ၸုမ်းပရႁိတ ၶႅၵ်ႇလီပၢင်ၸႃ ၼမ်ႉၶူင်း ၵျွၵ်ႉမႄး ယုၵ်ႉယွင်ႈပၼ်သူး လုၵ်ႈႁဵၼ်း ၸိူဝ်းဢွင်ႇပူၼ်ႉၸၼ်ႉသိပ်း တီႈ မိူင်းငေႃႉ တင်းမူတ်း 25 ၵေႃႉ။

ပၢင်ယုၵ်ႉယွင်ႈ ပၼ်သူး လုၵ်ႈႁဵၼ်းၸိူဝ်းဢွင်ႇပူၼ်ႉၸၼ်ႉသိပ်း ၼႂ်းပီ 2017 -2018 ၼႆႉ ၸတ်းႁဵတ်း တီႈႁူင်းႁဵၼ်း ၸၼ်ႉသုင်(ႁူင်းႁေႃမျႃႉၸဵင်ႇယွင်ႇ) ပွၵ်ႉၵၢတ်ႇ ၵိင်ႇၽႄမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။

ၸၢႆးတဵင်းငူၺ်ႇ ၵႅမ်ႁူဝ်ပဝ်ႈ ၸုမ်းပရႁိတ ၶႅၵ်ႇလီပၢင်ၸႃႉ ၼမ်ႉၶူင်း ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ပီ ၼႆႉ တင်းမူတ်း လုၵ်ႈႁဵၼ်းဢၼ်ဢွင်ႇပူၼ်ႉၸၼ်ႉသိပ်း မီး 25 ၵေႃႉ။ တွၼ်ႈပၼ်သူးၶဝ်တီႈမိူင်းငေႃႉ ႁႂ်ႈၶဝ်ပေႃး မီးႁႅင်းၸႂ်လႄႈ သိုပ်ႇၶတ်းၸႂ်ၵႂႃႇထႅင်ႈ။ ပီၼႆႉ လုၵ်ႈႁဵၼ်း ဢၼ်လႆႈလၢဝ်ၸွင်ႈ(ဂုဏ်ထူး) တင်းမူတ်း မီး 18 ၵေႃႉ။ တီႈပၢင်ၼၼ်ႉ ၶႃႈႁဝ်း တႄႉလႆႈသပ်းလႅင်းၼႄ လွင်ႈယိူင်းဢၢၼ်း ၸုမ်းပရႁိတ ႁဝ်းလႄႈ လွင်ႈၵၢၼ်ၸွႆႈထႅမ် တႃႇ ပီႈၼွင်ႉႁဝ်း မိူဝ်ႈၽွင်းထူပ်းလွင်ႈယၢပ်ႇၽိုတ်ႇ ပဵၼ်ၽေးၵိုင်ႉၵၢင်ႉ ၊ လွင်ႈလူႉတၢႆ ၸဵမ်ၸိူဝ်းၼႆႉ” ဝႃႈၼႆ။

ပၢင်ယုၵ်ႉယွင်ႈလုၵ်ႈႁဵၼ်းၵတ်ႉၶႅၼ်ႇ ၸိူဝ်းဢွင်ႇပူၼ်ႉၸၼ်ႉသိပ်း ၼႂ်းၵိင်ႇၸႄႈဝဵင်းမိူင်းငေႃႉၼႆႉ လႆႈယုၵ်ႉယွင်ႈပၼ် လုၵ်ႈႁဵၼ်း ၸိူဝ်းလႆႈ လၢဝ်ၸွင်ႈ 4 လုၵ်ႈ၊ 3 လုၵ်ႈ၊ 2လုၵ်ႈလႄႈ 1 လုၵ်ႈ တင်းမူတ်း မီး 18 ၵေႃႉ ဢၼ်ဢွင်ႇပူၼ်ႉ ၸၼ်ႉလၢႆလၢႆသမ်ႉ 7 ၵေႃႉ ဝႃႈၼႆ။

ၼႂ်းပၢင်ယုၵ်ႉယွင်ႈ လုၵ်ႈႁဵၼ်းၽူႈၵတ်ႉၶႅၼ်ႇ ဢွင်ႇပူၼ်ႉၸၼ်ႉသိပ်း ၼႂ်းၵိင်ႇၽႄမိူင်းငေႃႉၼႆႉ မီးၽူႈယႂ်ႇၵူၼ်းလူင် မိူၼ်ၼင်ႇ ၽူႈၵွၼ်းပွၵ်ႉ/ ဢိူင်ႇ၊ ၾၢႆႇမေႃယႃ၊ ၸုမ်းတူင်ႉၼိုင်တူင်ႇဝူင်းၵူၼ်းလႄႈ ပလိၵ်ႈ ၸဵမ်ၸိူဝ်းၼႆႉ မႃးၶိုၼ်ႈ ႁွတ်ႈ ပၼ်ႁႅင်း တင်းၼမ် ဝႃႈၼႆ။