ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် ၸႄႈဝဵင်းလၢႆးၶႃႈ လူႉသဵင်ႈလူၺ်းတၢင်းပဵၼ်ထၢတ်ႈၸႂ်တူၵ်း။

ဝၼ်းတီႈ15/10/2018 ၶၢဝ်းယၢမ်းၵၢင်ၼႂ် 5:45 မူင်း ၸၢႆးမိူင်းၸိုၼ်ႈ ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် SNLD ဝဵင်းလၢႆးၶႃႈ လူႉသဵင်ႈသုတ်းမုၼ် လူၺ်ႈတၢင်းပဵၼ်ထၢတ်ႈၸႂ်တူၵ်း တီႈႁိူၼ်းမၼ်းၸၢႆး ပွၵ်ႉသွင် ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်းမၢႆ 1 လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ တွၼ်ႈတႃႇႁဝ်းၶႃႈတႄႉ ပဵၼ် ဢၼ်လူႉယႂ်ႇသုမ်းလူင်ယဝ်ႉ။ မၼ်းၸၢႆးၼႆႉ ပဵၼ်ၵူၼ်းသိုဝ်ႈတေႃႇၶၢဝ်းယၢမ်း၊ ပဵၼ်ၵူၼ်းမီးတၢင်းၶတ်းၸႂ်၊ ပဵၼ်ၵူၼ်းမီးၸႂ်ႁၵ်ႉၸိူဝ်ႉၶိူဝ်း၊ မၼ်းၸၢႆးတူင်ႉၼိုင်ပူၵ်းပွင်ၼႂ်းတူင်ႇဝူင်းၵူၼ်းလၢႆလွင်ႈ ၊ မၼ်းၸၢႆးၼႆႉဢမ်ႇၵိၼ်လဝ်ႈ၊ ဢမ်ႇလုတ်ႇလႅၼ်ႈယႃႈ ၵွပ်ႈၼၼ် ဢၼ်မၼ်းၸၢႆးလူႉၵႂႃႇၼႆႉ ပဵၼ်ဢၼ်မွင်ၸႂ်ၸွမ်းတႄႉၶႃႈဢေႃႈ တႃႇတေမီးမႃးၵူၼ်းၸိူင်ႉ မၼ်းၸၢႆးၼႆႉဢမ်ႇငၢႆႈ ” ဝႃႈၼႆ။

ၸၢႆးမိူင်းၸိုၼ်ႈၼႆႉ ပဵၼ်လုၵ်ႈၸၢႆး လုင်းၸၢႆးၵၼ်ႇၼလႄႈ ပႃႈၼၢင်း ဢူင်းၸိင်ႇ ၵိူတ်ႇမိူဝ်ႈပီ 1977 တီႈဝၢၼ်ႈ ၼႃးပွႆး ၼမ်ႉ ႁူးၽြႃးထမ်ႈ ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ တႄႇၼႃႈႁိူၼ်းၵိုၵ်း ၼၢင်းလႃႉယဵၼ်ႇ မီး လုၵ်ႈ ႁူမ်ႈၵၼ် 2 ၵေႃႉ ၼၢင်းတွၼ်းလီလႄႈ ၸၢႆးမိူင်းလီ တႄႇၶဝ်ႈႁၢပ်ႇၵၢၼ်ပဵၼ်ၽူႈၼမ်းၼႂ်းၵူႈလွင်ႈလွင်ႈပႃႇတီႇႁူဝ်သိူဝ်ဝဵင်းလၢႆးၶႃႈ မိူဝ်ႈႁူဝ်ပီ 2015 ။

ယူႇတီႈလုၵ်ႈလၢင်းၼၢင်းမေး ပႃႇတီႇႁူဝ်သိူဝ် ၸုမ်းၵူၼ်းၼုမ်ႇ ဢိၵ်ႇပီႈၼွင်ႉ တီႈၸမ်တီႈၵႆတေႁူမ်ႈ ၵၼ်လုမ်းလႃးပူၼ်ႉ  ၶၢပ်ႈတူဝ်ၼႂ်းဝၼ်းတီႈ 17/10/2018 ၼႆႉတီႈပႃႇၸႃႉ ဝဵင်းလၢႆးၶႃႈ။