သင်ၶၸဝ်ႈ လႄႈ ၵူၼ်းမိူင်း ၼႂ်းၵိင်ႇၸႄႈဝဵင်းၶူဝ်လမ် တေႁူမ်ႈၵၼ် တႆႈတဵၼ်း ယွၼ်းသူးပၼ် ၸဝ်ႈတူၼ်ၶူး ၵလျႃႇၼဝမ်ႇသ ဢၼ်ၺႃး ၵူၼ်းႁၢႆႉၶဝ်ႈယိုဝ်းထိုင်တီႈလူႉလွၼ်ႇ ထင်တီႈ တီႈၼႂ်းဝတ်ႉၵျွင်းယွတ်ႈ ၸႄႈဝဵင်း ၵျွၵ်ႉမႄးၼၼ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 11/10/2018 ယၢမ်းႁူဝ်ၶမ်ႈ 6:30 မူင်း သင်ၶၸဝ်ႈ ဝဵင်းၶူဝ်လမ် တေဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်တႆႈတဵၼ်းယွၼ်းသူးပၼ် ၸဝ်ႈတူၼ်ၶူးၵလျႃႇၼဝမ်ႇသ။ တေၸတ်းပၢင်တႆႈတဵၼ်း တီႈၵျွင်းလူင် ဝတ်ႉသီရိမင်ၵလႃႇ ၵိင်ႇၸႄႈဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၸၢႆးဢွၼ်ႇ ၵူၼ်းၶူဝ်လမ်လၢတ်ႈတီႈၽူႈတွႆႇႁွၵ်ႈဝႃႈ “ ၽူႈဢွၼ်ၸတ်းႁဵတ်း ပၢင်တႆႈတဵၼ်းယွၼ်းသူးပဵၼ် ၸဝ်ႈတူၼ် ၶူးသေႃးၼၼ်ႇတႃႇ ဝတ်ႉသၢႆလႅင်း ယိူင်းဢၢၼ်းဢၼ်ယႂ်ႇလူင်တႄႉ ႁႂ်ႈဝိၺၢၼ်ႇၶႂၼ်ငဝ်း ၸဝ်ႈသြႃႇၵလျႃႇၼဝမ်ႇသ ႁွတ်ႈတီႈလီလႄႈ လွင်ႈ ႁၢႆႉၸႃႉလူင် ၸိူင်ႉၼႆ ယႃႇႁႂ်ႈၵိူတ်ႇၶိုၼ်ႈ ၼႂ်းသင်ၶၸဝ်ႈ ဢၼ်ယူႇသဝ်းၼႂ်းၸိုင်ႈတႆးထႅင်ႈ။ လိူဝ်ၼၼ်ႉ ယႃႇႁႂ်ႈၽႂ် လႆႈႁူပ်ႉထူပ်းလွင်ႈႁၢႆႉၸႃႉၸိူင်ႉၼႆထႅင်ႈ ယဝ်ႉၵေႃႈ ႁႂ်ႈဝၢၼ်ႈမိူင်းႁဝ်းၶႃႈ လႆႈၵတ်းယဵၼ် ၽႂ်းၽႂ်း” ဝႃႈၼႆ။
လိူဝ်ၼၼ်ႉ ယူႇတီႈသင်ၶလႄႈ ၵူၼ်းၼုမ်ႇၶူဝ်လမ် မွၵ်ႇထိုင် ပီႈၼွင်ႉၵူၼ်းမိူင်း ၼႂ်းဝဵင်းၶူဝ်လမ် တင်းသဵင်ႈ ႁႂ်ႈမႃးႁူမ်ႈ ၵၼ်တႆႈတဵၼ်းယွၼ်းသူးပၼ် ႁႂ်ႈဝိ ၺၢၼ်ႇၶႂၼ်ငဝ်း ၸဝ်ႈတူၼ်ၶူး ၵလျႃႇၼဝမ်ႇသ ႁွတ်ႈတီႈလီတီႈငၢမ်း ဝႃႈၼႆ။
မိူဝ်ႈၼႆႉ ဝၼ်းတီႈ 11 ယူႇတီႈသင်ၶၸဝ်ႈလႄႈ တၵ်ႉၵႃႇသတ်ႉထႃး ၼႂ်းၸႄႈဝဵင်းၵျွၵ်ႉမႄးၵေႃႈ တေႁူမ်ႈၵၼ် သၢင်း ၵဵဝ်ႇ ပူၼ်ႉၶၢပ်ႈတူဝ်ၸဝ်ႈတူၼ်ၶူး ၵလျႃႇၼဝမ်ႇသ တီႈဝဵင်းၵျွၵ်ႉမႄး။
ၸဝ်ႈတူၼ်ၶူး ၵလျႃႇၼဝမ်ႇသၼႆႉ မိူဝ်ႈဝၼ်းတီႈ 5 လိူၼ်ဢွၵ်ႊထူဝ်ႊၿိူဝ်ႊ ယၢမ်းႁူဝ်ၶမ်ႈ ၺႃးၵူၼ်းႁၢႆႉ 2 ၵေႃႉ ၶဝ်ႈမႃး ၼႂ်းဝၢင်းဝတ်ႉၵျွင်းယွတ်ႈ လၢၵ်ႈၵွင်ႈယိုဝ်းသႂ်ႇ 7 ၵမ်းသေ လႆႈလူႉလွၼ်ႇတီႈၼၼ်ႈၵမ်းလဵဝ်။ ထိုင်ယၢမ်းတေႃႈလဵဝ် ၵူၼ်းဢၼ်မႃးယိုဝ်း ၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ပႆႇႁူႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ