCSS/SSA လႆႈပဵၼ်ပၢင်တိုၵ်းၵၼ် တီႈလွႆၵွင်းမူး ၾၢႆတူၵ်းဝၢၼ်ႈမႆႉပူၵ်ႇ ဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း သွင်ၾၢႆႇမီးလွင်ႈမၢတ်ႇၸဵပ်းၼင်ႇၵၼ် ဝႃႈၼႆ။
ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇလုမ်းၵၢပ်းသၢၼ် RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ တၢင်းပွတ်းတွၼ်ႈၼၼ်ႉ မၼ်းပဵၼ်ၼႃႈတီႈသိုၵ်းႁဝ်းၶႃႈတူင်ႉၼိုင်ၵႂႃႇမႃးယူႇတႃႇသေႇ။ တီႈတႄႉမၼ်းသိုၵ်းၶဝ်ၼႆႉ တူင်ႉၼိုင်ယူႇတၢင်းပွတ်း ၵၼ်ႇတူးၼၼ်ႉၵူၺ်း တၢင်းပွတ်းတွၼ်ႈၼႆႉ သိုၵ်းပဢူဝ်း တူင်ႉၼိုင်ၵႂႃႇမႃး ဢမ်ႇယၢမ်ႈမီးမႃး။ ၵဵဝ်ႇလူၺ်ႈလွင်ႈၼႆႉ ႁဝ်းၶႃႈ ၵပ်းၸူးလုမ်းၵပ်းသၢၼ် သိုၵ်းပဢူဝ်းၶဝ်ၵေႃႈ ၶဝ်တွပ်ႇလၢတ်ႈဝႃႈ ၶဝ်ဢမ်ႇလႆႈႁူႉ” ဝႃႈၼႆ။
ၸဝ်ႈသိုၵ်းၸၢႆးဢူး သိုပ်ႇလၢတ်ႈဝႃႈ “ ပၢင်တိုၵ်းၼႆႉ လွင်ႈမၢတ်ႇၸဵပ်းမီးယူႇတင်းသွင်ၾၢႆႇ ၵူၺ်းၵႃႈ ဢမ်ႇလႆႈႁူႉ တႅတ်ႈ တေႃး ၾၢႆႇသိုၵ်းပဢူဝ်း မီးဢဵၼ်ႁႅင်း မွၵ်ႈ 15-16 ၵေႃႉ။ ၼႂ်းဝၼ်းၼၼ်ႉ ၼႂ်းပွတ်းတွၼ်ႈၼၼ်ႉၵူၺ်း လႆႈပဵၼ်ပၢင် တိုၵ်းၵၼ် 2 ပွၵ်ႈ။ ၵၢင်ၼႂ်ပွၵ်ႈၼိုင်ႈလႄႈ ဝၢႆးဝၼ်းပွၵ်ႈၼိုင်ႈ” ဝႃႈၼႆ။
သိုဝ်ႇၶၢဝ်ႇတႆးလွတ်ႈလႅဝ်းၶွင်တပ်ႉသိုၵ်း RCSS/SSA ဢွၵ်ႇဝႆႉဝႃႈ သိုၵ်းပဢူဝ်း PNLA ၼႆႉၵႂႃႇတင်ႈပၵ်းတပ်ႉ တီႈ ဝၢၼ်ႈမႆႉပူၵ်ႇပၢင်ႇပိ ဢၼ်ပဵၼ်ၼႃႈတီႈတူင်ႉၼိုင် တပ်ႉသိုၵ်းၸိုင်ႈတႆး RCSS/SSA လူၺ်ႈဢမ်ႇမီး လွင်ႈၵပ်းသိုပ်ႇ ၵပ်းသၢၼ်ၸူး တပ်ႉသိုၵ်းၸိုင်ႈတႆး RCSS/SSA လႄႈ ၸင်ႇလႆႈပဵၼ်ပၢင်တိုၵ်းၵၼ်ဝႃႈၼႆ။
ၾၢႆႇၼိုင်ႈၵေႃႈ ဝၼ်းတီႈ 15 လႄႈ 16 လိူၼ်ဢွၵ်ႊထူဝ်ႊၿိူဝ်ႊၼႆႉ ယူႇတီႈႁူဝ်ၼႃႈတပ်ႉၸုမ်း တင်းသွင်ၾၢႆႇ ၵေႃႈ တိုၵ်ႉၵႂႃႇၶဝ်ႈႁူမ်ႈပၢင်ၵုမ်တီႈၼေႇပျီႇတေႃႇ ဢၼ်ပဵၼ်ပၢင်ၵုမ်သႅၼ်းၽူႈၼမ်းၸိၵ်းၸွမ် 10 + 10 ၼႂ်းတိုဝ်ႉတၢင်း ဝၼ်းလူင်းလၢႆးမိုဝ်းၵိုတ်းတိုၵ်း NCA တဵမ် 3 ပီ။ ဢၼ်မီးၽူႈၵိူဝ်းၵုမ်ၸိုင်ႈမိူင်း ဢွင်ႇသၢၼ်ႇၸူႉၵျီႇ၊ ၸွမ်ၸိၵ်းသိုၵ်း မိၼ်းဢွင်ႇလၢႆႇ၊ ၵႅမ်ၸွမ်ၸိၵ်းသိုၵ်းၸူဝ်းဝိၼ်းလႄႈ တူဝ်တႅၼ်းသၽႃးၶဝ်ၶဝ်ႈႁူမ်ႈၸွမ်းၼင်ႇၵၼ် ဝႃႈၼႆ။
သိုၵ်းပဢူဝ်း PNLA တင်း သိုၵ်းတႆး RCSS/SSA ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼင်ႇၵၼ်သေဢမ်ႇၵႃး ပဵၼ်ၼႂ်းလုၵ်ႈၸုမ်းၼႂ်း PPST ထႅင်ႈလူးၵွၼ်ႇ ဝႃႈၼႆ။
