မိူဝ်ႈၼႆႉ ဝၼ်းတီႈ 15/10/2018 တပ်ႉသိုၵ်းတဢၢင်း TNLA ဢွၵ်ႇၶေႃႈပိုၼ်ၽၢဝ်ႇဝႃႈ လူတ်းယွၼ်ႇတူတ်ႈတၢမ်ႇ ပွႆႇတူဝ်ၼၢင်းမူဝ်ႁွမ်ယဝ်ႉ ဝႃႈၼႆ။

ၼၢင်းမူဝ်ႁွမ် မႄႈလုၵ်ႈဢွၼ်ႇ 3 ၵေႃႉ ၵူၼ်းဝၢၼ်ႈပွၵ်ႉႁူဝ်ၼွင် ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ ထုၵ်ႇ တပ်ႉသိုၵ်းတဢၢင်း TNLA တီႉၺွပ်းၵုမ်းၶင်တူဝ် မိူဝ်ႈဝၼ်းတီႈ 17/08/2018 ၼၼ်ႉသေ တေႃႈထိုင်ယၢမ်းလဵဝ် ဝၼ်းတီႈ 15/10/2018 ႁိမ်းၸမ် 2 လိူၼ် တပ်ႉသိုၵ်းတဢၢင်း TNLA ၸင်ႇပွႆႇတူဝ်ၼၢင်းမူဝ်ႁွမ်ၶိုၼ်း ဝႃႈၼႆ။

မိူဝ်ႈၼႆႉ ဝၼ်းတီႈ 15/10/2018 ယူႇတီႈပီႈၼွင်ႉမုင်ႉႁေႃႁိူၼ်း ၼၢင်းမူဝ်ႁွမ် တင်း ပႃႇတီႇမႂ်ႇသုင်ၸိုင်ႈတႆး/ တပ်ႉ သိုၵ်းၸိုင်ႈတႆး SSPP/SSA ႁူမ်ႈၵၼ်သေ ၵႂႃႇႁပ်ႉဢဝ်တူဝ်ၼၢင်းမူဝ်ႁွမ် တီႈငဝ်ႈငုၼ်းတပ်ႉသိုၵ်းတဢၢင်း TNLA ။

ၸၢႆးတဵင်းသူၺ်ႇ ႁူဝ်ၼႃႈၸုမ်းၵူၼ်းၼုမ်ႇ ၸႄႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းလႆႈႁူႉတႄႉ ပီႈၼွင်ႉမုင်ႉႁေႃႁိူၼ်းမၼ်းၼၢင်းသေ တင်း ပီႈၼွင်ႉဝၢၼ်ႈႁႆး ၵႂႃႇႁပ်ႉဢဝ်တူဝ်ၼၢင်းမူဝ်ႁွမ်ယဝ်ႉ။ ယဝ်ႉၵေႃႈ တေမီးပၢင်သပ်းၸႅင်ႈၶၢဝ်ႇတီႈ ငဝ်ႈငုၼ်း ဝၢၼ်ႈႁႆး။ လွင်ႈပၢင်သပ်းၸႅင်ႈၶၢဝ်ႇတႄႉ လႅပ်ႈတေပဵၼ်မိူဝ်ႈၽုၵ်ႈ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၼႂ်းၶေႃႈပိုၼ်ၽၢဝ်ႇ TNLA ဢွၵ်ႇဝႆႉဝႃႈ ယူႇတီႈၶွမ်ႊမတီႊ FPNCC လႆႈၶိုင်ပၼ်သေ ယူႇတီႈ SSPP/SSA တုၵ်းယွၼ်းၵေႃႈပိူင်ၼိုင်ႈသေ ယဝ်ႉၵေႃႈ ၸၢဝ်းတႆး တင်းတဢၢင်းၵေႃႈ သမ်ႉပဵၼ်ၸၢဝ်းၶိူဝ်း ဢၼ်ယူႇ ၵိုၵ်းၵၼ်မႃးပီယၢဝ်းၶၢဝ်းႁိုဝ်ၵေႃႈၸႂ်ႈ ယွၼ်ႉၼၼ်ႉလႄႈ ယူႇတီႈတပ်ႉသိုၵ်းတဢၢင်း TNLA ၸင်ႇ လူတ်းယွၼ်ႇတၢင်း ၽိတ်းတူတ်ႈတၢမ်ႇပၼ် ၼၢင်းမူဝ်ႁွမ်သေ ပူတ်းပွႆႇတူဝ်မၼ်းၼၢင်းဢွၵ်ႇမႃးယဝ်ႉ ဝႃႈၼႆ။

ၸၢႆးသေႃးသူၺ်ႇ(ႁွင်ႉ) ၸၢႆးလၢဝ်ၶမ်း ၵေႃႉပဵၼ်ၽူဝ် ၼၢင်းမူဝ်ႁွမ် လၢတ်ႈတီႈၽူႈတွႆႇႁွၵ်ႈဝႃႈ “ ယိၼ်းၸူမ်းၸွမ်း တႄႉၶႃႈ တေႃႈလဵဝ်တႄႉ တူဝ်မၼ်းၼၢင်းပႆႇႁွတ်ႈၽႅဝ်ႁိူၼ်းၶႃႈ။ မိူဝ်ႈလႂ်ပေႃးၽႅဝ်ႁိူၼ်း ယဝ်ႉတူဝ်ႈလီငၢမ်းယဝ်ႉ ႁဝ်း ၶႃႈၵေႃႈ တေလႆႈဝႃႈပဵၼ်လွင်ႈၸႂ်လီယဝ်ႉ” ဝႃႈၼႆ။

မိူဝ်ႈဝၼ်းတီႈ 10/10/2018 ယူႇတီႈၶွမ်ႊမတီႊဢုပ်ႇဢူဝ်းငူပ်ႉငီႉၵၢၼ်မိူင်း ၸုမ်းဢူၺ်းလီပွတ်းႁွင်ႇ FPNCC ယူႇၵၢင် ၶိုင်ပၼ်သေ တူဝ်တႅၼ်းၸုမ်းတူင်ႉၼိုင်တူင်ႇဝူင်းတႆး 10 ၸုမ်း ဝဵင်းၼမ်ႉၶမ်း လႆႈဢုပ်ႇၵၼ်တင်း သိုၵ်းတဢၢင်း TNLA ။ ၾၢႆႇတဢၢင်း တူၵ်းလူင်းတႃႇပွႆႇပၼ်တူဝ်ၼၢင်းမူဝ်ႁွမ်ၶိုၼ်းဝႆးဝႆး ၼႆသေ ယင်းႁူမ်ႈၵၼ် ဢွၵ်ႇၶေႃႈပိုၼ် ၽၢဝ်ႇၽိုၼ်ၼိုင်ႈ။