သင်ၶၸဝ်ႈ ႁူမ်ႈၵၼ်တေႁဵတ်းဢွၵ်ႇပပ်ႉ ၵေႃႉႁၢၼ်သႃသၼႃ တႃႇလွင်ႈငမ်းယဵၼ် မၢႆတွင်းၸဝ်ႈၶူး ၵလျႃႇၼ ဝမ်ႇသ ဢၼ်ထုၵ်ႇၺႃးၵူၼ်းႁၢႆႉယိုဝ်း လူႉလွၼ်ႇထင်တီႈ မိူဝ်ႈဝၼ်းတီႈ 05/10/2018။
ၸဝ်ႈတူၼ်ၶူးလူင် Dr.ၶမ်းမၢႆ ထမ်မသႃမိ ပၼ်တၢင်းၶႆႈၸႂ်သေ သင်ၶၸဝ်ႈ ၸတ်းႁဵတ်း ပၢင်ၵုမ် မိူဝ်ႈဝၼ်းတီႈ11/10/ 2018 လႆႈၸႂ်ၵၼ်ဝႃႈ တေႁဵတ်းဢွၵ်ႇပပ်ႉ ၵေႃႉႁၢၼ်သႃသၼႃ တႃႇလွင်ႈငမ်းယဵၼ် မၢႆတွင်းၸဝ်ႈၶူးၵလျႃႇၼ ဝမ်ႇသ ။
ၸဝ်ႈၶူးသီႇရိထမ်မ ဝတ်ႉဝေလုဝၼ်ႇ ဝဵင်းတူၼ်ႈတီး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယိူင်းဢၢၼ်း ဢၼ်တေႁဵတ်း ဢွၵ်ႇပပ်ႉၼႆႉ တႃႇပၼ်ပိုၼ်ႉႁူႉ ငဝ်ႈၶၢမ်ႇပိုၼ်ႉလွင်ႈငမ်းယဵၼ် တႃႇလုၵ်ႈဢွၼ်ႇလႄႈ ၵူၼ်းၼုမ်ႇ၊ တႃႇပိုၼ်ၽႄႈပပ်ႉလိၵ်ႈၽိုၼ်လၢႆး ၵဵဝ်ႇလူၺ်ႈလွင်ႈငမ်းယဵၼ်၊ တႃႇၵမ်ႉၸွႆႈၵၢၼ်ဢုပ်ႇ ဢူဝ်းငူပ်ႉငီႉ လွင်ႈငမ်းယဵၼ် ၸိူဝ်းၼႆႉ သင်ၽႂ်သူၼ်ၸႂ် မီးဝႃႇသၼႃႇ တႅမ်လိၵ်ႈလၢႆးၸိုင် သူင်ႇပၼ်ၵွၼ်ႇဝၼ်းတီႈ 14/02/2019 ၼႆႉသေၵမ်း” ဝႃႈၼႆ။
ယူႇတီႈသင်ၶၸဝ်ႈသေ တေႁဵတ်းဢွၵ်ႇပပ်ႉၶၢဝ်းပွတ်း ၶၢဝ်းယၢဝ်း ပပ်ႉၶၢဝ်းပွတ်းၼၼ်ႉ တေၵဵပ်းႁွမ် ႁဵတ်းဢွၵ်ႇပိုၼ်းၵႅပ်ႈ ၸဝ်ႈၶူးၵလျႃႇၼ ဝမ်ႇသလႄႈ ၽိုၼ်လိၵ်ႈမွင်ၸႂ်၊ ဝွၵ်းမွင်ၸႂ် တင်းသဵင်ဢၼ် ပီႈၼွင်ႉတီႈၸမ်တီႈၵႆတႅမ်ႈသူင်ႇပၼ်၊ ပပ်ႉ ၽႅၼ်ၵၢၼ်ၶၢဝ်းယၢဝ်းသမ်ႉ တေပိၼ်ႇပပ်ႉလိၵ်ႈၵဵဝ်ႇလူၺ်ႈ လွင်ႈငမ်းယဵၼ်၊ လွင်ႈသႃသၼႃလႄႈ တူင်ႇဝူင်းၵူၼ်း၊ လွင်ႈထမ်မလႄႈ ၵတ်းယဵၼ်ၸိူဝ်းၼႆႉ။
ၸဝ်ႈတူၼ်ၶူးၵလျႃႇၼ ဝမ်ႇသၼႆႉပဵၼ်ၸဝ်ႈတူၼ်ၶူးဢၼ်ၵတ်ႉၶႅၼ်ႇၽႂ်းၽၢႆ ၼႂ်းၵၢၼ်လိၵ်ႈလၢႆးလႄႈ ၼႂ်းၵၢၼ်တူင်ႉၼိုင်ၼႂ်းတူင်ႇဝူင်းတင်းၼမ်။ ယၢမ်းလဵဝ်ၸဝ်ႈသင်ၶ ႁဵၼ်းလိၵ်ႈဝႆႉတီႈ ဝတ်ႉၵျွင်း ယွတ်ႈမီးယူႇ 200 ပၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ