ၽူႈယႂ်ႇၵူၼ်းလူင်၊ ၶူးသွၼ်လႄႈ လုၵ်ႈႁဵၼ်း ႁူင်းႁဵၼ်းၸိူဝ်ႉၸၢတ်ႈလွႆတႆးလီလႄႈ ၸၼ်ႉၸွမ်ၵေႃတႆး ဝဵင်းၵႃလီႉသၢၼ်ၶတ်းလွင်ႈၵေႃႇၵၢၼ်ႁၢႆႉ ႁဵတ်းလွင်ႈသုၵ်ႉယုင်ႈဢူၼ်ၵဝ်းၼႂ်းမိူင်းတႆး။

ဝၼ်းတီႈ 08/10/2018 ၶၢဝ်းယၢမ်းတၢမ်းၶမ်ႈ 4 :00 တႄႇၵႂႃႇ ၶူးပူင်သွၼ်လူင်ၸၢႆးၾႃႈ၊ လုၵ်ႈႁဵၼ်းၸၼ်ႉၸွမ်ၵေႃတႆး၊ လုၵ်ႈႁဵၼ်းၸိူဝ်ႉၸၢတ်ႈလွႆတႆးလီ ဢိၵ်ႇၵူၼ်းၼုမ်ႇၸိူဝ်းၼႆႉ ႁူမ်ႈၵၼ်ၼႄၵၢင်ၸႂ်သၢၼ်ၶတ်း လွင်ႈဢမ်ႇတြႃးလွင်ႈ ၵေႃႇၵၢၼ် ႁၢႆႉၼႂ်းမိူင်းတႆး ။ လိူဝ်ၼၼ်ႉၶၢဝ်းယၢမ်းၵၢင်ၶမ်ႈမွၵ်ႈ 7 မူင်း ဢွၼ်ၵၼ် တႆႈတဵၼ်းယွၼ်းသူးပၼ်ၸဝ်ႈၶူး ၵလျႃႇၼ ဝမ်ႇသ ဢၼ်ထုၵ်ႇၵူၼ်းႁၢႆႉ ယိုဝ်းလူႉလွၼ်ႇထင်တီႈ မိူဝ်ႈဝၼ်းတီႈ 05/10/2018 ၼၼ်ႉ ဝႃႈၼႆ။

ၼၢင်းႁဵဝ်းသႅင် ၽူႈၸတ်းၵၢၼ်ၵူႈလွင်ႈလွင်ႈ ၸၼ်ႉၸွမ်ၵေႃတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်ႁဝ်းၶႃႈၸတ်းႁဵတ်းၼႆႉ ပိူဝ်ႈၼႄၾၢင်ႁၢင်ႈလွင်ႈမွင်ၸႂ်ၸွမ်း ၸဝ်ႈၶူးၵလျႃႇၼ ဝမ်ႇသ ဢၼ်ထုၵ်ႇ ၵူၼ်းႁၢႆႉယိုဝ်း လူႉလွၼ်ႇထင်တီႈ တီႈဝတ်ႉၵျွင်းယွတ်ႈ ၸႄႈဝဵင်းၵျွၵ်ႉမႄး ၊ ႁဝ်းၶႃႈသၢၼ်ၶတ်းလွင်ႈ တႆးတေႃႇတႆးယိုဝ်းၵၼ်ၸိူဝ်းၼႆႉလႄႈ သၢၼ်ၶတ်းလွင်ႈ ၵေႃႇၵၢၼ်ႁၢႆႉဢၼ်ၵိူတ်ႇၶိုၼ်ႈၼႂ်းမိူင်းတႆးၸိူဝ်း ၼႆႉဢေႃႈ။ ပေႃးထိုင်မႃးဝၼ်းတီႈ 11 ပဵၼ်ဝၼ်းပူၼ်ႉၶၢပ်ႈတူဝ်ၸဝ်ႈတူၼ်ၶူးလႄႈ  သင်ဝႃႈၽႂ် တူဝ်ႈ တၼ်းၼႆ ဢွၼ်ၵၼ် ၵႂႃႇၶဝ်ႈႁူမ်ႈ ၼႄလွင်ႈ မွင်ၸႂ်ၼမ်ၼမ်ၶႅၼ်းလီၶႃႈဢေႃႈ” ဝႃႈၼႆ။

ပေႃးထိုင်မႃးဝၼ်းတီႈ 11/10/2018 ၸုမ်းလုၵ်ႈႁဵၼ်းႁူင်းႁဵၼ်းၸိူဝ်ႉၸၢတ်ႈလႄႈ လုၵ်ႈႁဵၼ်း ၸၼ်ႉၸွမ်ၵေႃတႆး ဢိၵ်ႇၵူၼ်းၼုမ်ႇၸိူဝ်းၼႆႉတေၵႂႃႇႁူမ်ႈမွင်ၸႂ် ၼႂ်းဝၼ်းပူၼ်ႉၶၢပ်ႈတူဝ်ၸဝ်ႈၶူးၵလျႃႇၼ ဝမ်ႇသ တီႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ ။