ၸဝ်ႈႁႆႈၸဝ်ႈၼႃး 60 ပၢႆ ၼႂ်းၸႄႈဝဵင်းၼွင်ၶဵဝ် ဢမ်ႇႁၢၼ်ႉၸႂ်ဢမ်ႇၽွမ်ႉၸွမ်း လူင်ပွင်ၸိုင်ႈမၢၼ်ႈ ဢၼ်သၢႆႈတႅၼ်း ပၼ် တီႈလိၼ်ၼၼ်ႉ ယွၼ်ႉဝႃႈ သၢႆႈတႅၼ်းဢမ်ႇတဵမ်ထူၼ်ႈ ၸွမ်းၼင်ႇတူၵ်းလူင်းၵၼ်ဝႆႉၼၼ်ႉ ဝႃႈၼႆ။

ဝၼ်းတီႈ 09/10/2018 ယၢမ်းၵၢင်ၼႂ် 9 မူင်း ထိုင် 2 မူင်းဝၢႆးဝၼ်း ၽူႈတႅၼ်းသၽႃး ပႃႇတီႇႁူဝ်သိူဝ် SNLD ႁူပ်ႉ ထူပ်းၵူၼ်းမိူင်း ၸဝ်ႈႁႆႈ/ၼႃး 62 ၵေႃႉ တီႈလုမ်းပႃႇတီႇႁူဝ်သိူဝ် ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။ လွင်ႈဢၼ်လူင်ပွင်ၸိုင်ႈ မၢၼ်ႈ တေၶႂၢၵ်ႈသဵၼ်ႈတၢင်းမႂ်ႇလႄႈ ႁဵတ်းၶူဝ်ၵိုတ်ႈမႂ်ႇၼၼ်ႉ ယွၼ်ႉဝႃႈတုမ်ႉ တိူဝ်ႉပႃးတီႈလိၼ်သူၼ်ႁႆႈၼႃးၵူၼ်းမိူင်းဝႆႉသေ ၵူၼ်းမိူင်းလႆႈႁပ်ႉၵႃႈသၢႆႈတႅၼ်း တီႈလိၼ်ဢမ်ႇတဵမ်ထူၼ်ႈ ဢမ်ႇ မိူၼ်ၼင်ႇ လူင်ပွင်ၸိုင်ႈ တင်း ၵူၼ်းမိူင်းတူၵ်းလူင်း ၵၼ်ဝႆႉၼၼ်ႉ ဝႃႈၼႆ။

ၸၢႆးဢွင်ႇမိူင်း ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၶဝ် တႅပ်းတတ်းၵၼ်တႄႉ ၶဝ်တေႁဵတ်းတၢင်းမႂ်ႇ ၶဝ်မႃးထူပ်း ၵူၼ်းမိူင်းလႄႈ ၽူႈတႅၼ်းၼူၵ်ႉယုင်း ၶဝ်မႃးဢုပ်ႇဢူဝ်းၵၼ်။ တၢင်းၾၢႆႇ ၸဝ်ႈႁႆႈ/ ၼႃး ယွၼ်းၵႃႈသၢႆႈတႅၼ်း ၼိုင်ႈဢေႊၶိူဝ်ႊလႂ် 400 ထိုင် 500 သႅၼ်ပျႃး။ ၾၢႆႇတၢင်းလူင်ပွင်ၸိုင်ႈဝႃႈ မၼ်းၼမ်ၼႃႇ ၼႆသေ ၶိုၼ်းတူၵ်းလူင်းလႆႈၸႂ်ၵၼ် ပဵၼ်မႃး 200 ထိုင် 300 သႅၼ်ပျႃး။ တေႃႈလဵဝ် ဢၼ်ၶဝ်မႃးသၢႆႈတႅၼ်း ပၼ်တီႈ ၸဝ်ႈႁႆႈ/ၼႃးသမ်ႉ ဢမ်ႇၸႂ်ႈၸိူင်ႉၼၼ် ၶဝ်ပၼ်ႁဝ်း 100 သႅၼ်၊ 150 သႅၼ်ၵူၺ်း” ဝႃႈၼႆ။

တီႈလိၼ်ဢၼ်လူင်ပွင်ၸိုင်ႈယိုတ်းသေ တေႁဵတ်းသဵၼ်ႈတၢင်းမႂ်ႇဢၼ်တေၵၢႆႇၸူး တီႈၶူဝ်ၵိုတ်ႈမႂ်ႇၼၼ်ႉ ယွၼ်ႉလူင် ပွင် ၸိုင်ႈတင်း ၵူၼ်းမိူင်းဢမ်ႇမီးလွင်ႈလူင်ႉလႅင်းၵၼ်သေ ၵူၼ်းမိူင်း တၢင်းပွတ်းၼွင်ၶဵဝ် ၵျွၵ်ႉမႄး ဢမ်ႇမီးလွင်ႈ ႁၢၼ်ႉၸႂ် ၽွမ်ႉၸွမ်း လွင်ႈၵႃႈသၢႆႈတႅၼ်း တီႈလိၼ်ၸိူဝ်းၼႆႉ။

ၸၢႆးဢွင်ႇမိူင်း လၢတ်ႈဝႃႈ “ၸဝ်ႈသူၼ်ဢၼ်ႁပ်ႉၵႃႈသၢႆႈတႅၼ်းၼင်ႇ လူင်ပွင်ၸိုင်ႈပၼ်ၼၼ်ႉ မီးဢိတ်းဢွၼ်ႇၵူၺ်း။ 62 ၵေႃႉၼႆႉၶဝ်တိုၼ်းဢမ်ႇၽွမ်ႉၸွမ်းလႃးလႃး။ ယွၼ်ႉၼၼ်လႄႈ ႁဝ်းၶႃႈ ၵူၼ်းမိူင်း ၽူႈတႅၼ်း တေၵႂႃႇႁူပ်ႉ တၢင်ႇ ၼႄ ၽွင်းလူင်ၾၢႆႇၵေႃႇသၢင်ႈ တီႈၼေႇပျီႇတေႃႇ။ လွင်ႈဢၼ်ဝႃႈ ၵူၼ်းမိူင်းႁဝ်း ဢမ်ႇၽွမ်ႉၸွမ်း လွင်ႈၵႃႈသၢႆႈတႅၼ်း ဢမ်ႇလႆႈတဵမ်ထူၼ်ႈၼၼ်ႉ၊ လွင်ႈၼႆႉ ႁဝ်းၶႃႈ တုၵ်းယွၼ်းႁႂ်ႈလႆႈပဵၼ်လွင်ႈၽဵင်ႇပဵင်း တွၼ်ႈတႃႇၵူၼ်းမိူင်းႁဝ်း” ဝႃႈၼႆ။

ၽူႈတႅၼ်းသၽႃးဢၼ်လူင်းႁူပ်ႉထူပ်းၵူၼ်းမိူင်း ၸႄႈဝဵင်းၼွင်ၶဵဝ်ၼၼ်ႉ ယူႇတီႈၽူႈတႅၼ်း သၽႃးၵူၼ်းမိူင်း ၸႄႈ ဝဵင်းသႅၼ်ဝီ ၸၢႆးဢူးၶမ်း၊ ၽူႈတႅၼ်းသၽႃးၵူၼ်းမိူင်း ၸႄႈဝဵင်းသီႇပေႃႉ ၸၢႆးတၢၼ်ႉၸိၼ်ႇ၊ ၽူႈတႅၼ်းသၽႃး ၵူၼ်းမိူင်း ၸႄႈဝဵင်းၵျွၵ်ႉမႄး ၸၢႆးထုၼ်းဢွင်ႇလႄႈ ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဢုင်းၵျေႃႇ ၸဵမ်ၸိူဝ်းၼႆႉ ဝႃႈၼႆ။

လွင်ႈတေႁူပ်ႉထူပ်း ၾၢႆႇလူင်ပွင်ၸိုင်ႈမၢၼ်ႈ တီႈၼေႇပျီႇတေႃႇ ဝၼ်းတီႈ 11/10/2018 သမ်ႉ ၽွင်းလူင်ၾၢႆႇၵေႃႇ သၢင်ႈ၊ ၶွမ်ႊပၼီႊ OHC (Oriental Highway Company) ဢၼ်တေႁဵတ်းသဵၼ်ႈတၢင်း၊ ၽွင်းလူင်မိူင်းတႆး၊ ၽူႈ တႅၼ်းသၽႃးလႄႈ ၽူႈတၢင် တူဝ်ၵူၼ်းမိူင်း ၸဝ်ႈႁႆႈ/ ၸဝ်ႈၼႃး ၼႂ်းၸႄႈဝဵင်းၼွင်ၶဵဝ် ၸိူဝ်းၼႆႉ။