ၸၢႆးမွင်ႇ ထွင်းၻီး လုၵ်ႈလၢၼ်ႁႅင်းၵၢၼ်ယၢၼ်မိူင်း (ၵူၼ်းၼမ်ႉၸၢင်) ဢၼ်သၢင်ႈၸိုဝ်ႈသဵင်ပၼ်မိူင်းထႆးၼၼ်ႉ လႆႈႁပ်ႉပဵၼ်ၵူၼ်းမိူင်းထႆး၊ လႆႈဝတ်းဝႂ်ထႆးယဝ်ႉ။
ဝၼ်းတီႈ12/10/2018 ၸၢႆးမွင်ႇ ထွင်းၻီး လုၵ်ႈလၢၼ်ႁႅင်းၵၢၼ်ယၢၼ်မိူင်း ဢၼ်ယူႇတီႈလုၵ်ႈႁဵၼ်းထႆးသေ ၵႂႃႇၶႅင်ႇၶိူင်ႈမိၼ်ၸေႈပေႉမႃးမိူင်းၵျပၢၼ်ႇၼၼ်ႉ မိူဝ်ႈလဵဝ်လၢႆၾၢႆႇဢွၵ်ႇလိၵ်ႈယိုၼ်ယၼ်ပၼ်သေ မၼ်းၸၢႆးလႆႈထၢႆႇဝတ်းဝႂ်ထႆး တီႈ လုမ်း ၸႄႈဝဵင်းမိူင်း ၸႄႈတွၼ်ႈၵဵင်းမႆႇ ၸိုင်ႈထႆးယဝ်ႉဝႃႈၼႆ။
ၸၢႆးမွင်ႇထွင်းၻီး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈလဵဝ်ၶႃႈလႆႈထၢႆႇဝတ်းဝႂ် (မၢတ်ႈပုင်ႇတိၼ်ႇ/ မၢႆၾၢင်ထႆး) တီႈလုမ်းၸႄႈဝဵင်းယဝ်ႉၶႃႈဢေႃႈ ယိၼ်းၸူမ်းယႂ်ႇၼမ်ထိုင် ၽူႈယႂ်ႇၵူၼ်းလူင် ၶူးသွၼ်ၵူႈၵေႃႉ ဢၼ်ၸွႆႈထႅမ်ၶႃႈမႃး တေႃႇပေႃးလႆႈဝႂ်ထႆးၼႆႉတႄႉတႄႉၶႃႈ ” ဝႃႈၼႆ။
ၸၢႆးမွင်ႇ ထွင်းၻီးၼႆႉ ၵိူတ်ႇမိူဝ်ႈဝၼ်းတီႈ 02/05/1997 ပဵၼ်လုၵ်ႈၸၢႆး ၸၢႆးၺုၼ်ႉလႄႈ ၼၢင်းမွၼ်း မီးပီႈၼွင်ႉႁူမ်ႈ တွင်ႉ 2 ၵေႃႉ ပဵၼ်ၵူၼ်းၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ ပေႃႈမႄႈမႃးႁဵတ်းၵၢၼ်ၼႂ်းမိူင်းထႆးသေ မၼ်းၸၢႆးၶဝ်ႈႁဵၼ်းတီႈႁူင်းႁဵၼ်းဝၢၼ်ႈႁူၺ်ႈသၢႆး ။ မိူဝ်ႈလဵၵ်ႉတူပ်ႉၸေႈႁဵတ်းႁၢင်ႈၶိူင်ႈမိၼ်သေ ၶဝ်ႈၶႅင်ႇၼႂ်းမိူင်းထႆးပေႉပိူၼ်ႈမူတ်း ။ ၽွင်းယူႇၸၼ်ႉ (ပေႃး) 4 မိူဝ်ႈဢႃယုလႆႈ 12 ပီ ၼၼ်ႉလႆႈတၢင်တူဝ်မိူင်းထႆးသေ ၵႂႃႇၶႅင်ႇႁိူဝ်းမိၼ်ၸေႈ တီႈဝဵင်းၶျီႊၿႃႊ မိူင်း ၵျပၢၼ်ႊ ၸုမ်းမၼ်းၸၢႆးလႆႈႁပ်ႉသူးတီႈ 1 သုၼ်ႇတူဝ်မၼ်း ၸၢႆးလႆႈႁပ်ႉသူးရၢင်းဝလ်းတီႈ 3 ႁဵတ်း ႁႂ်ႈၵူၼ်းမိူင်းထႆးႁပ်ႉႁူမ်ၸူမ်းတွၼ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ