ပွႆးၽြႃးၸၢမ်ၵဝ်ႈတွၼ်ႈ (ၽွင်ႇတေႃႇဢူး) တႄႇလူင်းဢႅဝ်ႇမိူင်း မိူဝ်ႈဝၼ်းတီႈ 10-27/10/2018 တႃႇၶၢဝ်းတၢင်း 18 ဝၼ်း ဝႃႈၼႆ။
မိူဝ်ႈၼႆႉ ဝၼ်းတီႈ 16/10/2018 ယၢမ်းၵၢင်ၼႂ် 7 မူင်း ၽြႃးၸၢမ်ၵဝ်ႈတွၼ်ႈ သူႇႁွတ်ႈၽႅဝ် ၼႂ်းၸႄႈဝဵင်း ယွင် ႁူၺ်ႈ ၸိုင်ႈတႆးပွတ်းၸၢၼ်း မီးတၵ်ႉၵႃႇသတ်းထႃး ၼႂ်းၸႄႈဝဵင်းယွင်ႁူၺ်ႈ ၸတ်းႁဵတ်းပၢင်ပွႆးႁပ်ႉတွၼ်ႈလူႇတၢၼ်းလႄႈ လိူဝ် ၼၼ်ႉ ၸတ်းႁဵတ်းပႃးပၢင်ပွႆးၶေႉၶႅင်ႇၽၢႆးႁိူဝ်းၵၼ်ထႅင်ႈ ဝႃႈၼႆ။
ပႃႈၼၢင်းသူၺ်ႇ ၵူၼ်းမိူင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပွႆးၽြႃးတီႈဝဵင်းယွင်ႁူၺ်ႈႁဝ်းၶႃႈတႄႉ တေၸတ်း ႁဵတ်း 3 ဝၼ်း။ တႃႇပီႈၼွင်ႉတီႈၸမ်/ ၵႆ ပေႃးတေလႆႈမႃးလူႇတၢၼ်းၵၼ်။ လိူဝ်ၼၼ်ႉ ၸတ်းႁဵတ်းပႃးထႅင်ႈ ပၢင်ၶေႉ ၶႅင်ႇၽၢႆးႁိူဝ်းၵၼ်၊ တေဢဝ်ၶႃသေ ၽၢႆးၶေႉၵၼ် တႃႇႁိူဝ်းၶႅင်ႇ 20 လမ်း” ဝႃႈၼႆ။
ပၢင်ပွႆးၽြႃးၸၢမ်ၵဝ်ႈတွၼ်ႈ တီႈဝဵင်းယွင်ႁူၺ်ႈၼႆႉ တေၸတ်းႁဵတ်း တႃႇ 3 ဝၼ်း တႄႇဢဝ် ဝၼ်းတီႈ 16-18/10/2018။ မိူဝ်ႈၼႆႉ ၸိူဝ်းပဵၼ်လုၵ်ႈလၢင်းၸဝ်ႈသူၺ်ႇတႅၵ်ႈ ၸဝ်ႈၾႃႉလူင်မိူင်းယွင်ႁူၺ်ႈၵေႃႈ ႁူမ်ႈၵၼ် လူႇတၢၼ်းလႄႈ ၵၢပ်ႈသွမ်းၽြႃးၸၢမ်ၵဝ်ႈတွၼ်ႈ ဝႃႈၼႆ။
ပွႆးၽြႃးလူင်းမိူင်းၼႆႉ တႄႇၸတ်းႁဵတ်း ဝၼ်းတီႈ 10-27/10/2018 တႃႇၶၢဝ်းတၢင်း 18 ဝၼ်း၊ မီးပၢင်ၶေႉၶႅင်ႇ ဢဝ်တိၼ်ၽၢႆးႁိူဝ်း ဢၼ်ပဵၼ်ၾိင်ႈထုင်း ၵူၼ်းၼႂ်းၼွင်ႁၢႆးယႃႈ။
ၶၢဝ်းတၢင်း ပီႈၼွင်ႉတၵ်ႉၵႃႇသတ်ႉထႃး ၼိမၼ်ႇတၼ(ၽိတ်ႈပၢင်း) ဢဝ် ၽြႃးၸၢမ်ၵဝ်ႈတွၼ်ႈလူင်းဝတ်ႉၵျွင်းပၼ်ႇ လဵပ်ႈဝၢၼ်ႈ ဢၼ်မီးၼႂ်းၼွင် ပၼ်ၵူၼ်းမိူင်းလူႇဝႆႈၼၼ်ႉ မီး 21 ဝၢၼ်ႈ မိူၼ်ၼင်ႇ ၵျေးပေႃးၶူင်ႇ၊ ဢိၼ်းတဵင်ႇ၊ ဝၢၼ်ႈလူင်ႁၢႆးယႃႈ၊ ငႃးၽႄႇၶျွင်း၊ ၵျေးၸႃးၵူင်း၊ ပွႆးၸႃးၵူင်း၊ လိၼ်း ၵိၼ်း၊ ဝဵင်းယွင်ႁူၺ်ႈ၊ ၼမ်ႉသၢႆး၊ မိူင်းသွၵ်ႇ၊ သၢႆးဢူး၊ ၵေႇလႃႇ၊ ၸယႅတ်ႉၵျီး၊ ဢလူဝ်ႇ တေႃႇပွၵ်ႉ၊ ၼမ်ႉပၼ်ႇ၊ တႃႈ မၢၵ်ႇၵႅင်း (မၵျီးသဵၵ်ႉ)၊ ၵဵင်းၶမ်း၊ မိူင်းပဵဝ်း၊ ၼွင်တဝ်း ၸဵမ်ၸိူဝ်းၼႆႉ။
