ၸဝ်ႈႁႆႈၸဝ်ႈၼႃး 9 ၸႄႈဝဵင်း ၸိုင်ႈတႆးပွတ်းဢွၵ်ႇ ၶဝ်ႈႁူမ်ႈပၢင်ပၼ်ပိုၼ်ႉႁူႉ ၵဵဝ်ႇၵပ်းမေႃႇႁႄႈ၊ လွၵ်းလၢႆးႁႄႉၵင်ႈ လွင်ႈၶုတ်းမေႃႇႁႄႈ ဢၼ်မီးၸမ်ဝၢၼ်ႈ/ ဝဵင်း ၸိူဝ်းၼၼ်ႉ တေလႆႈႁဵတ်းၸိူင်ႉႁိုဝ်၊ တေလႆႈတၢင်ႇထိုင်တီႈလႂ် လၢႆလၢႆၸဵမ်ၸိူဝ်းၼႆႉ ဝႃႈၼႆ။
ဝၼ်းတီႈ 08-09/10/2018 တႃႇၶၢဝ်းတၢင်း 2 ဝၼ်း ယူႇတီႈမဵတ်ႉတႃႇၾွင်ႊတေႊသျိၼ်ႊဢွၼ်ႁူဝ် ၸတ်းႁဵတ်း ပၢင်သွၼ်ပၼ်ပိုၼ်ႉႁူႉ ၸဝ်ႈႁႆႈၸဝ်ႈၼႃႈ တီႈႁၢၼ်ႉၶၢႆၶဝ်ႈၽၵ်း သဵၵ်ႉတႅင်းၵျႃႉ(စိတ်တိုင်းကျ) ၸႄႈဝဵင်းၵဵင်းတုင် ၸိုင်ႈ တႆးပွတ်းဢွၵ်ႇၶူင်း။ ပၼ်ပၢင်သွၼ်ပိုၼ်ႉႁူႉ လွၵ်းလၢႆးႁႄႉၵင်ႈ လွင်ႈၵၢၼ်ၶုတ်းမေႃႇႁႄႈ ဝႃႈၼႆ။
လုင်းၸၢႆးၼၼ်ႇတီႉ မိူင်းသၢတ်ႇ ၽူႈၶဝ်ႈႁူမ်ႈပၢင်သွၼ် ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ဢၼ် ႁဝ်းၶႃႈလႆႈႁဵၼ်း ႁူႉမႃးတႄႉ မိူၼ်ၼင်ႇၶွမ်ႊပၼီႊ သင်ၵေႃႈယဝ်ႉ သင်ၶဝ်ႈမႃးၼႂ်းဝၢၼ်ႈ ၼႂ်းမိူင်းႁဝ်း တႃႇတေမႃးၶုတ်း မေႃႇငိုၼ်း၊ မေႃႇၶမ်း၊ မေႃႇႁႄႈ မေႃႇသင်ၵေႃႈယဝ်ႉ ပေႃးဝႃႈ ၵူၼ်းမိူင်းဢမ်ႇၽွမ်ႉဢမ်ႇလႆႈၸႂ် ဢမ်ႇႁူႉၸွမ်းၸိုင် ႁဝ်းမီး သုၼ်ႇထတ်းသၢင် ဢၼ်ၶဝ်ႁဵတ်းၼၼ်ႉ ၸွင်ႇမၼ်းမီးလွင်ႈတုမ်ႉတိူဝ်ႉၵူၼ်းဝၢၼ်ႈႁဝ်း ၵူၼ်းမိူင်းႁဝ်း ၸွင်ႇမီးၽေး ၶဵၼ် သင်ၶဝ်မႃးၶုတ်းသေ ၵူၼ်းမိူင်းဢမ်ႇၽွမ်ႉၸွမ်းၼၼ်ႉ ၵူၼ်းမိူင်းမီးသုၼ်ႇသၢၼ်ၶတ်း တၢင်ႇလိၵ်ႈလႆႈ” ဝႃႈၼႆ။
မၼ်းၸၢႆးသိုပ်ႇလၢတ်ႈဝႃႈ မိူၼ်ၼင်ႇတီႈမိူင်းသၢတ်ႇ မေႃႇႁိၼ် မိူင်းၵူၵ်းၼၼ်ႉ မၼ်းၸမ်ဝၢၼ်ႈၸမ်ဝဵင်းၼႃႇ သင်ဝႃႈ ၵူၼ်းမိူင်း လႆႈႁူႉမႃးၸဵမ်လႂ်ၸိုင် ယင်းတေဢမ်ႇၸၢင်ႈၶုတ်း လႆႈပဵၼ်မႃးလႆႈၵႃႈၼႆႉ။ တေႃႈ လဵဝ် သင်ၶွမ်ႊပၼီႊ ဢၼ်လႂ်တေၶဝ်ႈမႃးၶုတ်း ၼႂ်းမိူင်းလႂ်၊ ဝဵင်းလႂ်ၸိုင် ႁဝ်းၶႃႈ မီးၶွမ်ႊမတီႊမၼ်းဝႆႉယဝ်ႉ တႃႇတေ ထတ်းသၢင်၊ ႁၢင်ႈ ႁႅၼ်းတၢင်ႇလိၵ်ႈ လွင်ႈၵူၼ်းမိူင်းဢမ်ႇႁၼ်လီၸွမ်း ၸဵမ်ၸိူဝ်းၼႆႉ ဝႃႈၼႆ။
ၸဝ်ႈႁႆႈ/ ၼႃး 9 ၸႄႈဝဵင်း ၼႂ်းၸိုင်ႈတႆးပွတ်းဢွၵ်ႇၶူင်း ဢၼ်မႃးၶဝ်ႈႁူမ်ႈ လဵပ်ႈႁဵၼ်း တႃႇၶၢဝ်းတၢင်း 2 ဝၼ်းၼႆႉ မီး တူဝ်တႅၼ်း ၼိုင်ႈၸႄႈဝဵင်း လႂ် 7 ၵေႃႉ ထိုင် 8 ၵေႃႉ တင်းမူတ်း ၶဝ်ႈႁူမ်ႈ တေမီး မွၵ်ႈ 50 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ