ၸုမ်းၶၢဝ်ႇၸၢဝ်းၶိူဝ်း BNI တင်း Joint Peace Fund ႁူမ်ႈၵၼ် ၸတ်းႁဵတ်းပၢင်ဢုပ်ႇဢူဝ်း လႅၵ်ႈလၢႆႈ ပိုၼ်ႉႁူႉၵဵဝ်ႇ ၵပ်းလွင်ႈငမ်းယဵၼ် တီႈဝဵင်းတူၼ်ႈတီး တႃႇၶၢဝ်းတၢင်း 1 ဝၼ်း ဝႃႈၼႆ။
ဝၼ်းတီႈ 11/10/2018 ယၢမ်းၵၢင်ၼႂ် 9 မူင်း ထိုင် 4:30 မူင်း ယူႇတီႈၸုမ်း BNI တင်း Joint Peace Fund ႁူမ်ႈ ၵၼ် ၸတ်းႁဵတ်းပၢင်ဢုပ်ႇဢူဝ်း လႅၵ်ႈလၢႆႈ ၵဵဝ်ႇလူၺ်ႈလွင်ႈငမ်းယဵၼ် တီႈႁၢၼ်ႉၶဝ်ႈၽၵ်း မိၼ်းၵၢၼ်ႇၵွင်း ၸႄႈ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း မီးၸုမ်းတူင်ႉၼိုင်တူင်ႇဝူင်းၵူၼ်းလႄႈ ပႃႇတီႇၵၢၼ်မိူင်းၶဝ်ႈႁူမ်ႈ 16 ၸုမ်း ဝႃႈၼႆ။
ဢူးၺူဝ်ႇမိၼ်း ၽူႈၸီႉသင်ႇၸတ်းၵၢၼ် ၸုမ်း BNI လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈတႄႇႁဵတ်းလွင်ႈ Peace Monitoring မႃး မိူဝ်ႈပီ 2013 ၵဵဝ်ႇလူၺ်ႈ လွင်ႈငမ်းယဵၼ်ၼႆႉ ႁဝ်းၶႃႈ ပႂ်ႉတူၺ်းသေ တၢင်ႇၶၢဝ်ႇၶိုၼ်ႈ ႁဵတ်းၼၼ် ၵူၺ်း။ လင်ၼႆႉမႃး ႁဝ်းၶႃႈမႃးထတ်းသၢင်တူၺ်းၼႆ ဢၼ်ၵူၼ်းမိူင်း ဢၼ်ႁူႉပွင်ႇၸႂ်လွင်ႈငမ်းယဵၼ်ၼႆႉ မၼ်း တိုၵ်ႉမီးဢေႇၼႃႇ။ ယွၼ်ႉၼၼ်လႄႈ ၼင်ႇႁိုဝ် သဵင်ႁူဝ်ၸႂ်ၵူၼ်းမိူင်း ပေႃးတေလႆႈၶဝ်ႈပႃးၼႂ်းလွင်ႈငမ်းယဵၼ်ၼႆႉ ၼၼ်ႉ ႁဝ်းၶႃႈၸင်ႇလႆႈ မႃးၸတ်းႁဵတ်းပၢင်ဢုပ်ႇဢူဝ်းလႅၵ်ႈလၢႆႈၵၼ် ၵဵဝ်ႇလူၺ်ႈလွင်ႈငမ်းယဵၼ်ၼႆႉ” ဝႃႈၼႆ။
မၼ်းၸၢႆးလၢတ်ႈဝႃႈ ၵဵဝ်ႇလူၺ်ႈလွင်ႈပၢင်ဢုပ်ႇဢူဝ်းလႅၵ်ႈလၢႆႈ လွင်ႈငမ်းယဵၼ်ၼႆႉ ၼင်ႇႁိုဝ် တေမီးသုၼ်ႇသပ်းလႅင်း လၢတ်ႈၼႄ ၵူၼ်းမိူင်းလႆႈ၊ တွၼ်ႈတႃႈတေႁူမ်ႈၵၼ်ၼၼ်ႉ တေႁဵတ်းၸိူင်ႉႁိုဝ် လွင်ႈၼႆႉၵေႃႈ ႁႂ်ႈလႆႈမီး သုၼ်ႇသပ်း လႅင်းလၢတ်ႈၼႄ။ မိူၼ် ၵူၼ်းမိူင်း၊ ၸုမ်းၵူၼ်းၼုမ်ႇ၊ ၸုမ်းၼၢင်းယိင်းလႄႈ ၸုမ်းတူင်ႉၼိုင်တူင်ႇဝူင်း ၸိူဝ်းၼၼ်ႉ ၶဝ် ၵူဝ်သင်၊ ၶဝ်ပွင်ႇၸႂ်ၸိူင်ႉႁိုဝ်၊ ယွၼ်ႉၼၼ် ႁႂ်ႈထၢမ်ၶဝ်လႆႈ လွင်ႈဢၼ်ၶဝ်ၵူဝ်ယူႇၼၼ်ႉ ႁႂ်းပေႃး လၢတ်ႈၼႄလႆႈ။ ယွၼ်ႉၼၼ် ႁဝ်းၶႃႈၶတ်းၸႂ် ႁဵတ်းၶူဝ်ၵၢႆႇပၼ်ၶဝ်သေ ႁႂ်ႈၶဝ်ပေႃး ဢုပ်ႇဢူဝ်းၵွင်ႉသၢၼ် ႁဵတ်းသၢင်ႈၵႂႃႇၸွမ်းၵၼ်လႆႈ” ဝႃႈၼႆ။
ၼႂ်းပၢင်ဢုပ်ႇဢူဝ်းလႅၵ်ႈလၢႆႈ လွင်ႈငမ်းယဵၼ်ၼႆႉ ဢုပ်ႇဢူဝ်းၵၼ် ပၼ်တၢင်းႁၼ်ထိုင် ၽွၼ်းပၢင်ႈ လွင်ႈပၢင်ၵုမ်လူင် ပၢင်လူင် ပွၵ်ႈၵမ်း 2 ဢၼ်ၸတ်းႁဵတ်းမႃးၼၼ်ႉ။ ဢုပ်ႇဢူဝ်း ငဝ်းလၢႆးလွင်ႈလႅၵ်ႈလၢႆႈၶိုၼ်ႈယႂ်ႇ ၶၵ်ႉၵၢၼ် JMC။ ဢုပ်ႇဢူဝ်းငဝ်းလၢႆး လွင်ႈလႅၵ်ႈလၢႆႈ ၶိုၼ်ႈယႂ်ႇ ၶၵ်ႉၵၢၼ် UPDJC ၼႂ်း 5 ႁူဝ်ၶေႃႈ။ ဢုပ်ႇဢူဝ်းထတ်းသၢင် လွင်ႈငမ်း ယဵၼ် ၼႂ်းမိူင်းႁူမ်ႈတုမ် လႄႈ ၼႂ်းၸႄႈမိူင်းတႆး ၸဵမ်ၸိူဝ်းၼႆႉ။
တီႈၼႂ်းပၢင်ၼႆႉ မီးၸုမ်းတူင်ႇဝူင်းၵူၼ်း တင်း ပႃႇတီႇၵၢၼ်မိူင်း ၶဝ်ႈႁူမ်ႈ 40 ပၢႆ ဝႃႈၼႆ။
