သင်ၶၸဝ်ႈလႄႈ ၵူၼ်းမိူင်း ၶူဝ်လမ် ႁူမ်ႈၵၼ်တႆႈတဵၼ်းယွၼ်းသူးပၼ် ၸဝ်ႈတူၼ်ၶူးၵလျႃႇၼဝမ်ႇသ ဢၼ်ၺႃးၵူၼ်းႁၢႆႉ 2 ၵေႃႉၶဝ်ႈယိုဝ်းၼႂ်းဝၢင်းဝတ်ႉ ၵျွင်းယွတ်ႈ ဝဵင်းၵျွၵ်ႉမႄးသေ လႆႈလူႉလွၼ်ႇထင်တီႈၵႂႃႇၼၼ်ႉ။
ဝၼ်းတီႈ 11/10/2018 ယၢမ်းႁူဝ်ၶမ်ႈ 6:30 မူင်းၼၼ်ႉ သင်ၶၸဝ်ႈ ဢွၼ်ႁူဝ်ၼမ်းၼႃႈသေ ၸတ်းႁဵတ်း ပၢင်တႆႈ တဵၼ်းယွၼ်းသူး သူင်ႇမဵတ်ႉတႃႇပၼ် ၸဝ်ႈတူၼ်ၶူးၵလျႃႇၼဝမ်ႇသ ၽူႈၵွၼ်းဝတ်ႉၵျွင်းယွတ်ႈ ၸႄႈဝဵင်းၵျွၵ်ႉမႄး ၼၼ်ႉ။ ပၢင်ယွၼ်းသူးၼႆႉ ၸတ်းႁဵတ်းတီႈ ဝတ်ႉသီရိမင်ႇၵလႃႇ ၵိင်ႇ ၸႄႈဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။
ၼႂ်းပၢင်တႆႈတဵၼ်းယွၼ်းသူးၼၼ်ႉ ၸဝ်ႈတူၼ်ၶူး ၵုမရ ၸဝ်ႈၵွၼ်းဝတ်ႉၵျွင်းလူင် ၶႆႈပိုၼ်း ဢၼ်ၸဝ်ႈ တူၼ်ၶူးၵလျႃႇၼဝမ်ႇသ ၸဝ်ႈၽူႈ ၺႃးၵူၼ်းႁၢႆႉၶဝ်ႈယိုဝ်း တီႈၼႂ်းဝၢင်းဝတ်ႉၵျွင်းယွတ်ႈ မိူဝ်ႈဝၼ်းတီႈ 5 ယၢမ်းႁူဝ်ၶမ်ႈ 6 မူင်းၶိုင်ႈၼၼ်ႉသေ လႆႈလွၼ်ႇၵႂႃႇၼၼ်ႉ” ဝႃႈၼႆ။
ဝၢႆးသေ ၶႆႈၼႄ လွင်ႈပိုၼ်းပဵၼ် ၸဝ်ႈတူၼ်ၶူးၵလျႃႇၼဝမ်ႇသယဝ်ႉ သင်ၶၸဝ်ႈ ၵူၼ်းမိူင်း ဢွၼ်ၵၼ် ၵၼ်ႇတေႃး ၽြႃးသူင်ႇမဵတ်ႉတႃႇပၼ်သေ ဢွၼ်ၵၼ်လူင်းဝတ်ႉ/ၵျွင်း မႃးၸပ်းၾႆးတဵၼ်း လူႇတၢၼ်းၼႃႈဝတ်ႉ ယွၼ်းသူး ပၼ် ထႅင်ႈၵမ်းၼိုင်ႈသေ ၵိုတ်းလိုဝ်ႈပၢင်ၵႂႃႇလူၺ်ႈပႃႇလိလႄႈ ၽႃသႃတႆး ဝႃႈၼႆ။
ထိုင်ယၢမ်းတေႃႈလဵဝ် ၵူၼ်းဢၼ်မႃးယိုဝ်း ၸဝ်ႈတူၼ်ၶူးၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ဢမ်ႇႁူႉ၊ ၸဝ်ႈၼႃႈတီႈ ယင်းပႆႇတီႉလႆႈ ဝႃႈၼႆ။
ပၢင်ၸႃႇပၼသၢင်းၵဵဝ်ႇ ၽဝ်ၶၢပ်ႈတူဝ် ၸဝ်ႈတူၼ်ၶူးတႄႉ ပီႈၼွင်ႉတၵ်ႉၵႃႇသတ်ႉထႃး ဝဵင်းၵျွၵ်ႉမႄးၸတ်း ႁဵတ်းယဝ်ႉတူဝ်ႈ ဝၼ်းတီႈ 12/10/2018 တီႈပႃႇႁဵဝ်ႈဢေးၶျၢမ်းသႃႇ ဝဵင်းၵျွၵ်ႉမႄး။
