သင်ၶၸဝ်ႈ ၸႄႈဝဵင်းမူႇၸေႊဢွၼ်ႁူဝ်ၼမ်းၼႃႈသေ ၸတ်းပၢင်ယွၼ်းသူးပၼ်ၸဝ်ႈတူၼ်ၶူး ၵလျႃႇၼဝမ်ႇသ ၸဝ်ႈၵွၼ်းဝတ်ႉၵျွင်းယွတ်ႈ ဝဵင်းၵျွၵ်ႉမႄး ဢၼ်ၺႃးၵူၼ်းႁၢႆႉ 2 ၵေႃႉယိုဝ်းသေလူႉလွၼ်ႇၵႂႃႇၼၼ်ႉ ဝႃႈၼႆ။
ပၢင်ယွၼ်းသူးၼႆႉ ၸတ်းႁဵတ်းမိူဝ်ႈဝၼ်းတီႈ 12/10/2018 ယၢမ်းၵၢင်ၶမ်ႈ မွၵ်ႈ 7 မူင်း တီႈဝတ်ႉ/ၵျွင်းၵွင်းမူးၶမ်း ဝတ်ႉ ၼၼ်ႇတႃႇဝၼ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ မီးၸဝ်ႈသင်ၶမူႇၸေႊ၊ ထုင်ႉမၢဝ်း၊ မႄႈႁိူၼ်းၼုမ်ႇလႄႈလုၵ်ႈ ႁဵၼ်း ၸိူဝ်းဢွင်ႇပူၼ်ႉၸၼ်ႉသိပ်း ၶဝ်ႈႁူမ်ႈယွၼ်းသူး 80 ပၢႆ ဝႃႈၼႆ။
လိူဝ်ၼၼ်ႉ မိူဝ်ႈဝၼ်းတီႈ 11/10/2018 ယၢမ်းႁူဝ်ၶမ်ႈ 6:30 မူင်းၼၼ်ႉ သင်ၶၸဝ်ႈ ဝဵင်းၶူဝ်လမ် ဢွၼ်ႁူဝ်ၼမ်း ၼႃႈ သေ ၸတ်းႁဵတ်းပၢင်တႆႈ တဵၼ်းယွၼ်းသူး သူင်ႇမဵတ်ႉတႃႇပၼ် ၸဝ်ႈတူၼ်ၶူးၵလျႃႇၼဝမ်ႇသ ၽူႈၵွၼ်းဝတ်ႉ ၵျွင်းယွတ်ႈ ၸႄႈဝဵင်းၵျွၵ်ႉမႄး။ ပၢင်ယွၼ်းသူးၼႆႉ ၸတ်းႁဵတ်းတီႈ ဝတ်ႉသီရိမင်ႇၵလႃႇၵိင်ႇ ၸႄႈဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။
မိူဝ်ႈဝၼ်းတီႈ 08/10/2018 ၶၢဝ်းယၢမ်းတၢမ်းၶမ်ႈ 4 :00 မူင်း ၼၼ်ႉၵေႃႈ ၶူးပူင်သွၼ်လူင်ၸၢႆးၾႃႈ၊ လုၵ်ႈႁဵၼ်း ၸၼ်ႉၸွမ်ၵေႃတႆး၊ လုၵ်ႈႁဵၼ်းၸိူဝ်ႉၸၢတ်ႈလွႆတႆးလီ ဢိၵ်ႇၵူၼ်းၼုမ်ႇၸိူဝ်းၼႆႉ ႁူမ်ႈၵၼ်ၼႄၵၢင်ၸႂ်သၢၼ်ၶတ်း လွင်ႈဢမ်ႇ တြႃးလွင်ႈ ၵေႃႇၵၢၼ် ႁၢႆႉၼႂ်းမိူင်းတႆး ။ လိူဝ်ၼၼ်ႉၶၢဝ်းယၢမ်းၵၢင်ၶမ်ႈမွၵ်ႈ 7 မူင်း ဢွၼ်ၵၼ် တႆႈတဵၼ်း ယွၼ်းသူးပၼ်ၸဝ်ႈၶူး ၵလျႃႇၼ ဝမ်ႇသ ဢၼ်ထုၵ်ႇၵူၼ်းႁၢႆႉ ယိုဝ်းလူႉလွၼ်ႇထင်တီႈ မိူဝ်ႈဝၼ်းတီႈ 05/10/2018 ၼၼ်ႉ ဝႃႈၼႆ။
ၸဝ်ႈတူၼ်ၶူးၵလျႃႇၼဝမ်ႇသ ၽူႈၵွၼ်းဝတ်ႉၵျွင်းယွတ်ႈ ဝဵင်းၵျွၵ်ႉမႄး ဢႃယု 47 ပီ ဝႃႇၸဝ်ႈ 27 ဝႃႇၼႆႉ ၺႃးၵူၼ်း ယိပ်းၵွင်ႈ 2 ၵေႃႉ ၶဝ်ႈယိုဝ်း တီႈဝတ်ႉၵျွင်းမၼ်းၸဝ်ႈ မိူဝ်ႈဝၼ်းတီႈ 5 လိူၼ် October ယၢမ်းႁူဝ်ၶမ်ႈ 6 မူင်းၶိုင်ႈ ၽွင်းၶၢဝ်းတေဢွၼ်ၸဝ်ႈသၢင်ႇဢွၼ်ႇၶဝ် ၶိုၼ်ႈၵျွင်းဝႆႈၽြႃး ။ မၢၵ်ႇၵွင်ႈတိူဝ်ႉ ၸွမ်းဢူၵ်း ၸွမ်းၶႅၼ် ၸွမ်းၶႃ ၸဝ်ႈ တူၼ်ၶူး 7 တီႈသေ လူႉလွၼ်ႇၵႂႃႇ။ ဝၼ်းတီႈ 11 သမ်ႉ ၸဝ်ႈသင်ၶ လႄႈတၵ်ႉၵႃႇၶဝ် ၸတ်းႁဵတ်းပၢင်သၢင်းၵဵဝ်ႇ လုမ်းလႃးၶၢပ်ႈတူဝ်မၼ်းၸဝ်ႈ။ ၸဝ်ႈၵလျႃႇၼဝမ်ႇသၼႆႉ ဢွၼ်ႁူဝ်တူင်ႉၼိုင် ၼႂ်းတူင်ႇဝူင်းသင်ၶၸဝ်ႈလႄႈ ၵူၼ်း မိူင်းၸဝ်ႈၼိုင်ႈလႄႈ ပဵၼ်တီႈၵူၼ်းမိူင်း လႆႈပိုင်ႈဢိင်ၸႂ်ယႂ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ