ပိူင်ဢမ်ႇၽၢတ်ႇဢွၵ်ႇမိူင်းႁူမ်ႈတုမ်ၼၼ်ႉ ၸၢဝ်းၶိူဝ်းပႆႇယွမ်းႁပ်ႉ တေဢုပ်ႇၵၼ်ၶိုၼ်းထႅင်ႈ

ပၢင်ၵုမ်သႅၼ်းၽူႈၼမ်းသုင်သုတ်း ဢၼ်ၸတ်းႁဵတ်းမၢႆတွင်းဝၼ်း NCA ၶွပ်ႈတဵမ် 3 ပီၼၼ်ႉ ၶွင်ႉၶမ်တီႈႁူဝ်ၶေႃႈ တေဢမ်ႇလႆႈၽၢတ်ႇဢွၵ်ႇမိူင်းႁူမ်ႈတုမ်၊ လွင်ႈၼႆႉၸၢဝ်းၶိူဝ်းပႆႇယွမ်းႁပ်ႉလႄႈ တေဢုပ်ႇၵၼ်ထႅင်ႈၵမ်းၼိုင်ႈ ဝႃႈၼႆ။

ပၢင်ၵုမ်သႅၼ်းၽူႈၼမ်းသုင်သုတ်း ဢၼ်ၸတ်းတီႈ ႁူင်းႁႅမ်းသူၺ်ႇၸၢမ်ႇဢိင်ႇ ၼေႇပျီႇတေႃႇ ဝၼ်းတီႈ 15-16/10/2018 တႃႇၶၢဝ်းတၢင်း 2 ဝၼ်း၊ သႅၼ်းၽူႈၼမ်းသုင်သုတ်း 3 ၾၢႆႇႁူပ်ႉဢုပ်ႇၵၼ် မိူၼ်ၼင်ႇ ၾၢႆႇၸၢဝ်းၶိူဝ်း 10 ၸုမ်း၊ လူင်ပွင်ၸိုင်ႈမၢၼ်ႈလႄႈ တပ်ႉသိုၵ်းမၢၼ်ႈဢိၵ်ႇသၽႃး။ ၼႂ်းပၢင်ၵုမ် 2 ဝၼ်းၼၼ်ႉ ႁူပ်ႉ ဢုပ်ႇၵၼ် တူၵ်း လူင်းတႅပ်းတတ်းလႆႈၸႂ်ၵၼ်ၵမ်ႈပႃႈၼမ်။ ၵူၺ်းၵႃႈ ႁူဝ်ၶေႃႈဢၼ်ဝႃႈ ဢမ်ႇၽၢတ်ႇဢွၵ်ႇမိူင်း ႁူမ်ႈတုမ်ၼၼ်ႉ ပႆႇတႅပ်း တတ်းတူၵ်းလူင်းသင်ၵၼ် ႁႂ်ႈဝႆႉၶၢဝ်းယၢမ်းထႅင်ႈသေ ပေႃးထိုင်လိူၼ်ၼူဝ်ႊဝႅမ်ႊၿိူဝ်ႊ ၸင်ႇ တေႁူပ်ႉဢုပ်ႇၵၼ်ထႅင်ႈ ၵမ်းၼိုင်ႈ ဝႃႈၼႆ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း မၢႆ 3 RCSS/SSA လႄႈ ၽူႈၶၢၼ်ပၢၵ်ႇ EAOs လၢတ်ႈတီႈၽူႈတွႆႇႁွၵ်ႈ ဝႃႈ “ လိူင်ႈၼႆႉ မၼ်းၵဵဝ်ႇၵပ်း မိူင်းတႆးႁဝ်းၶႃႈ ၵမ်းသိုဝ်ႈ၊ လွင်ႈၼႆႉ ႁဝ်းၶႃႈၵေႃႈပွင်ႇၸႂ်ယူႇ ၵမ်ႈၽွင်ႈၵေႃႈမႆႈၸႂ်။ ၸုမ်းတႆး သမ်ႉ မီးၸုမ်းႁဝ်းၶႃႈၵူၺ်းတၢင်တူဝ်မႃးဢုပ်ႇ၊ ယူဝ်သမ်ႉတေဝႃႈ တူၵ်းလူင်းၵႂႃႇ၊ ႁပ်ႉၵႂႃႇယဝ်ႉႁႃႉ ၸဵမ်ၸိူင်ႉ ၼႆၶႃႈ ၼေႃႈ။ မုၵ်ႉၸုမ်းႁဝ်းၶႃႈၼႆႉ တိုၼ်းပုတ်းၶၢတ်ႇ ဝႆႉ ယဝ်ႉၶႃႈလူး လွင်ႈၼႆႉ ႁဝ်းၶႃႈမီးပေႃႇလသီႇယဝ်ႉ။ ၵွပ်ႈပိူဝ်ႈႁဝ်း ၶႃႈၼႆႉ မၼ်းမီးပိုၼ်း၊ မၼ်းဢမ်ႇမိူၼ်တၢင်ႇမူႇ တၢင်ႇၸုမ်း၊ မၼ်းဢမ်ႇမိူၼ် တၢင်ႇၶိူဝ်း။ လွင်ႈၼႆႉ ပေႃးဝႃႈတေ မႃးသႂ်ႇ လွင်ႈဝႃႈ တေဢမ်ႇၽၢတ်ႇဢွၵ်ႇမိူင်းႁူမ်ႈတုမ် မိူင်းမၢၼ်ႈဢၼ်ဝႃႈၼၼ်ႉ ႁဝ်းၶႃႈတိုၼ်းတေဢမ်ႇႁပ်ႉ ႁဝ်းၶႃႈ တိုၼ်း မီးပေႃႇလသီႇတႅၵ်ႇလႅင်းဝႆႉၼင်ႇၼႆ။ ဢိင်ၼိူဝ်လွင်ႈၼႆႉ ၼႂ်းပၢင်ၵုမ်ၼၼ်ႉ ႁဝ်းတိုၼ်းသၢၼ်ၶတ်းယူႇယဝ်ႉ ႁဝ်းၶႃႈ ၶတ်း ၵူၺ်းဢမ်ႇၵႃး တၢင်ႇၸုမ်းဢၼ်ႁဝ်းၶႃႈ မႃးႁူမ်ႈၵၼ်ၵေႃႈ ႁဝ်းၶႃႈဢွၵ်ႇသဵင်လဵဝ်ၵၼ်” ဝႃႈၼႆ။

တီႈပၢင်ၵုမ် 2 ဝၼ်းၼၼ်ႉ ဢၼ်ပဵၼ်ႁူဝ်ၶေႃႈယႂ်ႇ ဢၼ်ၼိုင်ႈမိူၼ်ၼင်ႇ တေလႆႈမီးတပ်ႉသိုၵ်းလုၵ်ႈလဵဝ်ၼၼ်ႉၵေႃႈ ဢုပ်ႇၵုမ်လႆႈၸႂ်ၵၼ်သေ တေလူင်းမိုဝ်းႁဵတ်းသၢင်ႈၵႂႃႇယဝ်ႉ-ၼႆယင်းလႆႈဢွၵ်ႇလိၵ်ႈပိုၼ်ၽၢဝ်ႇဝၢႆးလင်ပၢင်ၵုမ် ဝၼ်း တီႈ 16/10/2018။

ၾၢႆႇၼိုင်ႈတႃႇတေလႆႈလွင်ႈၽဵင်ႇပဵင်း ၸိူဝ်ႉၸၢတ်ႈ လွင်ႈတႅပ်းတတ်းတူဝ်ၵဝ်ႇၼၼ်ႉ တေၵေႃႇတင်ႈ မိူင်းႁူမ်ႈတုမ် ၵႂႃႇလူၺ်ႈၶေႃႈတႅပ်းတတ်းၽွၼ်းပၢင်ႈဢၼ်လႆႈမႃးတီႈပၢင်ဢုပ်ႇဢူဝ်းၵၢၼ်မိူင်း၊ ဢၼ်ဢိင်ၼိူဝ်ပိူင်ၾႅတ်ႊတရႄႊ လႄႈ တီႇမူဝ်ႇၶရေႇသီႇၼၼ်ႉ ၼႆၵေႃႈပႃးဝႆႉ။

ၸဝ်ႈသိုၵ်းလူင် ၸၢႆးငိုၼ်း လၢတ်ႈဝႃႈ “ ၶေႃႈၵႂၢမ်းဢၼ်ဝႃႈ ဢမ်ႇၽၢတ်ႇဢွၵ်ႇၼႆၼၼ်ႉတႄႉ ပိူင်လူင်မၼ်းၾၢႆႇတပ်ႉ သိုၵ်းမၢၼ်ႈ ၶႂ်ႈသႂ်ႇ။ ၶဝ်ၵေႃႈဢမ်ႇယွမ်း၊ လူင်ပွင်ၸိုင်ႈၵေႃႈ ၸွမ်းၾၢႆႇတပ်ႉဝႃႈ တေလႆႈသႂ်ႇ။ ၵမ်းလိုၼ်းသုတ်းမႃး ပေႃးမႃးႁုပ်ႈတူၺ်းတႄႉၵေႃႈ လိူင်ႈၼႆႉႁဝ်းၶႃႈၵေႃႈဝႃႈ မၼ်းပဵၼ်လိူင်ႈယႂ်ႇ၊ ယူႇတီႈ ႁဝ်းၶႃႈ 10 ၸုမ်းတေတႅပ်း တတ်း ၵႂႃႇၼၼ်ႉ မၼ်းဢမ်ႇၸၢင်ႈ။ ၸုမ်းယိပ်းၵွင်ႈၵၢင်ႇ ဢၼ်ပႆႇ လူင်းလၢႆးမိုဝ်းၵေႃႈ ၵိုတ်း ထႅင်ႈယူႇ 10 ၸုမ်း၊ ႁဝ်းၶႃႈတေ မႃးထၢမ်ၵၢင်ၸႂ်ၵၼ် ၶိုၼ်းၶေႃႈၼႆႉ တေႁဵတ်း ႁိုဝ် ႁၼ်ထိုင်ၸိူင်ႉႁိုဝ် ႁႂ်ႈႁဝ်းၶႃႈ လႆႈ ဢဝ်သဵင်ၼၼ်ႉ ဢၼ်ၼိုင်ႈ။ ထႅင်ႈဢၼ်ၼိုင်ႈၵေႃႈ ၸုမ်းၽႂ်ၸုမ်းမၼ်းၵေႃႈ မၼ်းတေမီးၵူၼ်းမိူင်းၶႃႈလူး မိူၼ်ၸိူင်ႉ ၼင်ႇပႃႇတီႇၵၢၼ်မိူင်း ၽႂ်မၼ်း ၸုမ်းတူင်ႇဝူင်းၵူၼ်း ၽူႈယႂ်ႇၵူၼ်းလူင် ၽူႈမီးဢေႃးၸႃႇဢႃႇၼႃႇ မိူင်းၽႂ်မၼ်းမိူင်းႁႂ်ႈ လႆႈထၢမ်ၵၼ်လူင်ႉ လႅင်းၵွၼ်ႇ ၸင်ႇတေ ၸၢင်ႈပၼ် ၶေႃႈတွပ်ႇ” ဝႃႈၼႆ။

ၸွမ်သိုၵ်းလူင် မူႇတူးသေးၽူဝ်း ႁူဝ်ပဝ်ႈ PPST မွၵ်ႇလၢတ်ႈၶေႃႈၵႂၢမ်းၽွင်းပိုတ်ႇပၢင်ၼၼ်ႉဝႃႈ “ လွင်ႈဢမ်ႇ ၽၢတ်ႇ ဢွၵ်ႇ မိူင်းႁူမ်ႈတုမ်မိူင်းမၢၼ်ႈ ဢၼ်ဝႃႈၼႆႉတႄႉ ၼႂ်း NCA ၵေႃႈမၼ်းဢမ်ႇပႃး။ ယဝ်ႉၵေႃႈ ပိူင်ၾႅတ်ႊၻရႄႊၵေႃႈ မၼ်း ဢမ်ႇၸႂ်ႈ လွင်ႈဝႃႈတေမႃးသႂ်ႇၼႆႉ မၼ်းဢမ်ႇမႅၼ်ႈ။ ပေႃးပဵၼ်လႆႈ လွင်ႈၸိူင်ႉၼႆ မၼ်းဢမ်ႇလူဝ်ႇသႂ်ႇ ဢၼ်ဝႃႈ ၽၢတ်ႇဢွၵ်ႇၵေႃႈ ဢမ်ႇလူဝ်ႇသႂ်ႇ၊ ဢမ်ႇၽၢတ်ႇဢွၵ်ႇၵေႃႈ ဢမ်ႇလူဝ်ႇသႂ်ႇ ႁဝ်းယႃႇပေတူၵ်ႇယဝ်ႉလွင်ႈၼႆႉ။ ႁဝ်းလူဝ်ႇ ဢုပ်ႇၵၼ်ၼႆႉ ႁဝ်းတေႁဵတ်းႁိုဝ်ၵေႃႇသၢင်ႈ မိူင်းႁူမ်တုမ်ၾႅတ်ႊၻရႄႊ ဢၼ်ႁဝ်းၶႃႈၶႂ်ႈပဵၼ်၊ ႁႂ်ႈၵူႈၸုမ်းၵူႈၸၢဝ်းၶိူဝ်း ႁပ်ႉ ႁႂ်ႈမၼ်းၽဵင်ႇပဵင်း ႁဝ်းတေႁဵတ်းႁိုဝ် ၸဵမ်ၸိူဝ်းၼႆႉ ဢဝ်လွင်ႈၼႆႉပဵၼ်ယႂ်ႇလႄႈ ၾၢႆႇလူင်ပွင်ၸိုင်ႈ ၵေႃႈ လူဝ်ႇ သၢင်ႈႁဵတ်း ႁႂ်ႈမၼ်းတဵမ်တဵမ်ထူၼ်ႈထူၼ်ႈ။ ပိူင်ၾႅၻ်ႊၻရႄႊၼၼ်ႉ ႁႂ်ႈၵူႈၾၢႆႇယွမ်းႁပ်ႉ၊ ပေႃးၸိူင်ႉၼႆတႄႉ လွင်ႈဝႃႈ ၽၢတ်ႇဢွၵ်ႇ၊ ဢမ်ႇၽၢတ်ႇဢွၵ်ႇဢၼ်ဝႃႈၼၼ်ႉ မၼ်းၵေႃႈႁၢႆၵႂႃႇယဝ်ႉ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵမ်းလိုၼ်းသုတ်း ၸင်ႇဝႃႈ ပေႃးထိုင်မႃး လိူၼ်ၼႃႈ ၼႂ်းလိူၼ်ၼူဝ်ႊဝႅမ်ႊၿိူဝ်ႊမႃး ၶိုၼ်းမႃးႁူပ်ႉ ၵၼ်ထႅင်ႈၵမ်းၼိုင်ႈသေ ၸင်ႇၶိုၼ်းဢုပ်ႇၵၼ် ၾၢႆႇၸၢဝ်းၶိူဝ်းၵေႃႈ မီးတၢင်းလိူၵ်ႈၸိူင်ႉႁိုဝ် ႁႂ်ႈႁႃမႃးလွၵ်းလၢႆး 3 လၢႆး၊ ၾၢႆႇလူင်ပွင်ၸိုင်ႈၵေႃႈမီးတၢင်းလိူၵ်ႈၸိူင်ႉႁိုဝ် ႁႂ်ႈႁႃမႃးလွၵ်းလၢႆး 3 လၢႆးလႄႈ ႁႂ်ႈၶိုၼ်းမႃးငူပ်ႉငီႉၶိုၼ်းထႅင်ႈၵမ်းၼိုင်ႈ ဝႃႈၼႆ။

ၼႂ်းပၢင်ၵုမ်သႅၼ်းၽူႈၼမ်းသုင်သုတ်း တႃႇၶၢဝ်းတၢင်း 2 ဝၼ်းၼႆႉ လွင်ႈၽၢတ်ႇဢွၵ်ႇ၊ ဢမ်ႇၽၢတ်ႇဢွၵ်ႇ မိူင်းႁူမ်ႈ တုမ်မိူင်းမၢၼ်ႈၼႆႉ ပႆႇမီးလွင်ႈတူၵ်းလူင်းတႅပ်းတတ်းလႆႈၸႂ်သင်ၵၼ် ဝႃႈၼႆ။