ယႃႈၾိၼ်ႇၽိူၵ်ႇ ဢၼ်လုၵ်ႉတၢင်းမိူင်းတႆးပွတ်းႁွင်ႇ တေတေႃႉသူင်ႇၵႂႃႇတၢင်းမိူင်းၵုတ်ႈၼၼ်ႉ ၺႃးပလိၵ်ႈၵူတ်ႇ ထတ်းတီႉလႆႈ ၵႃႈၶၼ်တေတူၵ်းမႅၼ်ႈငိုၼ်းမၢၼ်ႈ 1 မိုၼ်ႇသႅၼ်ပျႃးပၢႆ ဝႃႈၼႆ။

ဝၼ်းတီႈ 16/10/2018 ယၢမ်းၵၢင်ၼႂ် ၵျေႃႇၸူဝ်း(ႁွင်ႉ)ဢၢႆႈၸၢႆး တင်း ဢႃးယူင်ႇ ၶဝ်သွင်ၵေႃႉ တေႃႉဢဝ်ယႃႈၾိၼ်ႇ ၽိူၵ်ႇ လုၵ်ႉတၢင်းမိူင်းတႆးပွတ်းႁွင်ႇသေ တေတေႃႉသူင်ႇၵႂႃႇတၢင်းမိူင်းၵုတ်ႈၼၼ်ႉ ၺႃးပလိၵ်ႈၵူတ်ႇ ထတ်းတီႉလႆႈ တီႈဝၢၼ်ႈၺွင်ႇၵုင်း လႄႈ လႄႇၵျီး ၼႂ်းၸႄႈဝဵင်းမိူင်းၵုတ်ႈ ဝႃႈၼႆ။

ပလိၵ်ႈမၢၼ်ႈ ၸႄႈဝဵင်းမိူင်းၵုတ်ႈ လၢတ်ႈဝႃႈ “ တီႉလႆႈတူဝ်ၵူၼ်း ၵေႃႉၼိုင်ႈၵူၺ်း။ ထႅင်ႈၵေႃႉၼိုင်ႈတႄႉ ဝၢင်းရူတ်ႉ ၶိူင်ႈသေ ပၢႆႈလွတ်ႈ တေႃႈလဵဝ် တိုၵ်ႉလမ်းသွၵ်ႈတဝ်ႁႃတီႉယူႇ။ ၶဝ်ၼႆႉ ပဵၼ်ၵူၼ်းႁပ်ႉၵိၼ်ၸၢင်ႈတေႃႉသူင်ႇ။ တေႃႉ ဢဝ်တၢင်းမိူင်းတႆးပွတ်းႁွင်ႇသေ တေမႃးသူင်ႇပၼ်တီႈမိူင်းၵုတ်ႈ။ ယႃႈၾိၼ်ႇၼႆႉ ၶဝ်သႂ်ႇၼ်ႂ်း ထူင်ၸၢၼ်ႈသေ သႂ်ႇ ၼႂ်းသွင်းရူတ်ႉၶိူင်ႈၶဝ်မႃး”ဝႃႈၼႆ။

ယႃႈၾိၼ်ႇၽိူၵ်ႇၼႆႉ သႂ်ႇၼႂ်းၵွၵ်းသပ်ႈပျႃႇ တင်းမူတ်း 879 ၵွၵ်း ၼမ်ႉၼၵ်း 10,108.5 ၵရမ်ႊ တေတူၵ်းၶၼ်ငိုၼ်း 1 မိုၼ်ႇသႅၼ် ပျႃးပၢႆ ဝႃႈၼႆ။

ၵူၼ်း 2 ၵေႃႉ ဢၼ်လႆႈတေႃႉယႃႈၵႂႃႇတၢင်းမိူင်းၵုတ်ႈၼၼ်ႉ ပဵၼ်ၵျေႃႇၸူဝ်း (ႁွင်ႉ) ဢၢႆႈၸၢႆး ယူႇပွၵ်ႉ 3 ၸႄႈ ဝဵင်းၵျွၵ်ႉမႄး၊ ထႅင်ႈၵေႃႉၼိုင်ႈသမ်ႉ ပဵၼ်ဢႃးယူင်ႇ ပဵၼ်ၸၢဝ်းၶႄႇ ယူႇဝဵင်းသီႇပေႃႉ ဝႃႈၼႆ။