သိုၵ်းမၢၼ်ႈၵျွၵ်ႉမႄး ယိုဝ်းၸဝ်ႈၼႃး ၵေႃႉၼိုင်ႈတၢႆတီႈႁိမ်းတေႃႈၵႅတ်ႉလႄႈ တေႃႈၼမ်ႉမၼ်းမဵၼ် ဢၼ်တေသူင်ႇ ၶဝ်ႈမိူင်းၶႄႇ။ ဢမ်ႇမီးလွင်ႈဢဝ်လိူင်ႈပၼ်တူတ်ႈတၢမ်ႇလႄႈ SHRF ၸီႉၸမ်ႈ။
မိူဝ်ႈၼႆႉ ဝၼ်းတီႈ 16/10/2018 ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ဢွၵ်ႇၽိုၼ်တၢမ်းငဝ်းလၢႆး လွင်ႈသိုၵ်းမၢၼ်ႈ ၶမယ တပ်ႉ 504 ယိုဝ်းၵူၼ်းမိူင်းတၢႆ တီႈဝၢၼ်ႈၼွင်ဢၢင်း ၸႄႈဝဵင်းၵျွၵ်ႉမႄးၼၼ်ႉ ပဵၼ်ႁိမ်းတေႃႈၵႅတ်ႉသ် သိုၵ်း မၢၼ်ႈဢမ်ႇမီးလွင်ႈဢဝ်ပုၼ်ႈၽွၼ်းပၼ်ၶိုၼ်း ပဵၼ်လွင်ႈပူၼ်ႉပႅၼ်သုၼ်ႇလႆႈၵူၼ်းဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ “ ဢဝ်တၢင်းၸႂ်လမ် သႆႈ ၵမ်ႇဢွၼ်ႁူဝ်ထူဝ်းၼႃႈသေယိုဝ်းၵူၼ်းမိူင်း ၼင်ႇသတ်းၼႆႉ ပဵၼ်လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းႁၢဝ်ႈ ႁႅင်းတႄႉတႄႉ။ ပေႃးတင်းဝႃႈ မီးၵၢင်ၸႂ်ၶႂ်ႈႁႂ်ႈၵူၼ်းမိူင်းမီးလွင်ႈ ထၢင်ႇႁၢင်ႈ ယူႇငၢႆႈသဝ်းလူမ် ထၢင်ႇႁၢင်ႈႁဵတ်းၵိၼ် ၵၢၼ်ႁႃလဵင်ႉတွင်ႉယူႇၸိုင် ပၢႆးဝူၼ်ႉ၊ လၢႆးဝူၼ်ႉ ႁဵတ်းမိူၵ်ႈတေႃႇၵူၼ်းမိူင်းၼႆႉ ဢမ်ႇထုၵ်ႇလီမီးလႄႈဢမ်ႇထုၵ်ႇလီ ႁဵတ်းယဝ်ႉ။ ၽူႈၸိူဝ်းႁဵတ်းၽိတ်းၵေႃႈ တၵ်းလႆႈ ပၼ်တၢမ်ႇတၢင်းၽိတ်း ၼၵ်းၼႃ ဢၼ်ၵိုင်ႇငၢမ်ႇ ဢမ်ႇၸႂ်ႈဝႃႈႁဵတ်း ၽိတ်းယဝ်ႉ ယွမ်းၼွမ်းသေ ႁႂ်ႈယဝ်ႉလၢႆၵႂႃႇ၊ ပေႃးၸိူင်ႉၼၼ် တၢင်းႁၢႆႉမိူၵ်ႈလူင်ၼၼ်ႉ မၼ်းတေဢမ်ႇသုတ်း ဝၢႆးႁၢႆ လႆႈ” ဝႃႈၼႆ။
ပိူင်ပဵၼ်တႄႉ သိုၵ်းမၢၼ်ႈတပ်ႉၶမယ 504 သီႇပေႃႉ ဢဵၼ်ႁႅင်း 15 ၵေႃႉ ယိုဝ်းၸၢႆးဢၢႆႈထုၼ်း(ၸဝ်ႈၼႃး) ၵူၼ်းဝၢၼ်ႈ ၼွင်ဢၢင်း ဢၼ်မီးၾၢႆႇဢွၵ်ႇဝဵင်းၵျွၵ်ႉမႄးႁၢင်ႇၵႆမွၵ်ႈ 10 လၵ်း ၽွင်းၶီႇရူတ်ႉၶိူင်ႈၵႂႃႇသူၼ်ႁႆႈ၊ မၢၵ်ႇၵွင်ႈတိူဝ်ႉၺႃး တၢင်းလင် မၼ်းၸၢႆးသေ တၢႆထင်တီႈ ဝႃႈၼႆ။
ဝၢႆးၼၼ်ႉ ၽူႈဢွၼ်ႁူဝ်ၸုမ်းသိုၵ်းမၢၼ်ႈၸုမ်းၼၼ်ႉ ၵပ်းၾူၼ်းၸူးၽူႈၵွၼ်းဢိူင်ႇႁွင်ႈႁႅင်ႈလႄႈ ပူႇၵႄႇဝၢၼ်ႈၼွင် ဢၢင်း။ မၼ်းလၢတ်ႈဝႃႈ “ ႁဝ်းယိုဝ်းၵူၼ်းၽိတ်း။ မႃးၵူတ်ႇၸႅတ်ႈထတ်းတူၺ်းလႄႈဝႃႈ မၼ်းပဵၼ်ၵူၼ်းဝၢၼ်ႈလႂ်” ဝႃႈၼႆ။
ဝၢႆးလင်ပူႇၵႄႇၵႂႃႇထတ်းလႆႈႁူႉဝႃႈပဵၼ်ၵူၼ်းဝၢၼ်ႈၼွင်ဢၢင်း ဝၼ်းတီႈ 02/10/2018 မွၵ်ႈၶၢဝ်းယၢမ်း 10 မူင်းၵၢင်ၼႂ် ၽူႈမီးၸၼ်ႉသိုၵ်းမၢၼ်ႈတပ်ႉ ၶမယ 501 လႄႈ 504 ပႃး တင်းၵူၼ်းသိုၵ်းမွၵ်ႈ 15 ၵေႃႉ ၶီႇၵႃးသၢမ်လမ်း မႃးတီႈႁိူၼ်း ပူႇၵႄႇ ဝၢၼ်ႈၼွင်ဢၢင်းသေ မႃး လၢတ်ႈတီႈမႄႈၸၢႆး ဢၢႆႈထုၼ်းလႄႈ မေးမၼ်းၸၢႆး၊ လွၵ်ႇငိုတ်ႈပႃးဝႃႈပေႃး ဢဝ် လိူင်ႈၶိုၼ်ႈလုမ်းၶိုၼ်ႈသၢၼ် တေသဵင်ႈငိုၼ်း၊ သဵင်ႈၶၢဝ်းယၢမ်းၵူၺ်း လုၵ်ႈသူတေဢမ်ႇလုၵ်ႉၶိုၼ်းမႃးၼႆသေ ပၼ်ၶဝ်ႈ သၢၼ် 1 ထူင်၊ ငိုၼ်း 10 သႅၼ်ပျႃး ၼမ်ႉမၼ်းလႄႈ ၶူဝ်းၶွင်ၵိၼ်ဢိတ်းဢွတ်းတီႈမေး ၸၢႆးဢၢႆႈထုၼ်း။ မႄႈလႄႈ မေး ၸၢႆးဢၢႆႈထုၼ်းၵေႃႈၵႃႈလႆႈႁၢၼ်ႉၸႂ်။
ဢွင်ႈတီႈဢၼ်ယိုဝ်း ၸၢႆးဢၢႆႈထုၼ်းၼၼ်ႉၵေႃႈ ယူႇႁၢင်ႇၵႆ တေႃႈၵႅတ်ႉသ်လႄႈ ၼမ်ႉမၼ်းမဵၼ် ဢၼ်လုၵ်ႉမိူင်း ရၶႅင်ႇမႃးသေ လတ်းမိူင်းတႆးသူင်ႇၸူးမိူင်းၶႄႇၼၼ်ႉ 15 မီႊတိူဝ်ႊၵူၺ်း။ ပဵၼ်ပိုၼ်ႉတီႈဢၼ်ပဵၼ်ၽေးတေႃႇၵူၼ်း မိူင်းငၢႆႈ ဝႃႈၼႆ။
ၸၢႆးဢၢႆႈထုၼ်းၼႆႉ ပဵၼ်လုၵ်ႈၸၢႆး လုင်းထုၼ်း ပႃႈဝႃႇ ဝၢၼ်ႈၼွင်ဢၢင်း ဢိူင်ႇႁွင်ႈႁႅင်ႈ ၸႄႈဝဵင်းၵျွၵ်းမႄး ၸိုင်ႈတႆး ပွတ်းႁွင်ႇ။ မေးမၼ်းၸၢႆး ပဵၼ်ၼၢင်းသူၺ်ႇယိင်း၊ ၶဝ်မီးလုၵ်ႈယိင်း ႁူမ်ႈၵၼ်ၵေႃႉ ၼိုင်ႈ ဢႃယု ၸင်ႇႁႃလႆႈ 6 လိူၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ