ငဝ်ႈငုၼ်းဝၢၼ်ႈႁႆး SSPP/SSA ၵႂႃႇႁပ်ႉတူဝ်ၼၢင်းမူဝ်ႁွမ် ၼႂ်းမိုဝ်းတပ်ႉသိုၵ်းတဢၢင်း TNLA သေမႃး မွပ်ႈယိုၼ်ႈ ပၼ်ၼႂ်းမိုဝ်းမုင်ႉႁေႃႁိူၼ်းမၼ်းၼၢင်းၶိုၼ်းတီႈငဝ်ႈငုၼ်းဝၢၼ်ႈႁႆး။ မီးၵူၼ်းၶဝ်ႈႁူမ်ႈႁပ်ႉၸွမ်း 200 ပႆ။
မိူဝ်ႈၼႆႉ ဝၼ်းတီႈ 17/10/2018 ယၢမ်းၵၢင်ၼႂ် 8:40 မူင်း ၸဝ်ႈသိုၵ်းၸၢႆးသူႉ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA ဢွၼ်ႁူဝ်သေ ၸတ်းႁဵတ်းပၢင်မွပ်ႈယိုၼ်ႈတူဝ်ၼၢင်းမူဝ်ႁွမ် ပၼ်ပီႈၼွင်ႉၸိူဝ်ႉၶိူဝ်း မုင်ႉႁေႃ ႁိူၼ်းမၼ်းၼၢင်းၶိုၼ်း တီႈငဝ်ႈငုၼ်းဝၢၼ်ႈႁႆး။ လိူဝ်ၼၼ်ႉ ၸတ်းႁဵတ်းပႃးပၢင်သပ်းၸႅင်ႈၶၢဝ်ႇ လွင်ႈၼၢင်းမူဝ်ႁွမ် ဢၼ်လႆႈပူၼ်ႉလွတ်ႈဢွၵ်ႇမႃး ဝႃႈၼႆ။
တၢင်းၾၢႆႇ SSPP/SSA ပဵၼ်ၸဝ်ႈသိုၵ်း ၸၢႆးသူႉ၊ ၸဝ်ႈသိုၵ်း ၸၢႆးသႅင်ႁၢၼ် ၽူႈၵွၼ်းႁူင်းႁဵၼ်းသိုၵ်းလႄႈ ၸဝ်ႈႁၢၼ် ၸၢႆးတၢၼ်းဢွင်ႇ ၶဝ်ပဵၼ်ၵေႃႉမွပ်ႈတူဝ်ၼၢင်းမူဝ်ႁွမ်ပၼ် ၼႂ်းမိုဝ်းပီႈၼွင်ႉၸိူဝ်ႉၶိူဝ်းမၼ်းၼၢင်း ဢၼ်လုၵ်ႉ ၼမ်ႉၶမ်း မႃး 18 ၵေႃႉ။ တီႈပၢင်ၼၼ်ႉ မီးလုၵ်ႈႁဵၼ်း၊ ၵူၼ်းသိုၵ်းလႄႈ ၵူၼ်းမိူင်းၶဝ်ႈႁူမ်ႈ တင်းမူတ်း 200 ပၢႆ ဝႃႈၼႆ။
ၼၢင်းမူဝ်ႁွမ်ၼႆႉ ထုၵ်ႇသိုၵ်းတဢၢင်း TNLA တီႉၺွပ်းဢဝ်တူဝ်မၼ်းၼၢင်းၵႂႃႇ ၵုမ်းၶင် မိူဝ်ႈဝၼ်းတီႈ 17/08/2018 ၶဝ်ႈတီႉဢဝ်တီႈႁိူၼ်းမၼ်း ၼၢင်း တီႈပွၵ်ႉႁူဝ်ၼွင် ၸႄႈဝဵင်းၼမ်ႉၶမ်း ။
မိူဝ်ႈပီ 2016 သိုၵ်း TNLA မႃးၵဵပ်းၶွၼ်ႇ တီႈႁိူၼ်းၼၢင်းမူဝ်ႁွမ် 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်း ငိုၼ်း 11 သႅၼ်သေ ပွၵ်ႈၶိုၼ်းၼၼ်ႉ သိုၵ်းလွႆ TNLA သွင် ၵေႃႉ ၺႃးသိုၵ်းလူင်ပွင်ၸိုင်ႈမၢၼ်ႈ မူၵ်း ယိုဝ်းၸွမ်းတၢင်း တၢႆၵေႃႉၼိုင်ႈ၊ တီႉလႆႈတူဝ် လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ် ပွင်ႇၶၢဝ်ႇ ဝႃႈၼႆ။ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇ လၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်ၵူၺ်းသေ ႁဝ်းဢမ်ႇဢဝ်သၢႆ ၸႂ်ႁဝ်းလႅၵ်ႈ သေပွင်ႇၶၢဝ်ႇလေႃႇ ႁဝ်းဢမ်ႇ ၸႂ်ႈၵူၼ်းဢဝ်ၶၢဝ်ႇပွင်ႇၶၢဝ်ႇပၼ်ၽႂ် ဝႃႈၼႆ။
