ၽူႈၵွၼ်းၸႄႈဝဵင်းၵဵင်းတုင် ပိုၼ်ၽၢဝ်ႇဝႆႉ သင်ဝႃႈ ၽႂ်ၵေႃႉလႂ် ၵႃႉၶၢႆ ၸုတ်ႇမူၵ်ႇတႅၵ်ႇ ၽွင်းၶၢဝ်းဢွၵ်ႇဝႃႇၸိုင် တေ ပၼ်တူတ်ႈတၢမ်ႇၸွမ်းၼင်ႇ မၢႆမီႈဢၼ်ဢွၵ်ႇဝႆႉၼၼ်ႉ ဝႃႈၼႆ။
ဝၼ်းတီႈ 05/10/2018 ၽူႈၵွၼ်းၸႄႈဝဵင်းၵဵင်းတုင် ပိုၼ်ၽၢဝ်ႇ ႁၢမ်ႈဢမ်ႇပၼ်ၵႃႉၶၢႆ ၸုတ်ႇမူၵ်ႇတႅၵ်ႇ ၸွမ်းပွၵ်ႉ/ ဢိူင်ႇ ၸွမ်းၼႂ်းမူႇဝၢၼ်ႈ ၼႂ်းၸႄႈဝဵင်းၵဵင်းတုင်။ မူၵ်ႇတႅၵ်ႇၼႆႉ တေႁဵတ်းႁႂ်ႈၵူၼ်းမိူင်းတူၵ်း ၸႂ်။ တေတုမ်ႉတိူဝ်ႉ ပၢႆးယူႇလီၵူၼ်းထဝ်ႈ။ ယွၼ်ႉပိူဝ်ႈသဵင်လင်ဢူၼ်မေႃးလႄႈ တုမ်ႉတိူဝ်ႉၵၢၼ်ဢၢၼ်ႇလိၵ်ႈလုၵ်ႈႁဵၼ်းၶဝ် ဝႃႈၼႆ။
ၵူၼ်းၶၢႆၶူဝ်းၼႂ်းၵၢတ်ႇၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ဢမ်ႇပၼ်ၶၢႆ မၼ်းတေတုမ်ႉတိူဝ်ႉၵူၼ်းမိူင်း သင်ၸိူဝ်ႉဝႃႈ ၽႂ်ပူၼ်ႉပႅၼ်ၼႆၵေႃႈ ၶဝ်တေဢဝ်လိူင်ႈၼႆဝႃႇ။ မိူဝ်ႈဝၼ်းတီႈ 7 ၼၼ်ႉ ပလိၵ်ႈၶဝ် ဢွၼ်ၵၼ်ၶဝ်ႈၺွပ်း တီႈၼႂ်းၵၢတ်ႇလူင် ဝဵင်းၵဵင်းတုင်။ ႁၼ်ၶဝ်မႃးဢဝ်ၵႂႃႇမူၵ်ႇတႅၵ်ႇ ဢၼ်ၶၢႆၸွမ်းၼႂ်းၵၢင်ၵၢတ်ႇၼၼ်ႉ ယူႇ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ တီႈသိုဝ်ႇၶၢဝ်ႇ The Voice ၵေႃႈ ဢွၵ်ႇဝႆႉဝႃႈ မိူဝ်ႈဝၼ်းတီႈ 7 ၼၼ်ႉၵူၺ်းၼင်ႇၵဝ်ႇ ပလိၵ်ႈတီႉ ၵူၼ်းၵႃႉၶၢႆ မူၵ်ႇတႅၵ်ႇ 2 ၵေႃႉ ၼႂ်းၵၢတ်ႇၵဵင်းတုင် ပဵၼ်ၼၢင်းသႅင်ၶမ်း ဢႃယု 36 ပီ လႄႈ ပႃႈၼၢင်းၶမ်းၼူၼ်း ဢႃယု 67 ပီ ဝႃႈၼႆ။
လိူဝ်ၼၼ်ႉ တီႈၸႄႈဝဵင်းလၢဝ်ႇၵၢႆးၵေႃႈ ၾၢႆႇပလိၵ်ႈမၢၼ်ႈၶဝ် ပိုၼ်ၽၢဝ်ႇ ဢမ်ႇပၼ်ၵႃႉၶၢႆ ၸုတ်ႇမူၵ်ႇတႅၵ်ႇမိူၼ်ၵၼ် သင်ဝႃႈ ၽႂ်ၵေႃႉလႂ် ဢမ်ႇႁဵတ်းၸွမ်းမၢႆမီႈၸိုင် ၸွမ်းၼင်ႇမၢႆမီႈ ဢွၵ်ႇဝႆႉၼၼ်ႉ တေပၼ်တူတ်ႈတၢမ်ႇၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ