ပၢင်ပွႆးမႁႃသတိပထၢၼ်ႇ ပၢင်ၵုမ်လူင် ၺီႇလႃႇၶၢမ်ႇသင်ၶၸဝ်ႈ ၼႂ်းၸိုင်ႈတႆး ၵမ်းထူၼ်ႈ 53 ၼႆႉ တေၸတ်းႁဵတ်းတီႈ ၸႄႈဝဵင်းၵဵင်းတုင် ဝႃႈၼႆ။
ဝၼ်းတီႈ 11/10/2018 ၶွမ်ႊမတီႊပွင်ပဵၼ်ပၢင်ပွႆး ၺီႇလႃႇၶၢမ်ႇ ၸႄႈဝဵင်းၵဵင်းတုင် ၵႂႃႇႁပ်ႉဢဝ် တုင်းသႃသၼႃတီႈ ဝတ်ႉ/ၵျွင်းတိူၵ်ႈၵမ်မထၢၼ်း ၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်းတွၼ်ႈတႃႇတေၸတ်းႁဵတ်းပၢင်ပွႆး မႁႃသတိ ပထၢၼ်ႇ ပၢင်ၵုမ်လူင် ၺီႇလႃႇၶၢမ်ႇသင်ၶၸဝ်ႈ ၼႂ်းၸိုင်ႈ တႆး ၵမ်းထူၼ်ႈ 53 တီႈၵဵင်းတုင်။
လုင်းၸၢႆးတၢၼ်း ၶွမ်ႊမတီႊပွင်ပဵၼ်ပၢင်ပွႆး ၺီႇလႃႇၶၢမ်ႇ ၸႄႈဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈတႄႇ မၼ်းတႄႉ ပီၼႆႉ တေႁဵတ်းတီႈဝၢၼ်ႈၸၢမ်မိူင်းမူႉ ၸႄႈဝဵင်းၼမ်ႉတူႈ။ ၵူၺ်းၵႃႈ တၢင်းပွတ်းၼမ်ႉတူႈၼၼ်ႉ မီးပၢင်တိုၵ်းသုၵ်ႉယုင်ႈဝႆႉလႄႈ ယွၼ်ႉၼၼ်ႉ ၶွမ်ႊမတီႊတၢင်းပွတ်းၵဵင်းတုင် ၸင်ႇၵႂႃႇတုင်းႁပ်ႉပုတ်ႈဢဝ်မႃး” ဝႃႈၼႆ။
ၼႂ်းၸိုင်ႈတႆးၸႄႈဝဵင်းဢၼ်မီး တိူၵ်ႈၵမ်မထၢၼ်း သတိပထၢၼ်ႇၼၼ်ႉ ပၼ်ႇပုတ်ႈၵၼ်သေ ၸတ်းႁဵတ်းပၢင်ၵုမ်လူင် ၺီႇလႃႇၶၢမ်ႇသင်ၶၸဝ်ႈ ၼႂ်းၸိုင်ႈတႆးၼႆႉ မႃးၵူႈပီ။ ပဵၼ်ပၢင်ၵုမ် သင်ၶၸဝ်ႈတိူၵ်ႈၵမ်မထၢၼ်းသတိပထၢၼ်ႇ ၸႄႈ ဝဵင်းၽႂ် ၸႄႈဝဵင်းမၼ်း ဢဝ်မႃးဢုပ်ႇဢူဝ်းလႅၵ်ႈလၢႆႈ တၢင်ႇလၢတ်ႈၼႄၵၼ် လွင်ႈၶိုၼ်ႈယႂ်ႇမႂ်ႇသုင်၊ လွင်ႈယူပ်ႈယွမ်း လႄႈ လွင်ႈတမ်းဝၢင်း ၼႃႈၵၢၼ်ၵႂႃႇထႅင်ႈတၢင်းၼႃႈ ၸဵမ်ၸိူဝ်းၼႆႉ။
ပၢင်ၵုမ်ၺီႇလႃႇၶၢမ်ႇ သင်ၶၸဝ်ႈၸိုင်ႈတႆး ဢၼ်တေၸတ်းႁဵတ်းတီႈၸႄႈဝဵင်းၵဵင်းတုင်ၼႆႉ တေဢၢၼ်းၸတ်းႁဵတ်း ၼႂ်းႁၢင်လိူၼ်ၾႅပ်ႊၿိဝ်ႊရီႊ ပီ 2019 တေထိုင်မႃးၼႆႉ တေၸတ်းႁဵတ်းတႃႇၶၢဝ်းတၢင်း 3 ဝၼ်း ဢွင်ႈတီႈၸတ်း ႁဵတ်း သမ်ႉပဵၼ်တီႈတိူၵ်ႈၵမ်မထၢၼ်းၸွမ်ၸႅင်ႈ ၸႄႈဝဵင်းၵဵင်းတုင် ဝႃႈၼႆ။
မိူဝ်ႈပီ 2017 ၼၼ်ႉ ပၢင်ၵုမ်ၺီႇလႃႇၶၢမ်ႇသင်ၶၸဝ်ႈၸိုင်ႈတႆး လႆႈၸတ်းႁဵတ်းမႃးတီႈတိူၵ်ႈၵမ်မထၢၼ်း ၸႄႈဝဵင်း မိူင်းၼၢႆး။ မိူဝ်ႈပီ 2016 သမ်ႉ ၸတ်းႁဵတ်းတီႈ တိူၵ်ႈၵမ်မထၢၼ်း ၸႄႈဝဵင်းလၢင်းၶိူဝ်း ဝႃႈၼႆ။
သုၼ်ငဝ်ႈငုၼ်းတိုဝ်းၵမ် ၵမ်မထၢၼ်း မူႇလမိၼ်းၵုၼ်းၼႆႉ ၼႂ်းမိူင်းတႆး ပတ်းပိုၼ်ႉ မီး 18 တီႈ (ၼႂ်း 18 ၸႄႈဝဵင်း) ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ