ၼႂ်းႁၢင်လိူၼ်ၼႆႉ တေထိုင် ဝၼ်းၵိူတ်ႇပႃႇတီႇႁူဝ်သိူဝ် SNLD ၶွပ်ႈတဵမ် 30 ပီ ယဝ်ႉလႄႈ ၵိင်ႇၽႄပႃႇတီႇၸႄႈဝဵင်း ၼႂ်းမိူင်းတႆး လၢႆလၢႆတီႈ ဢွၼ်ၵၼ်ၸတ်းႁဵတ်းပၢင်ၵႅဝ်ႈဢဝ်ၵုင်ႇမုၼ်ႁပ်ႉတွၼ်ႈ ဝၼ်းၵိူတ်ႇလူင်ႈၼႃႈၵၼ် ဝႃႈၼႆ။

ဝၼ်းတီႈ 14/10/2018 ယၢမ်းၵၢင်ၶမ်ႈ ပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၸတ်းႁဵတ်းပၢင်ၵႅဝ်ႈဢဝ်ၵုင်ႇမုၼ်ႁပ်ႉတွၼ်ႈဝၼ်းၵိူတ်ႇလူင်ႈၼႃႈ တီႈႁၢၼ်ႉၶဝ်ႈၽၵ်း မင်ႇၵလႃႇ ၸႄႈဝဵင်းတႃႈၶီႈ လဵၵ်း ၸိုင်ႈတႆးပွတ်းဢွၵ်ႇၶူင်း မီးၽူႈၶဝ်ႈႁူမ်ႈပၼ်ႁႅင်း ၸုမ်းတူင်ႉၼိုင်တူင်ႇဝူင်း 30 ၸုမ်းပၢႆ ဝႃႈၼႆ။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ပႃႇတီႇႁူဝ်သိူဝ်ၸႄႈ ဝဵင်းတႃႈၶီႈလဵၵ်းႁဝ်းၶႃႈၼႆႉ ဢဵၼ်းဢၢၼ်းၸတ်းႁဵတ်းပၢင်ၵႅဝ်ႈလဵင်ႉလူၼႆႉၼႆၸိုင် ပုၼ်ႈတႃႇဝဵင်းတႃႈၶီႈ လဵၵ်းလႄႈ ၸိုင်ႈမိူင်းႁူမ်ႈတုမ်မျႅၼ်ႇမႃႇ တေၸဵဝ်းၵတ်းယဵၼ်ၶိုၼ်ႈယႂ်ႇ ၶႂ်ႈမိုတ်ႈၵိုတ်း ၸမ်ၸႂ် ၶိုင်ပွင်ၸွမ်း ၵၼ် ႁဵတ်းသၢင်ႈၵႂႃႇမိူဝ်းၼႃႈ ၸွမ်းၼင်ႇၵၢင်ၸႂ်မိူၼ်ၵၼ်ၼႆလႄႈ လႆႈပိုတ်ႇၸႂ်ထိုင်ပီႈၼွင်ႉႁဝ်းၶဝ် ဝၼ်းမိူဝ်ႈၼႆႉသေ လႆႈယိၼ်းလီၶွပ်ႈၸႂ်ယႂ်ႇယႂ်ႇၼမ်ၼမ်ထိုင် ၽူႈယႂ်ႇၵူၼ်းလူင် တီႈလႆႈမႃးၶိုၼ်ႈပၢင်ၵႅဝ်ႈၶမ်ႈဝၼ်းမိူဝ်ႈၼႆႉ” ဝႃႈၼႆ။

ပၢင်ၵႅဝ်ႈဢဝ်ၵုင်ႇမုၼ်ႁပ်ႉတွၼ်ႈဝၼ်းၵိူတ်ႇလူင်ႈၼႃႈတီႈတႃႈၶီႈလဵၵ်းၼႆႉ မီးၵူၼ်းမိူင်း၊ ၽူႈတႅၼ်းသၽႃး၊ ႁွင်ႈၵၢၼ် လူင်ပွင်ၸိုင်ႈ၊ ၸုမ်းပႃႇတီႇၵူႈၸုမ်းၸုမ်း၊ ၵေႃလိၵ်ႈလၢႆးလႄႈၾိင်ႈငႄႈၵူႈၸၢဝ်းၶိူဝ်း၊ ၸုမ်းၸွႆႈထႅမ်ၶႅၵ်ႇလီပၢင်ၸႃႉ၊ ၸုမ်းၾၢႆႇၶၢဝ်ႇ၊ ၸုမ်းၵူၼ်းၼုမ်ႇတႆး TYO ၊ ၽူႈၶဝ်ႈႁူမ်ႈပႃႇတီႇႁူဝ်သိူဝ် ၸဵမ်ၸိူဝ်းၼႆႉ ၶဝ်ႈႁူမ်ႈ ဝႃႈၼႆ။

လိူဝ်ၼၼ်ႉ မိူၼ်ၼင်ႇ ၼႂ်းၸႄႈဝဵင်းတၢင်ႉယၢၼ်း၊ ပၢင်လူင်လႄႈ ဢိၵ်ႇထႅင်ႈလၢႆလၢႆတီႈၵေႃႈ ၸတ်းႁဵတ်းပၢင်ၵႅဝ်ႈ ဢဝ်ၵုင်ႇမုၼ်ႁပ်ႉတွၼ်ႈဝၼ်းၵိူတ်ႇလူင်ႈၼႃႈဝႆႉၵေႃႈမီးယဝ်ႉ ဝႃႈၼႆ။

ပႃႇတီႇႁူဝ်သိူဝ် SNLD ၼႆႉ တႄႇတင်ႈမႃးမိူဝ်ႈဝၼ်းတီႈ 26/10/1988 ။ ပေႃးထိုင်မႃး ဝၼ်းတီႈ 26/10/2018 ၶွပ်ႈတဵမ် 30 ပီယဝ်ႉ။ ပေႃးၼႂ်းဝၼ်းတီႈ 26 မႃး ပႃႇတီႇႁူဝ်သိူဝ်ၵူႈၸႄႈဝဵင်းတေႁူမ်ႈၵၼ်တႄႇပၢင်ၵႅဝ်ႈ တီႈဝဵင်း တူၼ်ႈတီး ဝႃႈၼႆ။